Read Kosena 2 Tésárónaika 1 Bible Online

2 Tésárónaika 1 - Kosena bible

2 Tésárónaika 1

¹kemá Póro maanáímbá maanáúváívímbá agaimaráúmpo ísáaro. moóráwai áwíꞌa Sáírásiye moóráwai áwíꞌa Tímótiye kesé máyaayankaꞌa moórá-kwasai sénaumpo ísáaro. Tésárónaikaa-naopakewaima Ísóigona kwaási ísáaro. Áánútu kentáásivoe tarúmai Ísóigo Ísu Káráísitiye tarúmai máyáawaima ísáaro.

²Áánútu kentáásivowawe Ísóigo Ísu Káráísitiye úwoi kwétuwaꞌnaa-esarai paru kwéumatinkaayantaveꞌa námúnaa kwésune.

³kentáásí kwaásiyono. ááéma Áánútun-aaiyaveꞌa áraire séꞌa kwenkáꞌá agevamái méꞌa ívéꞌa asiramái Áánútuwe aráápamai máyáawe. ááéma moórá-morawaivimba kentirumbá tímakaamba isaꞌá ívéꞌa kentirumbá tímaꞌmae kwégowe. mirámó kwéomba mindáyaveta Áánútumpaꞌa súwi símae kwéiyeta námúnaaya kwésundaya kawetá kwéune.

⁴Ísu Káráísitina kwaási ontávésa sáwíꞌa umátinkesa tíꞌa iníꞌa kwéumatinkaamba Áánútunkaꞌa agevamái méꞌa íma auwéꞌa kwentávéꞌa ísámai asiramái máyáamba póta Áánútuna kwaási moórá-mora-naopimpaꞌa máyáanta simátimeta kentúwíꞌa mósá makáumne.

⁵miráumai asiramái máyáamba pósa tíꞌa iníꞌa kwéumatinkaamba iséta séta Áánútu arupí-meyamba timínímba póna kaweꞌnáráwariꞌa kwéumatinkena kwégaragwiyiye kwésune.

⁶Áánútu arupí umái máyáiwai sáwíꞌo kwéumatinkaawai sáwí-meyamba tiména

⁷kentí umbai-yántááré kentáásí umbai-yántááré ánásasiyuwanintaawe. Ísóigo Ísu kwíyómpakemba kumíndaraꞌa kwená asirayán-kwáyóꞌnárawakwaraꞌa iraráámbá kúraꞌmae kumíndaraꞌa kentí umbai-yántááré kentáásí umbai-yántááré Áánútu ánásasiyuwena

⁸Áánútumpaꞌo ímo tésamo nénkaꞌo máyáawai sáwí-meyamba tiména Ísóigo Ísuna áséi-kwasai ímo taagwiyavíyawai sáwí-meyamba timíníye.

⁹miwítí sáwí-meyamba maarán-iye. sáwí-meyambo kwaíkwaiꞌo ínín-ayampaꞌa aasiyaasí maíꞌmaiꞌa íyana Ísóigo aambá ítáyuwainasa kwenópaꞌa íma iyésa kwená óꞌoran-asirayamba íma awánanaaowe.

¹⁰mitáwai kumíndaraꞌa kwená kwaási kwenááiyavesa áraire sésa kwenkáꞌá agevamái máyáawai kwenáwíꞌa anómba umánkesa áwíꞌa mósá marésa aamoí ónááowe. Ísun-aai simátimewanata keinárawakwaraꞌa áraire séꞌa kwenkáꞌá agevamái máyáamba póꞌa mirá ónááowe.

¹¹mindáyaveta keinárawaꞌa túwaꞌnaa eta maarán-áímbá námúnaa símae kwéiyune. Áánútu kwená kwaási-iꞌa umátinkaindayavena tááyena kaweꞌnáráwariꞌa umátinkanintaveta námúnaaya kwésune. Áánútu asirayámbá timínaꞌa kentí imáyáavinkemba kaweꞌ-máyáí maimaé iyónááontaveta námúnaaya kwésune. Áánútu asirayámbá timínaꞌa kwenkáꞌá agevéꞌa asiramái ménaaomba póꞌa kaweꞌ-máyáí mayánááontaveta námúnaaya kwésundaya póꞌa

¹²keinárawapimba Ísóigo Ísu áwíꞌa anómba íyana Ísu kwená kwaási-iꞌa kwéontavena kentúwíꞌa maimaé iyíníye. kentáásí Áánútuwe Ísóigo Ísuwe úwoi túwaꞌnaa úyamba póꞌa Ísóigo Ísu áwíꞌa mósá maránááontaveta námúnaaya kwésune.