Read Kosena Ípíru 12 Bible Online

Ípíru 12 - Kosena bible

Ípíru 12

¹miwí miráumai máyómbanivo kesáá maaráyá ónaumne. miwí Áánútun-aaiyavesa áraire siráawai torupamáímo máyómpimbo kesáá avumpinkáántá máyaunasaraanta Áánútun-aaiyavesa áraire sésa kwenkáꞌá agevamái máyón-amba kwéagaraasinkaawata mindáyaveta umbai-yántááꞌá ivátuweta kentáámó sáwí-imayaaomo tátokaimba ivátuweta kwaásimo isaaisésaraambo kwégwesaraambo mimbórá-ímáyáámó kwégwaraantemba Áánútumo agaráásínkarain-ampata íma sívón-káínata asiramáíya kónaumne.

²kwaásimo isaaisésaraambo kwégwesaraambo ayááíváꞌó kwáyáim-beyantavesamo imáyáamo ontembá Ísuntavetaawe suꞌmai imáyáaya onó. Ísu imáyáaya símakaisata Áánútun-aaiyaveta áraireya kwésunanaya imáyáaya kwésimimba póta Áánútuweya aráápamai maíꞌmaita úmaeta iyónaundayaawe. Ísu naaémbo arunkó aamoí ínín-imayaa éna póna taairaꞌó puwíníntavena íma aꞌáo séna taairaꞌó púwón-antavesamo tigaeyávésa kwéomba íma imáyáa éna póna Áánútu kawáá uráiwai ayáánúrapaꞌa asirayán-áyámpáꞌá maraꞌá máyáiye.

³Ísuntaveꞌa imáyáa oró. marapáꞌó máyonkaꞌo sáwí-kwaasi sáwíꞌo umánkávaꞌo íyúwanamo asiramáímo maimaénamo iráimba imáyáa éꞌa íma tívón-káínaꞌa íma ivátuweꞌa asiramái máéro.

⁴sáwí-yantaataveꞌa kárákwimaeꞌa kwéiyeꞌa asiramái máyáampinkemba íma tínkamowaꞌa pukáawe.

⁵Áánútu asiramátinkanintavena séna kesiyáámúmbaare kesáánimbaare ísáaro súwana agaimaréna siráin-aimba imáyáa oró. maarán-áímbá sénaÍsóigo arumbá tímakaiwai arupí kwéumatinkena kesáánimba owémó kwésiwaiyavena kesáái isáígwáe séna kwétinkamiye. mindáyavai kesááninkoo Ísóigo arupí umánkáimba íma úwoisan-tantaaꞌan iyé-ímáyáá éma sáwíꞌo uráanda asiramái simámakaimba enarunkó íma sáwíꞌa íno agaimaréna siráiye.

⁷umbai-yántááꞌó kentópaꞌo kwétimba Áánútu kaweꞌá kwéumatinkena kwená iyámpói owaná póna mirá kwéumatinkaiye. amápar-iyampoi kaweꞌá ónááontavesa miwí tinóvowi arupí kwéumatinkaawe.

⁸Áánútu amápaꞌa kwená iyámpói umbai-yántáápínkémbá arupí kwéumatinkaimba umbai-yántááꞌó kwáyáiwai Áánútuna iyámpóin-ovo umbai-yántááꞌó ímo kwáyáiwai óꞌowiti iyámpóin-owe.

⁹moórá-ainkwaraꞌa súnda ísáaro. marapákén-késívóisaiya arupí umásínkaraawata miwí táái iséta miráumai kwíyómpaken-kentaasivo áái iséta kaweꞌá umái méta minánón-áímbá miráyá onó.

¹⁰sáwíyan-kanaa marapákén-késívóisaiya miwítí imáyáavinkemba arupí umásínkáantaanivo Áánútu kaweꞌá umátinkanae séna kaweré suꞌmaiya umáíya ménaundayavenaya kwemó kaweꞌó umáímo máyáintemba miráyá ónaundayavenaya arupíya kwéumasinkaiye.

¹¹arupí kwéumasinkaindarata sirunkó umbaí kwétainata íya aamoí éta naaémba minúmbáí-yántáákó kaweꞌá umásinkaindarata minúmbáí-yántáákóná anondá paru umái kaweꞌá umái ménaumne. mirám-baaran-oro siráin-kwasai.

¹²miráumai kárákwiyeꞌa tiyáántán-kwimai méꞌa

¹³arupí-amba imáyáa umái kwáráaro. keinárawapinkemba évakarawai tuwánésa sáwí-amba kwáráavo séꞌa kaweꞌá umái méꞌa arupí-amba kwáráaro.

¹⁴tiyáántán-kwimai amáparawaiye paru umái máéro. ímo kaweré suꞌmai umáímo máyáawai Ísóigomba íma awánanaaovo kaweré suꞌmai umái máéro.

¹⁵keinárawapinkemba évakarawai Áánútu úwoi kwétuwaꞌnaa-iwaimba auwáúnavo séꞌa kárákwiyoro. keinárawapinkemba évakarawai tirunkó sáwíꞌa índarakemba misáwí-ímáyááó amápa-kwaasivimba kóyáwé iváínivo kárákwiyoro.

