Read Kosena 1 Tímóti 5 Bible Online

1 Tímóti 5 - Kosena bible

1 Tímóti 5

¹Tímótiyo anónuntantontavai égési-aimpakemba íma simátime enavontávémo aánoumaimo kwempaꞌó séndantemba mirá simátimiyo. enávámaaꞌo óndantemba ívé-kwaasi mirámá umátinkaao.

²enanóisaimo óndantemba áráankantomba mirámá umátinkaao. enáúmbaaꞌo óndantemba ívér-inintomba mirá e kaweré suꞌmai umátinkaao.

³ketor-íníntí tírááꞌmaaraꞌi. tinówaimbaaraꞌi. mésamo ésa miwí túwaꞌnaa oro. ánivo ketor-ínímbó timááraawimo ímo mén-inimba túwaꞌnaa uwo.

⁴ánivo ketor-íníntí tírááꞌmaaraꞌi. tinówaimbaaraꞌi. mésamo ésa miwí túwaꞌnaa oro. áraiꞌ-mono-kwaasimo mésamo ésa miwítí akúmbá túwaꞌnaa oro. mirámó íyambo ésa kárákwimaesamo iráam-beyamba timénááomba Áánúntu aamoí íníye.

⁵ketor-ínímbá timááraawi íma máyáan-inimba ésa sésa Áánútu kenkáꞌá kárákwiyiniye sésa Áánútumpaꞌa námúnaa símae kwéiyesa súwaꞌnaa ínkwáe sésa námúnaa kwésewe.

⁶ánivo ketor-ínímbó marapá-tántáátávésamo tirááíyavesamo ésamo ombá Áánútuna némpaꞌa kwémaewe.

⁷ketor-íníntávésa sésa sáwíꞌa umái máyáawe seváínivo simámunda-aimba simátimiyo.

⁸Áánútun-aaiyavesamo kamparémó sembá mindá sáwíꞌa kwéombanivo évakarawaimo ésamo miwítí akúnkáré miwí timááraararemo ímo kaweꞌó umáímo kárákwiyombo ésa Áánútun-aai tínaaemba umámakaamba mindá anó-sawiꞌa kwéowe.

⁹ketor-ínímbó Áánútuna mayáímó mayánááon-inimba tivakáá-umai túwíꞌa agayaaó. mindá maarán-ínímbán-owe. áráankamba késa 60 ima maisukáan-inimba ésa kímbora-kwambo maivá kuráan-inintomba ésa

¹⁰miníníntóntávésa kaweꞌ-máyáí kwémayaawe kwésen-inintomba ésa miwí tírááꞌmaakaꞌa kaweꞌá umái kárákwiraan-inintomba ésa namu-kwaasí toómbá kwétimen-inintomba ésa Áánútuna kwaási kaweꞌá kwéumatinkaan-inintomba ésa umbai-yántááꞌó makáan-kwaasi kwétuwaꞌnaa-on-inimba ésa mirán-káwéꞌ-máyáímó kwémayaan-ketor-inin-tuwiꞌa agayaaó.

¹¹ívé-ketor-inin-tuwiꞌa íma agayaaó. miwí Áánútuna mayáí kwémaesa naaémba kwaaí mayánáe-imayaa ésa Ísu Káráísitinkaꞌa asirayán-áímbá símaresa íma imáyáa ésa kwaaí mayáíyasa

¹²évakarawai tuwánésa sésa Ísu Káráísitinkaꞌa asirayán-áímbá símakaan-aimba karésa sáwíꞌa uráawe sénááowe.

¹³miráumai maará ésa íma mayáí maésa nambáré suꞌmai naaésa íma mayáí kwémaesa kwantánaanta-aimba símae kwénaaesa náaindaantavesa kwendéí kwendei iyé-áímbá simátímaꞌmae naaésa aánávómó ímo senkáꞌá ke ísaresa símae naaónááowe.

