Read Kosena Ípíru 10 Bible Online

Ípíru 10 - Kosena bible

Ípíru 10

¹Mósesimo siráin-amaankona aambá íma aan-úramban-ivo Ísu Káráísiti kaweꞌá kwéumatinkaiwaina aankóná amaankóꞌnaankaan-amban-iye. miráumai moórá-mora-iraꞌa monoꞌ-máyáí-kwáásí póí tuvúꞌmái Áánútumba ámakaamba mirám-báyáígó Áánútumpaꞌa tiráan-kwaasi íma arupí umátínkaraiye.

²póímo tuvúꞌmáímo Áánútumbo ámakaan-anko kaweꞌó umátínkarainkakai Áánútuna imáyáa mósá makáawai miwívímbá sáwí-aimba íma kwáyowasa sáwí-yantaatavesa íma umbaí tésa íma úwoi póí tuvúꞌmái Áánútumba ámaꞌmae iráasino.

³ánivo maará kwéowe. purumakankóná naaeówé mémeona naaeówé íma kanaán-umai sáwí-imayaa maitíyukaimba pósa moórá-mora-iraꞌa póí tuvúꞌmái Áánútumba ámakonkaꞌa miwítí sáwí-mayaigotavesa imáyáa uráawe.

⁵miráumai Ísu Káráísiti marapáꞌá kumíndayavena kwéena Áánútuntavena sénapóímo tuvúꞌmáímo embó ámakaane toómbó ámakaane íma embá arááíma kwétaivo kemá embá arááíma táíndaiꞌa ónaundayavai súma toꞌmayaa umásínkaraane.

⁶póímo agaisukáantavai íma aamoí kwéone. sáwíꞌo uráantavesamo póímo tuvúꞌmáímo ámakaamba mindáyavai íma aamoí kwéone

⁷simásuweꞌa séꞌa enáái aúváí-kwandaaivimba kentávéna simái agaimaréna séna Áánútuwo kemá méꞌa embá aráái táíndaiꞌa umái ménaumne simái agaimakáintemba kwéune kwésune Áánútuntavena Ísu siráiye.

⁸aivaꞌá Ísu Káráísiti séna ámáámbo siráinten-umai póíma tuvúꞌmái ámakaamba toómbá maimái ámakaamba póíma agaisukáamba sáwíꞌo uráantavesa póíma tuvúꞌmái ámakaambanivo minámbá íma arááíma kwétaisa aamoí íma kwéone

⁹simásuwena séna Áánútuwo kemá méꞌa embá aráái táíndaiꞌa umái ménaumne siráiye. mindáyavena Ísu Káráísiti póímo tuvúꞌmáímo Áánútumbo ámakaunda-anta ivátuwena aúná-amba Áánútumbo arááímo táínda-imayaamo kwaránaunda-anta agaráátínkaraiye.

¹⁰Ísu Káráísiti Áánútuna imáyáa kwaréna Áánútumba kwenáúma aména mimbórá-táwai pukáimba póna sáwí-imayaaya maisiyuwénaya Áánútundeiꞌia umásínkaraintaawe.

¹¹aasiyaasi-táwai monoꞌ-máyáí-kwáásí usásimbai mimbórá-máyáí maésa póí tuvúꞌmái Áánútumba ámakaamba mimbáyáígó íma kanaán-umai sáwí-imayaa maitíyukaimbanivo

¹²Ísu Káráísiti mimbórá-táwai Áánútumba kwenáúma aména pukáiye. sáwíꞌo uráantavenawe sáwíꞌo ónaundayavenayaawe puwéna mimbáyáí ánásasuwena Áánútu ayáánúrapaꞌa asirayán-áyámpáꞌá maraꞌá uména

¹³Áánútumo kwená namuro-kwáásímó tínkaminanamo kwemó usáyaaitanintavena amuꞌmaréna umáyáiye.

¹⁴miráumai Áánútumba kwenáúma ámakaimba pósa Áánútundei-iꞌa kwéumatinkain-kwaasi kasenkuíꞌa úmae iyónááowe.

¹⁵mináíntávéna Áánútun-amanko avoraꞌá simásimuwana Áánútun-aai aúváí-kwandaaivimba agaimaréna séna

¹⁶Ísóigo séna moórá-kanaa tínaꞌa aúná-aimbasimái tarútinkaandaraꞌa kesí ámáámba tirumpinéimáyáavine timénaumne siráiye.

¹⁷moórá-ainkwaraꞌa sénamiwítí sáwí-imayaawe ámááne káráraamba íma mindáyaveꞌa imáyáa úmae iyónaumne siráiye agaimaréna siráiye.

¹⁸Áánútu sáwí-imayaa maitiyuwéna íma imáyáa úmae íyísana póna sáwíꞌo uráantavesamo póímo tuvúꞌmáímo Áánútumbo ámakaan-amba ánásaiye. Áánútunopata íyóno siráin-kwasai.

¹⁹miráumai kesí kwaásiyono. Ísu Káráísiti puwúwana kwená naaemá kumúwana kentáásí aambá kwikáimba póta íma sáátaveta éta Áánútuna aokaꞌ-náúmpátá kwéiyune.

²⁰puwéna Áánútumba kwenáúma ámakaintavena aúná-amba kwaíkwaiꞌa ínín-amba agaráásinkena Áánútuna aokaꞌ-náúmpáꞌá mósá arátukon-ampaanta awásámai aambá kwiꞌmái Áánútunopata iyónaunda-amba agaráásínkaraimba mindáyavetaawe

²¹kwemá anóm-bonoꞌ-mayai-kwaasigo Áánútuna kwaásiraꞌa kárákwiraimba mindáyavetaawe

²²Áánútunopata íyóno. kentáásí sáwí-imayaaya maisiyúwáísanaya kentáásirumpinta íma aaí kwáyáísata kaweꞌ-nóntá peréta kwenááigonta sirumpintá tátoreta Áánútuwe aráápamai asiramái méta Áánútunopata íyóno.

