Read Kosena Táítási 3 Bible Online

Táítási 3 - Kosena bible

Táítási 3

¹Táításiyo Ísóigona kwaásiraꞌa kárákwiraandawai ómpo maarán-áímbá simátimiyo. marapáꞌ-máyáíráꞌó kárákwiraan-anon-kwaasi tísamaivimba méꞌa miwí táái iséꞌa kaweꞌ-máyáíyávéꞌa toꞌmayaa umái amuꞌmaréꞌa méꞌa

²íma kampaꞌá simái sáwíꞌa umátinkeꞌa íma aaisan-áímbá séꞌa paru umái méꞌa amáparawai kawer-áíné suꞌmai kwéseꞌa máéro.

³ááéma sáwí-imayaagwara-kwaasiya méta aaí íma iséta sáwí-ampaꞌa kwégweta sáwí-yantaataveta sirááíyaveta kwéeta máyaawanana misáwí-yántáákó tátorowata sáwí-imayaayaveta sirááíyaveta kwéeta sáwíꞌa umái méta óꞌowiti náaindaantaveta súran-anda kwéeta síyánta kwéumatinkaawanasa kentáá tíyámba kwéumasinkowata méraumne.

⁴ánivo Áánútu kentáásí sáwí-imayaavinkemba kwéiyasinkaiwaiya séna sirumbá umátinkaunda póꞌa túwaꞌnaa ónaunda agaráátinkanaumne sirónkaꞌa Ísu Káráísitimba aiꞌmarówana marapáꞌá kumúwana

⁵Áánútu kawer-ámpátá mésínkaraiye. kesáámó kaweꞌó ówándayavenaya ímanivo arumbá umásinkenaya kawer-ámpátá mésínkaraiye. nombá pésinkowata aúnáiꞌa umái máyaawananaya Áánútun-amanko aúnáita umásinkontavena kawer-ámpátá mésínkaraiye.

⁶Ísu Káráísiti sáwí-imayaavinkemba kwéiyasinkaiwaiyavena Áánútu imáyáa éna kwenamankó kentáávímbá úwoi anómba kwéumasinkainta

⁷póna úwoi súwaꞌnaa umásinkenaya séna arupí-kwaasiman-owe. áraiꞌa aúnáiꞌa umái máiꞌmaiꞌa ónááoniꞌa umátinkanaumne kwésisata amuꞌmaréta máyaumne.

⁸mináímbá árair-aimban-iye. miráumai kárákwiraan-kwaasi táái isésa kaweꞌ-máyáí maésa máéro. Táításiyo mináímbá asiramái simátiminiyonda sirááíma kwétaiye. mirámó inasamó ésa Áánútun-aaiyavesa áraire sewáí asirayán-ímáyáá ésa kaweꞌ-máyáí mayánááowe. mináímbá kawer-áínkó póna kwaási túwaꞌnaa íníye.

⁹ánivo úwoi-aintavesa sáwívar-aimba kwésesa tíkwáꞌnáwe tináávúwísáiye túwíkwaraꞌa kwétesa aaisan-áímbó kwésesa Mósesimo sirón-amaantavesa aaisan-áímbá kwésemba mirán-áímbá úwoi-ainkoma póna íma túwaꞌnaa ínívo ánaaemba umátimiyo.

¹⁰évakarawaimo sáwí-aimbo simáímo taaínkaar-umátínkáawaimba kaumbo-káé-tawai asiramái simátímínasamo ímo isáíyamo e ánaaemba umátimiyo.

¹¹mirán-kwáásí kaéꞌmai máyáawai ésa sáwíꞌo ombá keyááríkaꞌa kwétuwanaawata kesáágwáráꞌá kwétuwanaumne.

¹²moóráwai áwíꞌa Átémásaanaꞌi. moóráwai Tikikásaanaꞌiyo. moóráwaimba aiꞌmáráanana enópaꞌa kwíndaraꞌa imáyáa é Níkópórisi-naopaꞌa kesópaꞌa tiyó. áúꞌo sií-kánáá Níkópórisi-naopaꞌa máyaana kesópaꞌa tiyó.

¹³moóráwai áwíꞌa Sínása aaimó isáí-kwáásígóe moóráwai Ápórosiye emá túwaꞌnaa inasaráí Áánútuna mayáí maimaésarai naaóyááoiye.

¹⁴Áánútuna kwaási súnda-aimba simátímínasa kawer-ímáyáá ésa mayáí kwémaesa umbai-yántááꞌó kwáyainda-kwaasi túwaꞌnaa esa pósa íma úwoi-mayai maésa ménaaowe.

¹⁵amápaꞌo kesémo máyáawai entávésa sésa kaweꞌá umái maiyó kwésewe. kentáásí kwaási Áánútuwe aráápamai máyáawaima esé máyáawai kaweꞌá umái máéro simátimiyo. Áánútu amáparawai úwoi kwétuwaꞌnaa-intaveꞌa námúnaa kwésune. kemá Póro súnda-aimba ánásaiye.