¹⁴mindáyaveꞌa simámeꞌa séꞌa ívé-ketor-inimba kwaaí maésa iyámpói tinkésa kaweꞌá umái kárákwiyesa mirámó íyamba kesáámá íma sáwíꞌa umáíya máyaunda pósa Áánútuntavesamo ímo aamoimó íyawai kentáásí ááimbo sivakáá ésayaamo ésa íma simái sáwíꞌa umásinkanaaontaaniye.

¹⁵évaka-ketor-inimba kawer-ámbá áꞌa ivátuwesa Sáátáánigona sáwí-ampaꞌa kwégwaraantaveꞌa súnda-aimba kwésimamune.

¹⁶Áánútun-aaiyavesa áraire sen-ínímbá miwí timááraavinkembo ketor-ínímbó máyáamba túwaꞌnaa oro. Áánútuna kwaási ketor-ínímbá timááraawimo máyáan-inimba monoꞌ-máyáíráꞌó tukáan-ontandei túwaꞌnaa ováínivo ketor-ínímbá timááraawimo ímo máyáan-inimba minóntándéí túwaꞌnaa oro.

¹⁷Áánútuna kwaási miwítí anón-kwaasi kaweꞌá umái kárákwiraawaiyavesa imáyáa ésa miwítí meéyámbá mósá maꞌmai tíméro. minánón-kwáásívínkémbá évakarawai Áánútun-aai asiramái simátimesa anóm-bayai kwémayaawaiyavesa imáyáa ésa miwítí meéyámbá mósá maꞌmai anómba tíméro.

¹⁸mináíntávéna naaóváꞌá Áánútun-aai aúváívimba agaimaréna séna purumakankóná mayáíráꞌ-méyántávéna sénakwaásiti toómbá úwíti-aramba ásima piyíndayavena purumakankó aísamai tamái mapándáampa umái ásima pítúwáínkaꞌa purumakankóná óikaꞌa íma asááésa túwéwana úwoi ména évakaꞌa náníye agaimaréna siráiye. moórávaꞌa agaimaréna sénamayáímó máyáawai meéyámbá máyáaro agaimaréna siráiye. Áánútuna kwaási mináímbá imáyáa ésa miwítí anón-kwaasiti meéyámbá tíméro.

¹⁹Áánútuna kwaásiti anón-kwaasi tíyóꞌo vaiyáíyan-aimba íma isaaó. ánivo kaumbo-káé-kwaasimo tésamo síyan-aimba miwí táái isaaó.

²⁰sáwíꞌo úmae íyówaiyavai amáparawai túrankaꞌa asirayán-áímbá simátimiyo. mirámó inasamó ésa amáparawai táátavesa ésa miwí túraꞌa kárákwiyonaaowe.

²¹Áánútu aúrankare Ísu Káráísiti aúrankare Áánútuna kwíyómpaken-kwayoꞌnarawa túrankare asiramái simámeꞌa séꞌa simámundantemba uwo kwésune. aaigóná ááimbo ímo ísarendarakembo e íma aaí simátiminiyone. aaigóná ááimbo ísarendarakembo e kaweꞌá umái simátiminiyone. íma kwaási taaínkaakai uré simátime amápar-aimba avoraré suꞌmai simátimiyo.

²²moóráwaimo Áánútuna mayáí mayáínkwáe sémo e íma ááéma usásinanke awánasuwe naaémba usásinankaao. moóráwaimo sáwíꞌo kwéina íma egwáráꞌá mirán-e kaweꞌá umái kárákwiyuwo.

²³Tímótiyo enarumpinkémbó áíꞌo énamo évaka-tawaimo áúvaꞌo kwínamo e non-úrane suꞌmai íma ne taaérampinken-domba naaó súne.

²⁴évakarawaimo sáwíꞌo ombá tuwánaawasa sáwí-meyamba máyáambanivo évakarawaimo sáwíꞌo ombá miwítí ááimba naaémba paáriniye.

²⁵miráumai évakarawaimo kaweꞌ-máyáímó máyáamba tuwánaawasa évakarawaimo kaweꞌ-máyáímó máyáamba íma tuwánaamba mirámó kwéowaiti ááimba naaémba paáriniye.