¹⁶sáwí-yantaataveꞌa tirááíyaveꞌa ováínivo kárákwiyoro. naaóváꞌá moóráwai áwíꞌa Íso Áánútuntavena íma imáyáa éna sáwíꞌo uráintemba keinárawapinkemba évakarawai mirá ováínivo kárákwiyoro. kwemá Áánútuntavena íma imáyáa kwéuwaimba moórá-tawai áái kwéankowana ávákontavena séna ená toómbá nasímínana mintónkóná anondá emá aivar-íyámpóí aúrénana kenkáísivowa kawe-kwááróꞌá tumánkaniye séna

¹⁷ména naaémba moórá-imayaa éna kesivo kawe-kwááróꞌá tumásinkainkwae séna anón-iviꞌa tówana avowámá ávákomba kawe-kwááróꞌá tumánkena póna kwembá íma tumánkowana ááémo sáwíꞌo uráin-tantaako avowámá kawe-kwááróꞌá tumánkanin-amba ítáraiye. keinárawapinkemba évakarawai mirá-sáwíꞌá ováínivo kárákwiyoro.

¹⁸naaóváꞌá Ísareri-kwaasi Sáínai-omar-andampaꞌa komáyówana anón-irama kwégena tinepáí kwégowasa uwaná anómba túnkuwana anón-unda torówana

¹⁹uwíremba anónkaꞌa aúꞌmai iyúwana aaigówé suꞌmai séna kwaásiye póíye maanómákáꞌó tíyaꞌo éꞌa óntandei tínkamiyasa puwónááowe súwasa mináímbó ísón-kwaasi táátavesa ésa sésa ókwaraꞌa moórá-aimba íma sínata isánáe sésa táátavesa ésa

²¹awánon-tantaaꞌa anómba táátavesa uwaná Mósesi séna sááte kéna siyántámbá taráiye siráiye. naaóváꞌá Ísareri-kwaasi mirán-tántááꞌá koawánaraavo keinárawaꞌa mirán-tántááꞌá íma kogwéawanaawe.

²²íma mirá éꞌa Áánútunopaꞌo tiráamba maarááníꞌa kwéowe. moórá-omako áwíꞌa Sáíyono-omapaꞌa téꞌa Áánútu asirayánkwáráwáíná naaópaꞌa téꞌa kwíyómpaꞌa aúná-naoꞌa Yérúsaremu-naokaan-daopaꞌa téꞌa kwíyómpaken-kwayoꞌnarawaꞌo sáwívaꞌo torupamáímo mésamo Áánútu áwíꞌo mósá marésamo aamoí kwéopaꞌa téꞌa

²³aivaꞌó Áánútunopaꞌo tésamo kwená kwaási-iꞌa umái máyáapaꞌa tiráawe. kwíyómpaꞌa aúváívimba miwí túwíꞌa agaimakáiye. Áánútu amáparawai miwímó máyáawaina ááintavena tísaa íníwainopaꞌa téꞌa marapáꞌó arupí umáímo máyówanamo Áánútumo kasenkuíꞌo umátínkaraiwai kwíyómpaꞌa miwí timantómbó máyáapaꞌa téꞌa

²⁴Ísunopaꞌa Áánútu aúná-aimbo simáímo tarúmakaimba kwéagaraasinkaiwainopaꞌa tiráawe. naaóváꞌá Kááini ávákomba Épeomba tuvuwúwana puwúwana kwená naaemá kumúwana mindáyavena anondá sáwí-meyamba amínkwáe siráimbanivo Ísuna naaemó kunkáimba kwaási kaweꞌá kwéumatinkaimba kwenópaꞌa tiráawe.

²⁵Áánútu keinárawatavenamo aaimó sínda-aimba íma araaiséꞌa kárákwiyoro. naaóváꞌá Mósesi marapáꞌá ména Áánútun-aai simátimuwasa arááíraawai sáwí-meyamba mairáawe. miráumaimo kwíyómpakewaimo simátiminda-aintaamo araaisénááowai áraiꞌa sáwí-meyamba mayánááovo kárákwiyoro.

²⁶naaóváꞌá Áánútu Sáínai-omapinkemba aaí súwana anóm-barima taráimbanivo ívéꞌa asiramái séna moórá-kanaa tínímba ókwaraꞌa anóm-barima taaó senaná kwíyónkowe maraówé anóm-barima táníye siráiye.

²⁷ókwaraꞌa anóm-barima taaó sénaumnemo siráin-ainkona ááimba maarán-iye. marímo tánín-tantaaꞌa naaóváꞌó tarórurain-tantaaꞌa póna ánásanivo maríma ímo kanaán-umai táínda-yantaaꞌa kwaíkwaiꞌa íníye.

²⁸miráumai marímo tánímba Áánútu kentááráꞌá kárákwiraimba póna íya siyuwánímba póta sirunkó kaweꞌá ínata aamoí éta kwentávéta éta kwenáwíꞌa mósá maréta kwená imáyáa mósá máráandayavenaya aamoí íníye.

²⁹kankambó aúꞌmaimo iravímbó agaisúwáantemba Áánútu mirá ínata póta kwená imáyáa mósá maréta ménaumne.