Read Kosena Vírímóni 1 Bible Online

Vírímóni 1 - Kosena bible

Vírímóni 1

¹Vírímóniyo kemá Póro maanáúváímá kwéagayaumne. kesí kwaási po kesé tágárotare mayáí kwémayaandawai isaaó. Ísóigona kwaási ená naaúmpaꞌa torupamái kwémaewai ísáaro. Ápíyaao kentáá símánaakogwaraꞌa isaaó. Ákípaasiyo keséya tágárotare asiramái mayáí kwémayaandawai egwáráꞌá isaaó. Ísu Káráísitin-aai simátimewandarakemba ándávaꞌa sínkaraawaꞌa méꞌa maanáúváí agaimái amúne. kenkáí síváko Tímóti kesé máyáiye.

³kentáásivo Áánútuwe kentáásí Ísóigo Ísu Káráísitiye úwoi kwétuwaꞌnaa-esarai paru kwéumatinkaayantaveꞌa námúnaa kwésune.

⁴Vírímóniyo kentáásí Ísóigo Ísuwe aráápamai mé Áánútuna kwaásivimba arumbá kwétime máyaanda-aimba iséꞌa póꞌa Áánútumpaꞌa námúnaa kwésunda entávéꞌa imáyáa kwéeꞌa súwi kwésune.

⁶enté kentési mayáígó moóráiꞌa kwéisata méta Ísóigowe tarúmaiya máyaundayavenaya kwemá kawetá kwéumasinkaisa awánaniyondayaveꞌa námúnaavinkemba Áánútumba kwéaisaa-une.

⁷Vírímóniyo kesíváko po Ísóigona kwaásivimba arumbá kwétime túwaꞌnaa ónasa aúnáiꞌa umái máyáan-aimba iséꞌa aamoí kwéumankaunana sirunkó kaweꞌá kwéisaꞌa áwaꞌnaa umai námúnaa kwésune.

⁸Ísu Káráísiti asirayámbá símakaimba póꞌa íma inkaiséꞌa emá moóráiꞌa uwo séꞌa kwésundanivo mirán-áímbá íma sénaumpo

⁹aánoumai kwempakémbá áísaa eꞌa séꞌa sendantembá mirá íníyone sénaumne. emá arumbá kwésimenaꞌa kemá sirumbá kwéamunda póꞌa aánoumai kwempakémbá simáméndaiꞌa mirá íníyone kwésune. kemá Póro Ísu Káráísiti kwená mayáí símakaimba kwémaeꞌa anónuꞌmai káúnasa ándávaꞌa sínkaraawaꞌa méꞌa

¹⁰moóráwai áwíꞌa Ónísímasintaveꞌa kwésune. ándávaꞌa méꞌa Ísóigon-aai simámunana iséna Ísóigompaꞌa tisaꞌá séꞌa kesí iyámpóíraamba óne séꞌa póꞌa kwentávéꞌa kwésune.

¹¹ááéma ená mayáí íma kaweꞌá umái mayómba mayáígón-áároi inkaiséna kóuraimbanivo ívéꞌa kesí mayáí kaweꞌá umái kwémaena ená mayáí kaweꞌá umái mayáníye.

¹²ívéꞌa aiꞌmáráanana enópaꞌa kwínama kesááninkaaniꞌa umái airáníyono.

¹³Ónísímasimba tátokaanana súwaꞌnaa ínkwáe séꞌa únda isaꞌá úwoi mirán-ímáyáá úne. Ísu Káráísitin-aai simátimewandarakemba ándávaꞌa mósínkaawaꞌa máyaunda enanondá Ónísímasi súwaꞌnaa íníye óndanivo

¹⁴némpaꞌa mémpo íma owé síníyondayaveꞌa póꞌa íma úwoi tátoranaunda póna kesé ména súwaꞌnaa íníye. íma súwaꞌnaa ónáe sindá súwaꞌnaa ónavainivo ená imáyáavinkemba súwaꞌnaa íníyone.

¹⁵Ónísímasi mayáígón-áároi inkaiséna embá auwéna sáwíyankaꞌa óꞌom-bapaꞌa tamáyáimbanivo enópaꞌa kwéna aasiyaasí koméniye-imayaa kwéune.

¹⁶Ísóigona kwaásigomo óndantemba kwemá mirá kwéena enávákaamba póna íma ená mayáí kwémayaiwaiye suꞌmainivo enávákoraamba éna enópaꞌa kwíníye. kemá kwembá sirumbá kwéamundantemba egwáráꞌá arumbá kwembá améma kesíváꞌan-iye síníyone.

¹⁷Ísóigona mayáígó enté kentési mayáígó moóráiꞌa kwéimba po kentáváí kesí naaúmpaꞌa iyuwó kwésendantemba Ónísímasintavai mirá síníyone.

¹⁸embó sáwíꞌo umánkenamo moórá-yantaaꞌo mairénamo ímo ámakainamo e íma kwenópaꞌa te kesópaꞌa tinaꞌá kemá meéyán-ónaumne.

¹⁹kemá Póro kesiyáándei kwéagayeꞌa mimbéyámbá aménaumne kwésune. Ísu Káráísitin-aai simámewana áraire siráanda maíꞌmaiꞌa íníyonda-meyamba kempáꞌá kwáyáimba pó íma kanaán-umai meéyán-íníyonda-aimban-iye.

²⁰kesívákoo Ísóigona kwaási ómpo áísaa úndantemba mirá inaꞌá Ísóigo aúrankaꞌa aúnáiꞌa umái máéno.

²¹maanáúváí agayáúnda imáyáa éꞌa séꞌa kesáái isé áísaa úndantemba mirá íníyone. emó íníyondawai kemó áísaa úndawaimba usáyaaitaniyone.

²²enópaꞌa ke kónaundayavai kesí maruꞌá usúkasinkaao. ándávakemba ayúsinkaiyaꞌa ená naaúmpaꞌa kónaundayavai Áánútumpaꞌa námúnaa simásinke moórá-maruꞌa usúkasinkaao.

²³moóráwai áwíꞌa Épávarasi kwemá Ísu Káráísitin-aai simátimunkakemba ándávaꞌa ánkaraawana kesé ména keinárawatavena séna kaweꞌá umái máéro kwésiye.

²⁴kesé mayáí kwémayaawai túwíꞌa moóráwai Mááka moóráwai Árísítakasi moóráwai Tímasi moóráwai Árúku miwí sésa kaweꞌá umái máéro kwésewe.

²⁵Ísóigo Ísu Káráísiti keinárawate ména úwoi kwétuwaꞌnaa-intaveꞌa námúnaa kwésune. Póro mináímbá simái ánásaumne.