Read Kosena 1 Tímóti 6 Bible Online

1 Tímóti 6 - Kosena bible

1 Tímóti 6

¹kárákwiraan-kwaasi évakarawai meéyámbakaawasa miwítí mayáí úwoi kwémaesa óntamba íma kwémayaawai Áánútuna kwaásiyavai maanáímbá simátimiyo. kárákwiraan-kwaasi túwíꞌa anómba umátinkeꞌa miwítí mayáí kaweꞌá umái máyáaro simátimiyo. mirámó íyasamo ésa Áánútu áwíre Áánútun-aaiye íma simái sáwíꞌa ónááowe.

²kárákwiraan-kwaasi Áánútun-aaiyavesa áraire sewáíyávésa miwítí úwoi-mayai-kwaasi sésa Ísu Káráísitina kwaásimo úndantemba miwígwáráꞌá Ísu Káráísitina kwaásima póta miwí túwíꞌa íma anómba umátinkanaumne seváínivo maarán-áímbá seró. Áánútun-aaiyaveꞌo árairemo súndantemba miwígwáráꞌá Áánútun-aaiyavesa áraire kwésewaꞌa sirumbá timéꞌa póꞌa miwítí mayáí kaweꞌá umái máyáanda mimbáyáívínkémbá kawe-tántááꞌá mayánááowe se úwoi-mayai-kwaasiyavai mináímbá simátimiyo. Áánútuntavaimo imáyáamo ésamo máyáamba anón-tantaariꞌa kwéon-kwasai. Tímótiyo simámunda-aimba asiramái simátimiyo.

³évakarawaimo óꞌon-aimbo simátimesamo kentáásí Ísóigo Ísu Káráísitin-aaimo kawer-áímbó ímo kwarésamo áraiꞌ-monor-aimbo ímo kwégwaraawai

⁴miwí túma maé iyésa amápa-tantaakona ááimba íma ísaraawe. miwívímbá sáwí-imayaa kwáyáísasa aaigóná ááintavesa sáwívar-aimba kwésesa kesááigo usáyaaitainkwae-aimba kwésewasa mirá-sáwí-áímpínkémbá tirumbá sáwíꞌa umátinkesa aaisambá sésa túwíꞌa simái sáwíꞌa umátinkesa sáwí-imayaa umátinkesa

⁵aaisan-áímbá símae kwénaaowe. mirámó kwéon-kwaasi miwítí imáyáa simái sáwíꞌa ésa árair-aimba ivátuwesa kampar-ímáyáá ésa sésa sáwívar-oisamba mayánáe sésa monor-ámbá kwégwaraawe-kampar-imayaa kwéowe.

⁶mirán-kámpár-ímáyáá kwéombanivo Áánútuna aambó áraiꞌo kwégwaraawai imáyáa ésa sésa Áánútuntaveꞌo imáyáamo éꞌo máyaunda anón-tantaaꞌa isaná makáunda-oisamba mindá kanaán-iye kwésewe.

⁷kesinóisaiya masínkónkaꞌa íya óísanta makáawanasaya másínkaraawe. púwóndaya íya óísankwarata maimaéta puwónaumne.

⁸unáánkwátóiye toóné makétaamo éta séta mindá kanaán-iyeya sénaundayaaniye.

⁹óísamba mayánáe-imayaawe suꞌmai owáí misáwí-ímáyááó tavisínana sáwí-yantaatavesamo tirááíyavesamo íyan-tantaako miwí tátorainasa sáwíꞌa umái mésa ánásanaaowe.

¹⁰óꞌon-oꞌo-sawi-imayaaona ááimba óntamba mayánáe-imayaayavesa aamoí kwéowe. évakarawai óntamba mayánáe-imayaawe suꞌmai kwéesa Áánútun-aai ivátuwesa umbai-yántááꞌá maésa tirunkó umbaí kwétaisasa máyáawe. Áánútu aúrankaꞌa arupí umái maiyó siráin-kwasai.