²³Áánútun-aai árair-aimban-iye séta póta asiramáíya tátoreta íya ivátuweta Áánútumo kaweꞌá umátinkanaumne siráintemba mirá ínímba póta kwenáái asiramáíya tátoreta amuꞌmaréta méta miráyá onó.

²⁴kesáá imáyáaya kwéeta moórá-morawai túwaꞌnaa umai asirayáné imáyáawe timéta kaweꞌ-máyáíyá kwémaeta miráyá onó.

²⁵Áánútuntaveta imáyáa éta torupamái maíꞌmaiꞌa úmae iyéta évakarawaimo torupamáímo maivár-íyúmbo ivátukaantemba kesáá íma mirá éta torupamái maíꞌmaiꞌa úmae iyéta moórá-morawaiya asiramátinkanaumne. Ísu Káráísitimo kumínímba sáwíyan-kanaa kwáyáintaveta moórá-morawaiya asiramátinketa miráyá onó.

²⁶maísáaro. Áánútuna árair-aimba iséta tátoketa kentáásí imáyáavinkembo kwembó sínaaembo umámetaamo sáwíꞌo úmaetaamo íyónanayaamo éna Áánútu sáwí-imayaaya maisiyuwáníntavena óꞌon-amba íma kwáyáivo

²⁷sáátaveta kwéonanamo Áánútumbo tínaaembo umámiyantavenamo sáwí-meyambo timínasa anón-iravimbo káúgonaaontaveta amuꞌmaréta ménaumne.

²⁸Mósesi timún-amaambo arááíraawai aaivimbá usásintinkaresa kaumbo-káé-kwaasimo tuwánésamo sésamo áraiꞌa mirá kwéowe sésamo ésa íma tirumbá umátinkaiyamba tínkamiyasa puwónááomba

²⁹mindá umbai-yántááꞌán-ivo Áánútu ááninkomba tínaaemba umámémba mindá anón-umbai-yantaaꞌan-ivo Áánútu simái tarúmakonkaꞌa Ísu Káráísitina naaemá kumúwasa sáwíꞌo umbá maitíyukaimba mindáyavesa sésa úwoisan-tantaaꞌan-iye síyawai anómba sáwí-meyamba mayánááowe. Áánútun-amanko úwoimo súwaꞌnaa iwáíntávésa simái sáwíꞌa umánkaraawai anómba sáwí-meyamba mayánááowe.

³⁰maarán-áímbó siráimba mindá Áánútuma póna maará sénaanondá meéyámbá timénaunda mindá kendéímán-iye. sáwí-mayaiyaveꞌa meéyámbá timénaumne séna moórá-ainkwaraꞌa sénaÍsóigo kwená kwaási tísaa umai isénataaínkaaꞌa umái-meyamba timíníye siráiye.

³¹Áánútu asirayánkwáráwáí póna tíkena sáwí-meyambo timínímba mindá anómba táátavesa ónááovo Áánútuntaveꞌa imáyáa éꞌa torupamái maíꞌmaiꞌa úmae iyéꞌa moórá-morawai asiramátinkanaaowe.

³²ááéma Áánútu keinárawatavena sáma kamátinkonkaꞌa umbai-yántááríꞌa umátinkowaꞌa íma ivátuweꞌa asiramái méraavo mindáyaveꞌa imáyáa oró.

³³moórá-mora-tawai amáparawai túrankaꞌa sáwíꞌa umátinkesa simái sáwíꞌa umátínkómbanivo asiramái méꞌa moórá-mora-tawai kentí kwaásimo sáwíꞌo umátínkómba túwaꞌnaa úmae íyúwasa keinárawakwaraꞌa sáwíꞌo umátínkómba asiramái méraawe.

³⁴Áánútuna kwaási-iꞌo unkákémbá keinárawapinkemba évakarawai ándávaꞌo mótínkómba tiruntávéꞌa umátínkówasa kentí náaindaambo tavíyááví umbá íma imáyáa éꞌa séꞌa usáyaaitarain-tantaaꞌa kwíyómpaꞌa kwáyáimba póta maíꞌmaita ónaumne suwaná tirunkó kaweꞌá uráiye.

³⁵mirá uráavo Áánútuntaveꞌa asiramái méꞌa kaweꞌ-méyámbá kwémayaawe.

³⁶Áánútuna imáyáavinkeniꞌa éꞌa kwemó mirá umátinkanaumnemo siráin-tantaaꞌo mayánááontaveꞌa asiramái maíꞌmaiꞌa úmae iyíyana íma tívón-kaíno.

³⁷mindáyavena Ísu Káráísitimo kumínímba amuꞌmaréna ména Áánútun-aai aúváí-kwandaaivimba agaimaréna sénasáwíyan-kanaa kwáyáimba pónatíníwai íma úwoi ména tíníye. agaimaréna siráiye. moórávaꞌa agaimaréna séna

³⁸kesí kwaásigo arupí umái máyáiwai keséaráápamai máyáimba póna inkaisénamo siyuwénamokówínaꞌo éꞌa íma aamoí umánkanaumne siráiye agaimaréna siráiye.

³⁹mináímbá siráimbanivo kesáámá inkaisésamo auwésamo kówésamo ánásanaaon-kwaasiraanta íya éta Áánútun-aaiyaveta áraire séta kwenkáꞌá agevamáíya méta kaweꞌá umáíya maíꞌmaita ónaumne.