Read Kosena 2 Tímóti 1 Bible Online

2 Tímóti 1 - Kosena bible

2 Tímóti 1

¹Tímótiyo kemá Póro maanáímbá maanáúváívímbá agaimaráúmpo isaaó. Áánútu kwená imáyáavinkemba kentávéna séna aantá-kwaasi-iꞌa éma Ísu Káráísitin-aai kosimátímaꞌmae naauwó séna siꞌmákaiye. Áánútu asiramái séna Ísu Káráísitiye tarúmai máyáamba póꞌa aúnáiꞌa umái maíꞌmaiꞌa ónááowe siráin-aimba kosimátímaꞌmae naauwó séna siꞌmákaiye.

²Tímótiyo kesááninkaamba éma sirumbó kwéamundawai ómpo maanáímbá maanáúváívímbá agaimaráúmpo isaaó. Áánútu kentáásivowawe Ísu Káráísiti kentáásí Ísóigowe úwoi áwaꞌnaa ésarai tirumbá umánkesarai paru umánkaayantaveꞌa námúnaa kwésune.

³kesíkwáꞌnámo Áánútumbo kwakáantemba kemá mirá kwéunana mindáyavena kesirumpimbá íma aaí kwáyáiye. Áánútumpaꞌa námúnaa kwésunda entávéꞌa imáyáa éꞌa aasiyaasí áísaa umai súwi kwésimankaumne.

⁴iviꞌó tamásínkaraanda imáyáa éꞌa ókwaraꞌa awánanae-imayaa úmae kwéiyeꞌa embó awánaanda sirunkó anón-kaweꞌa íníye.

⁵Ísu Káráísitin-aaiyavemo árairemo sendá ímo óikakembo séndamo arunkakémbó séndayaveꞌa imáyáa kwéune. aivaꞌá enaráárámá áwíꞌa Árówísi Áánútun-aaiyavena áraire siráimba minkákémbá enanó áwíꞌa Yúnísi Áánútun-aaiyavena áraire siráimba egwáráꞌá mirá kwée Áánútunkaꞌa agevamái máyaanda áraiꞌa mindá ísaraumne.

⁶mindáyaveꞌa simámeꞌa séꞌa Áánútumo asirayámbó ámakaimba tátoke kwená mayáí mayaaó. Áánútuna mayáímó mayáníyondayaveꞌa siyáámba aneꞌá tátoraawanana Áánútu asirayámbá ámakaiye.

⁷Áánútu imáyáaya símakowata asiramáíya méta íya sáátaveta éta imáyáaya kwétimeta kesúrata kárákwimai kawer-urétaaya úndaya po Áánútumo asirayámbó ámakaimba tátoke kwená mayáí mayaaó.

⁸mindáyavai kentáásí Ísóigo siráin-aimba kwésimatimendayavai íma ááꞌa kaíno. Ísóigona kwaási-iꞌa úndarakemba ándávaꞌa sínkaraawaꞌa máyaundayavai íma ááꞌa kaíno. Áánútu asirayámbá kwéamimba po áséi-kwasai kwésimatiminasamo áíꞌo índaiꞌo umánkanaaomba síꞌo úniꞌo umásínkaraantemba umánkanaaomba íma imáyáa éma asiramái maiyó.

⁹Áánútu séna sáwí-imayaavinkemba iyátínkáanaꞌa kaweré suꞌmai umái máéro siráiye. kesáá kaweꞌ-máyáí mayáúndayavenaya ímanivo kwená imáyáavinkemba séna úwoi túwaꞌnaa ónaumne siráimba póna kentáásí sáwí-imayaavinkemba iyásinkena séna kaweré suꞌmai umái máéro siráiye. ááinkaꞌa Áánútu maramá íma taróruronkaꞌa Ísu Káráísitina mayáíyávéna imáyáa éna séna úwoi túwaꞌnaa ónáeꞌa toꞌmayaa úne siráiye.

¹⁰Áánútu kentááyávénawe séna toꞌmayaa uráimba paárúwana Ísu Káráísiti marapáꞌá kuména kentáásí sáwí-imayaavinkemba kwéiyasinkaiye. kwaási púwówaina ááimba kwemá usáyaaitena ánásasuwowasa kwíyómpaꞌa aúnáiꞌa umái maíꞌmaiꞌa ésa íma puwónááowe. mináséí-áímbá paárúwata ísaraumne.

¹¹mináséí-kwásáí simátimenaundayavena Áánútu simásimena séna aantá-kwaasi-iꞌa éma aiꞌmáráana maanáséí-kwásáí simátímaꞌmae naauwó súwaꞌa

¹²mirá ówándarakemba síꞌa úniꞌa umái ándávaꞌa sínkaraawaꞌa méꞌa íma sigaeyávéꞌa kwéune. moóráwain-aaiyaveꞌo árairemo séꞌa kwenkáꞌó agevamáímo máyaundawaimba awánéꞌa símakaim-bayai kwégarakwiyisaꞌa mináímbá árair-aimban-iye súnda póꞌa íma sigaeyávéꞌa úne. Áánútu kwaásimo máyáawaina ááimba tísaa ínín-kanaama íma tiráindaraꞌa símakaim-bayai kwégarakwiyiye.

¹³Tímótiyo árair-aimba simámakaunda arumpimbá tátore kwaré Ísu Káráísitiye tarúmai mé kwenááiyavai áraire kwése kwembá arumbá amé mirá úmae iyuwó.

¹⁴Áánútu árair-aimba simámakaimba Áánútun-amanko kentáásirumpimba máyáimba po kwená asirayándéí mináráír-áímbá kárákwiyuwo.

¹⁵Ésiyaa-maravaken-kwaasi amápaꞌa tínaaemba umásiyukaampinkemba kae-kwáásí moóráwai áwíꞌa Vísérasa isaná moóráwai áwíꞌa Émósénisi isamá mináímbá ísaraane.

¹⁶moóráwai áwíꞌa Ónésívorasa kesópaꞌa tóyo éna kawer-áímbá simásimena kesí imáyáa aúnáiꞌa umásinkena ándávaꞌo máyaunda íma agaeyávéna isaꞌá mindáyaveꞌa Ísóigompaꞌa námúnaa súnda Ónésívorasa kwená naaúmpaꞌa máyáan-kwaasiye kaweꞌá umátinkaniyone séꞌa námúnaa kwésune.

¹⁷kwemá Árómáa-naopaꞌa taména sivakáá úmae kwéiyena ándávaꞌo máyaunda tasuwánéna kesí imáyáa aúnáiꞌa umásínkaraiye.

¹⁸ááéma Évésasi-naopaꞌa komáyaawanana sáwíva-tawai kwemá súwaꞌnaa úwa áꞌa awánaraane. mirá uráintaveꞌa séꞌa Ísóigo kwaásimo máyáawaina ááimba tísaa ínín-kanaa tínana Ísóigo kwentávéna arumbá umánkaniye súne.