Read Kosena 1 Tímóti 1 Bible Online

1 Tímóti 1 - Kosena bible

1 Tímóti 1

¹Tímótiyo kemá Póro maanáímbá maanáúváívímbá agaimaráúmpo isaaó. Áánútu kentáásí sáwí-imayaaomo tátokaimpinkemba iyásínkáiwaiye Ísu Káráísiti kumíníye séꞌa amuꞌmaráúndawaiye kentávésarai sésarai aantá-kwaasi-iꞌa éma Ísu Káráísitin-aai kosimátímaꞌmae naauwó sésarai siꞌmákaaivo

²Tímótiyo Ísu Káráísitinkaꞌa agevamái maéndawai áraiꞌa kesááninkaamba ómpo isaaó. Áánútu kentáásivowawe Ísu Káráísiti kentáásí Ísóigowe úwoi áwaꞌnaa esarai tirumbá umánkesarai paru umánkaayantaveꞌa námúnaa kwésune.

³ááéma Másétóniyaa-maravaꞌa kónáe séwánda-tawai entávéꞌa asiramái séꞌa Évésasi-naopaꞌa úwoi maiyó. Áánútun-aaigomba kwaéꞌnáer-aimba kwésewaiyavai íma mirán-áímbá seró simátimiyo.

⁴aasiyaasí íma imáyáa umái manír-áíné tíkwáꞌnáwe tináávúwísáiye túwíkwaraꞌa íma taaró simátimiyo simámakaumne. mirán-áímbó kwésemba kwaásiti imáyáa taviséna íma túwaꞌnaa ínasa pósa Áánútumpaꞌa íma aráápamai maíꞌmaiꞌa ónááowe.

⁵ánivo simámunda-aimbo amáparawaimo kwarésamo ésa imáyáavinken-aine tirumpinkén-áíné kaweré suꞌmai úmae kwéiyinasa Áánútun-aaiyavesa áraire sésa íma tóikakene suꞌmai sésa tirunkakénkwáráꞌá sénááomba pósa tirumbá tíméro kwésune.

⁶évakarawai mináímbá ivátuwesa úwoi-aimba símae naaésa

⁷Áánútuna ámáámba simátimenae sésa ombánivo minámáámbá íma kaweꞌá umái isésa asiramái sen-áínkóná ááimba íma ísaraawe.

⁸ámáámba kawe-tántááꞌá póna mindámo kwégwaraan-kwaasi ámáánko kwétuwaꞌnaa-imba ísaraumne.

⁹kesí ámáámba kwaꞌmái máéro séna ámáámba tiména sáwíꞌo uráan-kwaasi kawer-ámpáꞌó kónááontavena ámáámba tímakaiye. ámáámbo káráan-kwaasiye aaimó ímo ísáan-kwaasiye Áánútuntavesamo ímo imáyáamo on-kwáásíyé sáwíꞌo kwéon-kwaasiye Áánútun-aaiyavesa kwíráái kwésen-kwaasiye tinóvowi tínkamowasa púwón-kwaasiye évakarawai tínkamowasa púwón-kwaasiye

¹⁰aarai-úmóyámbó on-kwáásíyé kwaai-úmóyámbó on-íníné umóyán-ánkáꞌá nááón-kwaasiye iyámpóí-umoyambo on-kwáásíyé kampar-áímbó sen-kwáásíyé kampar-áímbó simátiyuwaan-kwaasiye Áánútuna árair-aimbo káráan-kwaasiye mirámó kwéon-kwaasimo kawer-ámpáꞌó kónááontavena ámáámba tímakaisata ísaraumne.

¹¹mináímbá áséi-kwasaivimba kwéna Áánútu kaweré suꞌmai iwáí kwená ááimba óꞌoran-aainkwarawaina árair-aimban-iye. kembá Póromba simásimena séna mináímbá simátímaꞌmae naauwó siráiye. Áánútu arumbá umásínkaraiye Póro siráin-kwasai.

¹²Ísu Káráísiti kentáásí Ísóigo simásimena séna kesí mayáí kaweꞌá umái mayáníyondayavai mayaaó séna mimbáyáímó mayánaundayavena asirayámbá símísaꞌa súwi kwésimankaumne.

¹³ánivo mimbáyáí íma mairáawandaraꞌa kwenáwíꞌa simái sáwíꞌa umánkeꞌa kwená mayáí-kwáásí sáwíꞌa umátinkeꞌa kwembá simái sáwíꞌa umánkaraumne. minkánááráꞌá Ísuma Ísóigoma iyé-áíntávéꞌa íma áraire séꞌa íma ísámai kawer-éꞌa póꞌa sáwíꞌa uráunda mindáyavena arumbá umásinkena

¹⁴Ísóigo úwoi súwaꞌnaa úmae iyísaꞌa Ísu Káráísitiye tarúmai méꞌa kwenááiyaveꞌa áraire séꞌa kwená imáyáa kwéune.

¹⁵Ísu Káráísiti sáwíꞌo kwéon-kwaasi sáwí-imayaaomo tátokaimpinkemba iyátinkanintavena marapáꞌá kunkáiye siráivo mináímbá árair-aimban-ivo iséꞌa tirumpimbá asiramái tátoraaro. kemó Póromo sáwíꞌo uráundawai amáparawaimo sáwíꞌo uráamba usáyaaitaraumne.

¹⁶mirámó uráundayavena arumbá umásinkena ayáátáákaꞌa simuꞌmarómba kwaási mindá awánésa kwenááiyavesa áraire sésa aúnáiꞌa umái maíꞌmaiꞌa ónááontavena íma sínkamimba simuꞌmaréna ména arumbá umásínkaraiye.

¹⁷Áánútu kwégarakwiyiwai maíꞌmaiꞌa éna íma puwíníwai éna kwenaneꞌá súrandei ímo awánáúndawai kweyáá Ísóigoma éna kwená ááimba óꞌoran-aaimba kwaíkwaiꞌa isaná kwenáwíꞌa anómba kwaíkwaiꞌa kwéiye.

¹⁸Tímótiyo kesááninkaawai maanáímbá asiramái simámenaumpo isaaó. ááéma Ísóigona mayáímá mayáníyonda-aimba entá simámakaundayaama isaꞌá imáyáa éꞌa póꞌa asiramái simámeꞌa séꞌa mináíntáváí imáyáa umái kwaréma Ísóigowe aráápamai méma arunkakémbá árair-aimba isé méma i-kwáásímó tiyáántámbo kwimáímo asirayám-báyáímó kwémaesamo máéntemba Áánútun-aaiyavai ayáántámba kwimái asirayám-báyáí kwémae maiyó kwésune. évakarawai tirunkakémbá árair-aimba tínaaemba umámesa pósa Ísóigon-aai tínaaemba umámesa máyáawe.

²⁰miwívínkémbá kaeꞌnárai túwíꞌa moóráwai áwíꞌa Áíméniyasi isaná moóráwai áwíꞌa Arekesándaa isaꞌá tiꞌmaráúnana Sáátáánigo tátokaiye. Áánútunkaꞌa sáwí-aimba simái tuwáyááoiye séꞌa tiꞌmaráúnana Sáátáánigo tátokaiye.