Read Kosena 2 Tímóti 4 Bible Online

2 Tímóti 4 - Kosena bible

2 Tímóti 4

¹Tímótiyo Áánútu aúrankare Ísu Káráísiti pukáan-kwaasiye túvamai úwoi máyáan-kwaasiye miwítí ááimba tísaa íníwai aúrankare asiramái simámeꞌa séꞌa Ísu Káráísiti marapáꞌá kumínín-imayaa éꞌa kwená kwaásiraꞌa kawáá ínín-imayaa éꞌa asiramái simámeꞌa séꞌa

²amápa-kanaa Áánútun-aai asiramái simátime kawe-kánáámó índa simátime sáwí-kanaamo índa úwoi mindágwaraꞌa simátime kwempakémbá kwésimatiminana mináínkó tirumbá kwantáínasa isáíyama miwítí imáyáa arupí umái asiramátinke simátímaꞌmae iyé íma ivátuwaao.

³naaémba moórá-kanaa tínasa árair-aimba íma ísámae iyónááontavai ívéꞌa árair-aimba simátímaꞌmae iyuwó. naaémba moórá-kanaa tínasa sáwí-yantaatavesa tirááíyavesa kwéesa aamoí ónááon-aimba simátimenaaon-kwaasiyavesa tivakáá ésa miwí tááiye suꞌmai isésa

⁴árair-aimba tínaaemba umámesa manír-áímbá isánááombanivo

⁵emá asiramái ménana umbai-yántááꞌó enópaꞌo tínímba asiramái méma Áánútun-aai simátímaꞌmae iyé kwená mayáí kwémae ánásaao.

⁶Áánútuntavesamo imáyáamo ésamo nombó atíyuwaantemba sáwíyankaꞌa kembá Póromba sínkamiyana kesí naaeó miráumai kumínaꞌa puwónaumne.

⁷isaaisésamo kwégontemba kaweꞌá umái kwégweꞌa ayááíráꞌá koméꞌa Áánútuna árair-aimba tátokeꞌa simátímakaunda

⁸Ísóigo kesí meéyámbá tátokaimba póna arupí umáímo máyaunda-anonda simíníye. naaémba Ísóigo arupí umái-meyambo timíníwai siména íma keyáá kembá siména marapáꞌó kumíníntavesamo aamoimó ésamo amuꞌmakáawaigwaraꞌa kwétimena simíníye.

⁹Tímótiyo sáwíyankaꞌo kesópaꞌo tíníyonda-imayaa kwée maiyó.

¹⁰moóráwai áwíꞌa Tímasi marapá-tántáátávéna aamoí éna póna siyuwéna Tésárónaikaa-naopaꞌa kówisana moóráwai áwíꞌa Kéréséni Kárésiyaa-maravaꞌa kówisana moóráwai Táítási Táómésiyaa-maravaꞌa kówisana

¹¹Árúku kweyáá kesé máyáivo Máákaamba koáíꞌmae kesópaꞌa tiyó. Mááka tasúwaꞌnaa umai Áánútuna mayáí tamayáníye.

¹²moóráwaimba Tikikásaamba aiꞌmaráúnana Évésasi-naopaꞌa kóuraiye.

¹³ááéma Táróasi-naopaꞌa kesí kwááꞌa tuwááwánana Kápása kárákwiraivo maimaé téma aúváí-kwandaaigwaraꞌa aiva-tántááꞌá sáwíyan-auvaigwaraꞌa maimaé tiyó.

¹⁴moóráwai áwíꞌa Arekesándaa kwená mayáí kópaa-ontandei évaka-tantaaꞌa kwéiwai anómba sáwíꞌa umásínkáimba póna Ísóigo anondá sáwí-meyamba amíníye.

¹⁵Áánútun-aai simátimewanda kwemá simái arááísukaivo kwembá kárákwiyuwo.

¹⁶aiva-táwaimo aaimó simásínkáamba mináímbó sénáeꞌo kwéunda amáparawai íma sááyavo tésa siráváyáawaꞌa Áánútuntaveꞌa íma anondá sáwíꞌa umátinkaao súne.

¹⁷miwí íma siráváyáawana Ísóigo sirávayena asirayámbá símísaꞌa Áánútun-aai amápar-aimba simátímakaunda íma Yútaa-kwaasiraꞌa ivo óꞌonkaa-kwaasiraꞌa siráunda ísaraawe. áwáávitemo in-íyánkó óipinkembo mayauwénamo kawepáꞌó móánkáintemba Ísóigo aaivimbá kwémaisinkaampinkemba síkena

¹⁸sáwíꞌo kwéumasinkempinkembo éna síꞌmai kwíyómpaꞌa kwemó kwégawaaipaꞌa kaweꞌá umái mósinkaniye. kwená ságayambo kwaíkwaiꞌo ínímba árair-aimban-iye.

¹⁹Párísikaante Ákwíraante simátime se kaweꞌá umái máékaiyo siyó. Ónésívorasaante kwená naaúmpaꞌa máyáan-kwaasiye simátime se kaweꞌá umái máéro siyó.

²⁰Érásátasi Kórínti-naopaꞌa máísana Tóvimasa áíꞌa kwéuwaꞌa Máíritasi-naopaꞌa auwéꞌa tiráumne.

²¹áúꞌo sií-kánáá íma tiráina imáyáa é kesópaꞌa tiyó. Yúpúrásawe Púténésiye Áráínásawe Kírótiyawe amápaꞌa Áánútuna kwaásiye entávésa sésa kaweꞌá umái maiyó kwésewe.

²²Ísóigo keinárawate ména úwoi kwétuwaꞌnaa-intaveꞌa námúnaa kwésune. kemá Póromo súnda-aimba ánásaiye.