Read Kosena Táítási 1 Bible Online

Táítási 1 - Kosena bible

Táítási 1

¹Táításiyo kemá Póro moórá-aimba sénaumpo isaaó. kemá Áánútuna mayáí-kwáásí éꞌa Ísu Káráísitina aantá-kwaasi-iꞌa umásinkena siꞌmákaiwai úne. Áánútumo kwéitamarain-kwaasi kwesé aráápamai maíꞌmaiꞌa kwéesa áraiꞌ-monor-aimba ísámae kwéiyesa Áánútuna aampaꞌó kwéiyontavena Ísu Káráísiti mináímbá simátimiyo séna siꞌmákaiye.

²naaóváꞌá Áánútu ímo kampaꞌó kwésiwai árair-aine suꞌmai kwésiwai asiramái séna kwéitamaraunda-kwaasi aúnáiꞌa umái maíꞌmaiꞌa ónááowe súwata árair-aimban-iye kwéseta máyaumne.

³Áánútumo imáyáamo urón-kanaa tíníye kwéuwana Ísu Káráísiti kwenáái simátimuwana Áánútu simásimena séna kesáái simátímaꞌmae iyuwó séna kentáásí sáwí-imayaavinkentaamo kwéiyasinkaiwaiya mináímbá siráiye.

⁴Táításiyo maanáímbá maanáúváívímbá agaimaráúmpo isaaó. Ísu Káráísitinkaꞌo agevamáímo maúndantemba emá mirán-umai méma áraiꞌa kesááninkaamba ómpo isaaó. Áánútu kentáásivowe Ísu Káráísiti kentáásí sáwí-imayaavinkentaamo kwéiyasinkaiwaiye úwoi áwaꞌnaa esarai paru umánkaayantaveꞌa námúnaa kwésune. Táítási Kíríti-maravaꞌa koména mayáí mairáin-kwasai.

⁵eséma keiráímá Kíríti-maravaꞌa komékai embá auwéꞌa kenkáísí mayáí íma ánásarainkaꞌa embá auwéꞌa tiráumne. mimbáyáí kaweꞌá íníyondayaveꞌa embá auwéꞌa simámeꞌa séꞌa amápaꞌ-naopaꞌa Áánútuna kwaásiti anón-kwaasi usásintinkavaꞌa kwíníyone séꞌa auwéꞌa tiráumne.

⁶usásintinkaan-kwaasi maarán-kwáásímán-owe. miwívímbá íma sáwí-aimba kwáyáiwai ésa kímbora-inimba mapá kuráawai owasá miwítí iyámpói maarán-íyámpóín-owe. Áánútun-aaiyavesa áraire sésa kwenkáꞌá agevamái máyáawai ésa kawer-íyámpóímán-owe kwésen-iyampoi ésa tinóvowi táái ísáawain-owe.

⁷Áánútuna kwaásiraꞌa kwégarakwiyowai Áánútuna mayáíráꞌá kwégarakwiyomba pósa maarán-kwáásímán-owe. miwívímbá íma sáwí-aimba kwáyáiwai ésa kesáái usáyaaitainkwae íma kwésewai ésa íma ááéma áwááꞌa sewáí ésa íma uwoꞌaóꞌ-nómbá námae naaésa uwoꞌaóꞌá owáí ésa íma aaisan-áímbá sewáí ésa óntantavesa íma túran-anda owáí ésa

⁸namu-kwaasí naambá toómbá timésa owáí ésa amápaꞌa kawe-tántáátávésa aamoí owáí ésa kawer-ímáyáá owáí ésa arupí umái máyáawai ésa Áánútun-arááímo kwégwaraawai ésa miwí túma kaweꞌá umái kwégarakwiyowai ésa Áánútuna kwaásiraꞌa kwégarakwiyowai mirán-kwáásímán-owe.

⁹Áánútuna árair-aimba simámakaunda-aimba asiramái tátoꞌmaesa íyóro. mirámó ésamo ésa árair-aimba kanaán-umai simátimesa asiramátinkanaaovo miwí tááiyavesa kampar-áímbán-iye sewáí tááigomba usáyaaitanaaowe.

¹⁰sáwíva-kwaasi kawer-áímbá íma kwégwaresa úwoi sáwívar-aimba símae kwénaaesa miwívínkémbá Yútaa-kwaasi sáwívarawai mirá ésa kampaꞌá simátiyuwesa

¹¹óntamba mayánáe sésa kampar-áímbá simátimesa évakar-akumba sáwíꞌa kwéumatinkesa sáwíꞌa kwéovo mináímbá aambá áúntinkaao.

¹²Kíríti-kwaasivinkemba moóráwai kawer-áímbá kwésiwai séna Kíríti-kwaasi aasiyaasí kampar-áímbá kwésesa aváá-kwámbó ontembá sáwíꞌa umái kavónáiꞌa umái mésa sáwíva-tomba naíꞌnaiꞌa kwéowe siráiye.

¹³siráin-aimba árair-aimban-iye. mindáyavai miwítí imáyáa asiramái arupí umátínkénasa Áánútun-aai kaweꞌá umái kwarésa

¹⁴Yútaa-kwaasiti manír-áímbá íma isésa árair-aimbo arááíraawai táái íma isáíyamba ivátúwáaro. mirá ónááontavai miwítí imáyáa arupí umátinkaao.

¹⁵imáyáa kaweré suꞌmai owáí amápa-tantaatavesa imáyáa ombá kawer-ímáyááwé suꞌmai kwéovo imáyáamo sáwíꞌo owáí Áánútun-aai arááísén-kwaasi miwítí imáyáao sáwíꞌa isaná tirumpimbá kampar-áímbá kwáyáísasa pósa amápa-tantaatavesamo imáyáamo ombá íma moórá kawer-ímáyáá kwéowe.

¹⁶miwí tóikakemba kampaꞌá sésa Áánútun-aai kwégwaraumne kwésevo sáwíre suꞌmai kwéesa kawer-áímbá araaisésa íma kanaán-umai kaweꞌá ombá miráumai máyáawaina ááimba Áánútumba tínaaemba kwéumasuwaawe.