Read Kosena 2 Tímóti 2 Bible Online

2 Tímóti 2 - Kosena bible

2 Tímóti 2

¹kesááninkoo Ísu Káráísiti úwoi kwéawaꞌnaa-ivo asiramái maiyó.

²sáwíva-kwaasi túrankaꞌa simátimewanda-aimba isé kawer-ímáyáágwárá-kwáásí asiramáímo máyáawai kaweꞌó umáímo simátimenaaowai simátímínasa miwígwáráꞌá tátokesa simátíméro.

³i-kwáásímó umbai-yántááꞌó tímémbo asiramáímo máyáantemba Ísu Káráísitina kwaási-iꞌa óndarakemba embá umbai-yántááꞌá ámémbanivo asiramái maiyó.

⁴i-kwáásí miwítí anóndako aamoí ínkwáe sésa kwenáái kwégwaresa íma óꞌon-oꞌon-tantaatavesa imáyáa kwéesa anóndakona mayáíyávésa imáyáa kwéowe.

⁵isaaisésamo kwégontemba moóráwaimo kwená anóndakon-aaimo isénamo isaaisénamo iyénamo éna meéyámbá mayáníye.

⁶kígauvaꞌo asiramáímo kárákwiyowaimo ombá toómbó akaráí-kánáámó tisasá aivaꞌá ákáꞌmai kwénaawe. mináímbá imáyáa é Ísu Káráísitiye asiramái maiyó.

⁷simámunda-aimba imáyáa inaná Ísóigo imáyáa amína mináínkóná ááimba isáníyone.

⁸Ísu Káráísiti Tévíti aísaavutantambo uráiwai puwéna usásinkaiwaintavai imáyáa uwo. mináímbá áséi-kwasai simátímakaunda-aimban-iye.

⁹mináséí-kwásáí simátimewandarakemba ándávaꞌa másinkesa sáwíꞌo uráiwaimbo aíyayaankaꞌo asááúmaesamo máánkaraantemba kembá síyayaankaꞌa asááúmaesa síꞌa iníꞌa umái ándávaꞌa másínkaraavo kemá úwoi ménaumpo Áánútun-aaigo kóyáwé ínasa ísáaro.

¹⁰mindáyaveꞌa Áánútumo kwéitamarain-kwaasiyaveꞌa imáyáa éꞌa póꞌa umbai-yántáátávéꞌa íma imáyáa éꞌa máyaumne. Ísu Káráísiti miwítí sáwí-imayaavinkemba tíꞌmaena kawepáꞌá métinkainasa ságayan-ayampaꞌa maíꞌmaiꞌa ónááontaveꞌa umbai-yántáátávéꞌa íma imáyáa éꞌa asiramái máyaumne.

¹¹maanáímbá árair-aimban-iye.Ísu Káráísitiye tarúmaiya máyaundaya póta puwétaamo éta kweséya ménaundayaaniye.

¹²umbai-yántááꞌó ímo imáyáamo éta asiramáímo métaamo éta kwaásiraꞌo kárákwiyintemba kesáágwáráꞌá miráyá ónaumne. sínaaembo umámenanayaamo éna kentáágwáráꞌá mirá íníye.

¹³kwenááiyavetaamo árairemo sirétaamo ivátúwáananayaamo éna kwemó sintembó mirámó kwéena íma kanaán-umai tuwéna óꞌon-aimba síníye. mináímbá árair-aimban-iye. Áánútuna mayáí arupí umái maénana aamoí umánkaino siráin-kwasai.

¹⁴Tímótiyo Áánútu aúrankaꞌa maanáímbá simái ságamatime asiramái simátímaꞌmae iyé sé maanáímbá imáyáa oro. úwoi-aintaveꞌa sáwívar-aimba kwéseꞌa áwááꞌa kwésevo mináímbá ivátuwaaro. mináímbó isáíyananamo éna mináínkó íma kaweꞌá umátinkainaꞌa sáwíꞌa ónááovo súnda-aimba simátímaꞌmae iyuwó.

