Read Kosena 1 Tímóti 3 Bible Online

1 Tímóti 3 - Kosena bible

1 Tímóti 3

¹évakarawaimo Áánútuna kwaásiraꞌa kárákwiyi-mayai mayánáe síyawaimo ésa tirááímo taí-máyáí kaweꞌ-máyáímán-iye siráamba mináímbá árair-aimban-iye.

²moóráwaimo Áánútuna kwaásiraꞌo kárákwiraiwaina mayáímó mayáíndawai maarán-kwáásígómán-iye. kwempímbá íma sáwí-aimba kwáyaindawai éna mimbórá-ínímbá makáindawai éna arupí umái kawer-ímáyááwé suꞌmai kwéindawai éna kwenáwíꞌa mósá maréwai éna namu-kwaasí naambá tiména toómbá tiména índawai éna Áánútun-aai kanaán-umai simátímaꞌmaena kwéiyindawai éna

³íma uwoꞌaóꞌ-nómbá námae naaéna uwoꞌaóꞌá índawai éna íma aaisan-áímbá séna paru umái máyaindawai éna íma óntantavena aúran-anda kwéindawai éna

⁴kwená naaúmpaꞌa máyáan-kwaasiraꞌa kaweꞌá umái kárákwiraindawai éna kwená iyámpói kwentávésa ésa kwenáái kwéisaiyawai éna mirán-kwáásígómó éna Áánútuna kwaásiraꞌo kárákwiraiwaina mayáímá mayáníye.

⁵moóráwaimo kwená aarai-iyámpóíraꞌo ímo kaweꞌó umáímo kárákwiraindawaimo éna Áánútuna kwaásiraꞌa íma kanaán-umai kárákwiyiniye.

⁶ívéꞌo Áánútuntavenamo ísámaimo tíndawaimo éna Áánútuna kwaásiraꞌa kárákwiraiwaina mayáímá íma mayáníye. mirán-kwáásígómó mimbáyáímó maénamo éna kwenáúma maé iyínana Sáátáánigomo sáwí-meyambo mayánínteniꞌa mirá íníye.

⁷kwembá simái sáwíꞌa umánkáavo Sáátáánigo tamaimái kweivaríꞌa iváínivo Áánútunopaꞌo ímo tiráan-kwaasigwaraꞌo sésamo kaweré suꞌmai umái máyáiwaiman-iye síyan-kwaasigomo éna mirán-kwáásígówé suꞌmai Áánútuna kwaásiraꞌa kárákwiraiwaina mayáímá mayáníye.

⁸Áánútuna kwaásiraꞌa kárákwiraawai kwétuwaꞌnaa-owai maarán-kwáásímán-owe. arupí umái máyaiyawai ésa íma kaumbo-káér-imayaamo tokáiyawai ésa íma uwoꞌaóꞌ-nómbá námae nááíyawai ésa íma óntantavesa túran-anda kwéiyawai ésa

⁹tirunkakémbó árair-aimbo isésamo kwéomba Áánútuna árair-ainkona ááimba tátoraawai ésa

¹⁰mirán-kwáásímá ésa Áánútuna kwaásiraꞌa kárákwiraawai kwétuwaꞌnaa-owaiti mayáímá mayánááovo aivaꞌá miwítí mayáímá tuwánewasamo kaweꞌó íyaꞌo éꞌa mimbáyáímá tíméro.

¹¹mirá íyasamo ésa miwí tuwainímbááꞌa maarán-ínímbán-owe. kaweꞌá umái maíyawai ésa íma kwantánaanta-aimba kwésen-inimba pósa arupí umái mésa amápaꞌ-mayai kaweꞌá umái kwémayaawe.

¹²Áánútuna kwaásiraꞌa kárákwiraawai kwétuwaꞌnaa-om-bayaima kwémayaawai maarán-kwáásímán-owe. kímbora-inimba mapá kuráawai ésa miwítí iyámpóírare miwítí naaúmpaꞌa máyáan-kwaasirare kaweꞌá umái kárákwiraawai ésa mirán-kwáásímó Áánútuna kwaásiraꞌa kárákwiraawai kwétuwaꞌnaa-om-bayaima mayánááowe.

¹³mimbáyáímó kaweꞌó umáímo mayánááowai ésa Ísu Káráísitiye aráápamai máyáan-aimba asiramái simátimiyasa isésa miwí túwíꞌa mósá maránááowe. áraiꞌ-monor-ainkona ááin-kwasai.

¹⁴Tímótiyo kemá Póro sáwíyankaꞌa embá koawánanae séꞌa kwéeꞌa maanáúváímá kwéagaimai tuwáúmpo awánaao.

¹⁵enópaꞌa kónáe séꞌa onda-ámbó itáinamo e maanáúváí awáné sé kesáá Áánútuna akúntá únanaya agaimakáimba símakaimba póta miráyá ónaumne síníyone. ávombo aimakésamo megwímegwigomo ávonkaꞌo tátoraintemba kesáá Áánútu máyáiwaina kwaásiya éta kwená árair-aimba tátokaundayaawe.

¹⁶áraiꞌa áraiꞌ-monor-ainkona ááimba paárúwana anón-kwaasi éna maarán-iye.Ísu Káráísiti marapáꞌá kwaási-iꞌa umái paárúwana Áánútun-amanko kwentávéna séna arupí umái máyáiwaiman-iye súwasa Áánútuna kwayóꞌnárawaꞌa kwíyómpakewai awánowasa kwaási óꞌon-oꞌom-baravakewai kwenáái simátímaꞌmae kuwasá kwenááiyavesa áraire suwaná Áánútu kunáíꞌmaena kwíyómpaꞌa móankaraiye. mináímbá áraiꞌ-monor-ainkona ááimban-iye.