¹¹Tímótiyo emá Áánútuna kwaási éma mirán-tántáákómbá ánaaemba umáme Áánútu aúrankaꞌa arupí umái mé kwentáváí imáyáa kwéema amápaꞌ-mayai kaweꞌá umái kwémae imáyáa kwétime Áánútuntavai asiramái aánoumai mé mirán-tántáátáváí ayáántán-kwimai máyaane.

¹²kwaásimo meéyámbó mayánáesamo isaaisésamo kontembá emá Áánútun-aaiyavai áraire kwése ayáántán-kwimai minámbá kwaré aúnáiꞌa umái maíꞌmaiꞌa kwéonda-amba kwaꞌmaé iyuwó. ááéma sáwíva-kwaasi túrankaꞌa paárumai séma Ááútun-aai árair-aimba póꞌa kwenkáꞌá agevamái máyaumne sundaráꞌá Áánútu entávéna aúnáiꞌa umái maíꞌmaiꞌa kwéone siráiye.

¹³Áánútu amápaꞌa máyáawaiti ááinkontaveꞌa imáyáa éꞌa Ísu Káráísiti aaimó isáí-náúmpáꞌá anón-kwaasigo áwíꞌa Póntiyasi Páírátimba kawer-áímbá simámakaiwaintaveꞌa imáyáa éꞌa embá asiramái simámeꞌa séꞌa

¹⁴kentáásí Ísóigo Ísu Káráísiti marapáꞌó ímo kunkáindaraꞌa kwemó siráin-aimba kwaꞌmaé kwéiye kaweré suꞌmai kwéonasa awánésa sésa mináímbá árair-aimban-iye sénááowe kwésune.

¹⁵Áánútu Ísu Káráísitintavena séna kumuwó sínda-tawai kumíníye. Áánútu kaweré suꞌmai kwéiwai éna kweyáá amáparawairaꞌa kárákwiraiwai éna amápar-asirayankwara-kwaasi kwená asirayánkó usáyaaitaraiwai éna amápa-kawaa-kwaasiraꞌa kawáá uráiwai éna

¹⁶kweyáá íma puwíníwai éna óꞌora-sagayankaꞌa máyáiwai isasá mirá-ságáyánkáꞌá íma kwaási kanaán-umai koménaaowe. Áánútumba amápa-kwaasi íma túrandei awánésa íma kanaán-umai túrandei awánanaaowe. kwenáwíꞌa anómba kwaíkwaiꞌa kwéisana kwená asirayámbá kwaíkwaiꞌa kwéimba mindá árair-aimban-iye.

¹⁷Tímótiyo óísankwara-kwaasiyavai asiramái simátime se íma túma maé iyéꞌa íma óísantaveꞌa aamoí éꞌa mindá ánásanin-tantaaꞌa íma amuꞌmaréꞌa méꞌa Áánútu amápa-tantaaꞌa kwésimiwaintaveꞌa amuꞌmaréꞌa méꞌa aamoí oro simátimiyo.

¹⁸moórá-aimba óísankwara-kwaasi simátime se kaweꞌ-máyáí kwémaeꞌa túwaꞌnaa úmae kwéiyeꞌa óísamba taaínkaakaumai tímaꞌmae íyóro.

¹⁹mirámó éꞌo éꞌa mirámó íyan-tantaataveꞌa naaémba keinárawaꞌa túwaꞌnaa ínín-tantaaꞌa kwáyainaꞌa mirámó éꞌa kaweꞌá umái ménaaowe simátimiyo.

²⁰Tímótiyo Áánútu simámakain-aine agarááránkarain-aine kárákwimai kaweꞌá uwo. Áánútun-arááímo ímo kwáráan-kwaasi úwoi-aimba kwésevo mináímbá ánaaemba umátimiyo. kampaꞌá sésa amápa-tantaaꞌa ísaraumne sésa aainakákémbá aaisambá símae kwéiyon-aimba ánaaemba umátimiyo.

²¹évakarawai sésa amápa-tantaaꞌa ísaraumne sésa pósa Áánútunkaꞌa agevamáímo máyáan-amba ivátukaawe. Áánútu amáparawai úwoi kwétuwaꞌnaa-intaveꞌa námúnaa kwésune. kemá Póro súnda-aimba ánásaiye.