¹⁵maarán-kwáásí-íꞌa ónáe se mirán-uwo. árair-aimbo arupí umái simátímíndawaima éma Áánútuna mayáí-kwáásí éma ená mayáíyáváí íma aigaeyáváí íníyondawai éma mirámó émo e Áánútu aúrankaꞌo ménda simámena séna kaweꞌá umái máyaane síníye.

¹⁶úwoi-aimba Áánútun-arááímo ímo kwaráan-kwaasi kwésen-aimba ánaaemba umátimiyo. mirán-áímbó kwésen-kwaasi Áánútuntavesa imáyáa íma kwéesa sáwísawaa úmae kwéiyowe.

¹⁷sóyavitausambo énamo amápa-kuvaꞌo intembá miwí tááigo kóyáwé imbá pósa sáwíꞌa ónááowe. miwívínkémbá kae-kwáásí túwíꞌa moóráwai áwíꞌa Áíméniyasi isaná moóráwai áwíꞌa Váírítasae

¹⁸minkáéꞌnárai árair-aimba ivátuwesarai sésarai puwúndavinkenta áꞌa usásinkaunda póta naaémba óꞌa íma usásinanaumne séyasa isésa évakarawai Ísu Káráísitin-aaiyavesa kaer-ímáyáá kwéowe.

¹⁹ávombo asiramáímo aimáráantemba Áánútu ávonkaan-tantaaꞌa asiramái aimaréna minkáꞌá aúvái agaimaréna séna Ísóigo kwená kwaási áꞌa tuwánaraiye séna moórá-aimba agaimaréna séna Ísóigona kwaási únemo sewáí sáwíꞌo kwéomba tínaaemba umáméro agaimaréna siráiye.

²⁰moórá-aimba simáménda isaaó. anón-daumpaꞌa évaka-taaveꞌa marésa évakaꞌa ságayan-ontandei úmakaan-taaveꞌa marésa évakaꞌa taaineí úmakaan-taaveꞌa marésa évakaꞌa karíꞌ-máránéí úmakaan-taaveꞌa marésa anón-kanaawe suꞌmai óntan-taavepinkemba nésa úwoi-kanaa taai-taavépínkémbá kwénaawe.

²¹simátímakaunda-sawi-mayaigombo tínaaembo umámesamo kaweꞌó umáímo máyáawai kawe-táávékáámbá umái mésa Áánútuntavesa imáyáa kwéesa Áánútumo kaweꞌ-máyáí timíníntavesa toꞌmayaa umái máyáawe.

²²ívé-kwaasimo sáwí-yantaatavesamo tirááíyavesamo ombá ánaaemba umáme arupí umái méniyonda-imayaa e Áánútun-aaiyavai áraire símae iyí-ímáyáá kwétime paru umái mé tirumpimbó kaweré suꞌmai imáyáamo ésamo Ísóigompaꞌo kwéaisaa-esamo súwaꞌnaa ínkwáe sésamo ontembá mirán-uwo.

²³úwoi-aintavesamo sáwívar-aimbo kwésemba mináínkákémbá áwááꞌo kwésemba ísaraampo ánaaemba umámiyo.

²⁴Ísóigona mayáí-kwáásí íma aaisambá sésa paru umátinkesa kanaán-umai agaráátinkesa áwááꞌo sembá tasí umátinkesa

²⁵kwempaꞌá mésa miwímó kentááimo arááísén-kwaasiti imáyáa kaweꞌá umátinkesa mirámó íyanamo éna Áánútu imáyáa timínasawa Áánútunopaꞌa tésawa árair-aintavesa áraire sénááo. íya sénááoo. mindáyavesa Ísóigona mayáí-kwáásí amuꞌmarésa ménaaowe.

²⁶Sáátáánigo kesí imáyáa ígwáe séna miwí tátokaiye. árair-aintavesamo árairemo sésamo ésa kawer-ímáyáá ésa Sáátáánigomo tátotuwenamo máyáimpinkemba tuvíyuwesa Áánútunopaꞌa ténááowe.