Read Kosena 2 Tímóti 3 Bible Online

2 Tímóti 3 - Kosena bible

2 Tímóti 3

¹Tímótiyo naaén-kanaamo tínanamo umbai-yántááꞌó paárinintavai imáyáa uwo.

²minkánáávímbá kwaási maará ónááomba kesáváíyé suꞌmai aamoí kwéesa óntantavesa aamoí kwéesa kesávésa kawe-kwáásí úne kwésesa kentúma maé iyésa évakarawai simái sáwíꞌa umátinkesa tinóvowi táái kwéaraaisesa túwaꞌnaa owáíyávésa íma súwi kwésesa Áánúntavesa íma imáyáa kwéesa

³miwítí kwaási íma imáyáa timésa tóiꞌo matuwé máyáamba íma paru ésa kampar-áímbá simátinkesa miwí túraꞌa íma kárákwiyesa ááite kwétiyesa kawe-tántáátávésa tíyántavesa kwéumatinkesa

⁴namuro-kwáásíyávésa miwítí kwaási kwéagaraatinkesa sáwíꞌa umátínkáaro kwésesa sáwí-amba ááéma kwégwaresa miwí kentúma mósá marésa sáwí-yantaatavesa tirááíyavesa kwéesa aamoí ésa Áánútuntavesa íma aamoí ésa

⁵kwaási túrankaꞌa mono-kwáásí úne kampaꞌá kwésesa Áánútuna asirayámbá tínaaemba kwéumamevo mirámó kwéon-kwaasi ánaaemba umátimiyo.

⁶miwívínkémbá évakarawai óꞌon-oꞌon-daumpaꞌa iyésa ímo kawer-ímáyáámó on-íníntávésa kampar-áímbá sewasá isésa miwí tááiyavesa áraire kwésewe. minínímbá sáwíꞌa owaná anóniꞌa isasá mirá-sáwí-yántááꞌá tirááíyavesa kwéowana misáwí-yántáákó miníníntómbá tátokaiye.

⁷miníníntómbá amáparawai táái isésa íma kanaán-umai taaímbai isésa árair-aimba tátokaawe. mindáyavesa mirán-kámpáꞌ-mónó-kwáásí tááiyavesa áraire kwésewe.

⁸naaóváꞌá Mósesima máyonkaꞌa kaeꞌnárai túwíꞌa moóráwai áwíꞌa Yánísi úwana moóráwai áwíꞌa Yámbárísiyemo Mósesin-aaimo arááírayantemba minkámpáꞌ-mónó-kwáásí miráumai árair-aimba araaisésa imáyáa sáwíꞌa ésa tóikakemba Áánútun-aaiyavesa áraire kwésevo

⁹sáwíyan-kanaawe suꞌmai mirá ónááowe. miwí kampar-áímbá kwésesa máyáamba tuwánésa sésa kampaꞌ-mónó-kwáásímán-owe sésa miwí táái íma kwaránááowe. naaóváꞌá Yánísiye Yámbárísiyemo sirááiyan-kampar-aintavesa mirá siráawe. árair-ainkomba tátoꞌmai maiyó siráin-kwasai.

¹⁰miwí mirá kwéovo emá íma mirá uráampo naaóꞌ-nao-kwaasi simátimunda-aimba isé kemó máyaundawaina ááimba suwáné kemó kwénaaundawaina ááimba suwáné uréma po mináímbá kwégwaraane. Áánútuwe aráápamai maéꞌa paru umái méꞌa imáyáa timéꞌa umbai-yántáápímbó asiramáímo máyaunda-aimba ísaraane.

¹¹Ántíoku-naopare Áíkóniyaa-naopare Árísitaa-naopare máyaawandaraꞌa umbai-yántááꞌá simésa síꞌo úniꞌa umásínkówaꞌa íma imáyáa éꞌa asiramáímo máyaawanda suwánaraane. kempímbá anón-umbai-yantaaꞌa kwáyombanivo Ísóigo mimpínkémbá síkaiye.

¹²íma kené suꞌmai sáwíꞌa umásinkesa maarán-kwáásígwáráꞌá sáwíꞌa umátinkanaaowe. Ísu Káráísitiye tarúmai méꞌa kwentávéꞌa imáyáa éꞌa méꞌa mirá ónáe sewáí umbai-yántááríꞌa umátinkanaaowe.

¹³sáwí-kwaasi kampar-áímbá kwésesa óꞌowiti imáyáa koyavisewáí sáwíꞌa úmae iyésa évakarawai kampaꞌá simátiyuwewasa miwí kampaꞌá mésimatiyuwanaaowe.

¹⁴emá íma mirá indá simátímakaunda-aintavai áraire asiramái sé mináímbá asiramái tátoraao. mináráír-áímbá simátímakaundawaiya kaweꞌá umái suwánaraanda po mináímbá asiramái tátoraao.

¹⁵emá iyámpói máyóndaraꞌa Áánútun-aai aúváí-kwandaaivinken-aimba simátímaꞌmae íyúmba ísaraanda ívékwaraꞌa kwéisaane. Áánútun-aai aúváí-kwandaaivinken-aimba kwéawanaawai kawer-ímáyáá ésa Ísu Káráísitin-aaiyavesa áraire kwésewana Áánútu sáwí-imayaavinkemba kwéiyatinkaiye.

¹⁶Áánútu imáyáa timúwasa Áánútun-aai aúváí-kwandaaivimba amápar-aimba agaimakáamba pósa mináúváí-kwándááívínkén-áíndéi Áánútuna aambá agaráátinkesa sáwíꞌo uráantavesa asiramái sésa sáwí-imayaa arupí kwéumatinkesa kaweré suꞌmai umái ménaaon-amba kwéagaraatinkaawe.

¹⁷Áánútuna mayáí-kwáásímó Áánútun-aai aúváí-kwandaaivinken-aimbo ísámaimo kaweꞌó íyanamo éna mináínkó kaweꞌ-máyáí-kwáásí-íꞌa umátinkainasa Áánútumo kaweꞌ-máyáímó timíním-bayai asiramái kaweꞌá umái mayánááowe.