Read Kosena 1 Tímóti 4 Bible Online

1 Tímóti 4 - Kosena bible

1 Tímóti 4

¹Áánútun-amanko avoraꞌá séna naaén-kanaa tínasa évakarawai Ísu Káráísitimba tínaaemba umámesa Sáátáánigowe kwená kwayóꞌnárawaremo síyan-aimba isésa kampar-áímbó síyamba kwaránááowe siráiye.

²iramó aneꞌó kaimbó áúmo pukáin-kuvinkaambo intembá tirumpimbá miráráá ínasa tirumpinkémbá íma árair-aimba isésa tóikakene suꞌmai kampar-áímbá sésa

³aaraiyé kwaaiyé mayánááomba aambá áúntinkesa évaka-tomba aambá kwéauntinkesa mirá-kámpár-áímbá síyasa naaén-kanaa tínasa évakarawai mirán-ámbá kwaránááowe. mintóntávéna Áánútu kwená árair-aintavesa áraire síyawaiyavena séna mirán-tómbá umátinkaunda kwéneꞌa súwi sígwáe séꞌa umátínkaraumne Áánútu siráiye.

⁴amápa-tantaaꞌo Áánútumo úmakaimba kawe-tántááꞌán-ivo aambá áútinkaavainivo úwoi kwéneꞌa Áánútuntaveꞌa súwi seró.

⁵námúnaaya súndayaanivo Áánútu kaweꞌán-iye siráimba pósa mintómbá aambá áúsinkaavainivo. Ísuna kaweꞌ-máyáí-kwáásí óne siráin-kwasai.

⁶Tímótiyo simáménda-aimba Áánútuna kwaási simátímínda Ísu Káráísitina mayáí-kwáásí-íꞌa éma po kawe-kwáásí auráníyone. toómbó nénamo asiramáímo máyáintemba Ísu Káráísitina árair-aimba kwaré kaweꞌá umái simátímaꞌmae íyínana mináínkó asiramánkaniye.

⁷manír-áímbá íma Áánútun-aaiman-ivo úwoi-aimban-ivo ánaaemba umámiyo. emá ayáántán-kwimai mé áraiꞌ-monor-amba kwégware enáúma kárákwiyuwo.

⁸súgomo kaweꞌó ínkwáe-imayaamo ésamo ésa tiyáántán-kwimai mayáí mayánááomba mindá kaweꞌán-ivo áraiꞌ-monor-ampaꞌa kónáe sésamo imáyáamo ésa tiyáántán-kwimai Áánútuna mayáí mayánááomba mindá anón-kaweꞌan-iye. mirámó ésamo ésa ívékwara naaénkwaraꞌa ménaaon-ayampaꞌa mimbáyáígó túwaꞌnaa iye.

⁹mináímbá árair-aimban-ivo ísámai tirumpimbá tátoraaro.

¹⁰Áánútu asirayánkwáráwáí póna amápa-kwaasiraꞌa kárákwiraiwai éna kwenááiyaveta áraire súndawaiya sáwí-imayaavinkemba kwéiyasinkaiwaimba kwéamuꞌmareta póta siyáántán-kwimai mayáíyá kwémayaumne.

¹¹Tímótiyo mináímbá simátime se mirán-oro siyó.

¹²ívé-kwaasi óndayavesa úwoi-kwaasi óne sésa sáwíꞌa umánkaavainivo kaweꞌá umái mé kawer-áímbá se imáyáa timé arupí umái mé kaweré suꞌmai kwéinasa Áánútun-aaiyavesa áraire sewáí awánésa óndantemba mirán-oro.

¹³enópaꞌo ímo kondaráꞌó éma kwaási túrankaꞌa Áánútuna aúváí-kwandaaivinken-aimba táámpamai simátímaꞌmae kwéiye agaráátinkaao.

¹⁴ááéma entávéna Áánútu siráin-aimba simátímúwasa Áánútuna kwaásiti anóndarawaꞌa tiyáámba enaneꞌá tátoresa sésa Áánútuna mayáímá mayaaó suwamá mimbáyáí máyéndayavai ónana Áánútu asirayámbá ámakaivo íma tuwé asiramái maimaé iyuwó.

¹⁵simátimunda-aine suꞌmai imáyáa e mirá úmae íyínasa amáparawai awánésa sésa Áánútuntavena asiramái máyáimba póna minásíráyánkó iyíníye sénááowe.

¹⁶enáúma kárákwimai méma simátímínda-aimba imáyáa umái kaweꞌá umái simátimiyo. mirámó ónda kawer-ámpáꞌá kwégonasa enáái ísáan-kwaasi kawer-ámpáꞌá kwégowe.