Read Kosena Ípíru 3 Bible Online

Ípíru 3 - Kosena bible

Ípíru 3

¹kesí kwaásiyono. súnda-aintaveꞌa Ísumpaꞌa imáyáa úmae íyóro. Áánútu keinárawaꞌa kwendéí-íꞌa umátínkarain-kwaasiyavena séna kwíyómpaꞌa kesé ménaaowe súmba ísaraavo Ísuntaveꞌa imáyáa úmae íyóro. Áánútu kwembá aiꞌmarówana marapáꞌá kumbéna árair-aintavetaamo árairemo súnda-ainkata kárákwiraiwai éna aivaꞌ-mónó-káwáánákó isaꞌá kwentávéꞌa imáyáa úmaeꞌa íyóro. aivaꞌ-mónó-káwáánákóná mayáí

²mimbáyáí mayáíndayavena Áánútu Ísumba usásinankowana íma ivátuwena mimbáyáí kaweꞌá umái kwémayaiye. naaóváꞌó Mósesimo Áánútuna kwaásivimbo mayáímó ímo tuwénamo kaweꞌó umáímo mairáintemba Ísu mirá uráiye.

³naambá kaweꞌ-námbán-iye siráavo mindámbó uráin-kwaasigo áwíꞌo mósá kwémaraantemba Mósesi kaweꞌ-máyáí-kwáásímán-ivo Ísu áwíꞌa mósá maráúndaya kwéusayaaitaiye.

⁴amápaꞌ-nambo kwaásimo kwéomba mindágwara kwaásigwara amápa-tantaakwaraꞌa Áánútu úmakaiye.

⁵Mósesi Áánútuna mayáí-kwáásígó éna Áánútuna kwaásivimba mimbáyáí íma tuwéna kaweꞌá umái kwémaena Áánútumo sínda-yantaaꞌo paárinimba simátímakaiye.

⁶Mósesi mirá uráimbanivo Ísu Káráísiti íma mayáí-kwáásígómán-ivo Áánútu ááninko úramba póna Áánútuna kwaásiraꞌa kárákwiyimba íma ivátuwaimba kaweꞌá umái kwémayaiye. Áánútun-aaiyavetaamo áraire sétaamo aamoimó étaamo asiramáímo amuꞌmarétaamo métaamo éta Áánútuna kwaási-ita ónaumne. Áánútuna kwaási kwenópaꞌa koagándaan-kwasai.

⁷mindáyavena naaóváꞌá Áánútun-amanko kentáá síkwáꞌnáyontavena siráin-aimba imáyáa oró. maará sénaívéꞌa Áánútumo kwésimatimin-aimba ísáaro.

⁸naaóváꞌó Áánútun-aaimo arááísúmbo tiruntémo makáantemba kemá mirá ováínivo kwenáái ísáaro. kavóná-maravaꞌa mésa kentíkwáꞌnáma mirá kwéesa Áánútumba kwembásínkáánkáí ésa sáwí-mayai maésa kwenáái arááíraawe.

⁹ayáátáákaꞌa 40 ima kentíkwáꞌnáma túwaꞌnaa uráunda-mayai awánaraambanivo kesáái araaisésa kembásínkáánkáí ésa sáwíꞌa umásínkáantaveꞌa

¹⁰áwááꞌa tiyéꞌa séꞌa miwítí imáyáa sáwíꞌa úmae iyésa agaráátinkaunda-amba íma kwáráawe séꞌa

¹¹áwááꞌo tiyúnda asiramái séꞌa kesópaꞌa íma tésa kesé taagándanaaowe siráumne Áánútun-amanko siráiye.

¹²kesí kwaásiyono. Áánútun-amanko mináímbá siráintavai kárákwimai kaweꞌá oró. keinárawapinkemba évakarawai sáwí-imayaa kwéesa Áánútun-aaiyavesa íma áraire sésa Áánútu asirayánkwáráwáímbá tínaaemba umámévainivo kárákwimai kaweꞌá oró.

¹³keinárawapinkemba évakarawai sáwí-imayaa íyana minímáyááó kampaꞌá simátiyuwainasa Áánútuntavesa íma imáyáa ésa tirunté máráavainivo moórá-morawai kentí imáyáa asiramátínkáaro. kentí kanaamó kwáyáinkaꞌa mirán-oro.

¹⁴aivaꞌá Áánútumpata imáyáaya ówándaraꞌa kentáásí imáyáao asirayámbá póta miráumaimo maíꞌmaiꞌo étaamo éta Ísu Káráísitiye tarúmai méta marapáꞌá máyaunda-kanaaya ánásaindaraꞌa asiramái ménaundayaaniye.

¹⁵Áánútun-aai aúváí-kwandaaivimba agaimaréna sénaívéꞌa Áánútumo kwésimatimin-aimba ísáaro. naaóváꞌó Áánútun-aaimo arááísúmbo tiruntémó makáantemba kemá mirá ováínivo kwenáái ísáaro. agaimaréna siráiye.

¹⁶súnda-kwaasi nááwiya Áánútun-aai kwéisesawa arááíraanaꞌiyo. kentáá síkwáꞌnáma Ísípi-maravakemba Mósesi ayútiyuwena tíꞌmaena tiráiwai miwí Áánútun-aai kwéisesa arááíraawe.

¹⁷nááwiya ayáátáákaꞌa 40 iraꞌa Áánútu áwááꞌa tíkaiyo. kavóná-maravaꞌo mésamo sáwíꞌo kwéesamo pukáawai miwíyávéna áwááꞌa tíkaiye.

¹⁸nááwiyavenawa asiramái séna kesópaꞌa íma tésa kesé taagándanaaowe siráiyo. kwenááimo ímo ísámaimo kaweꞌó uráawaiyavena siráiye.

¹⁹kwenááiyavesa íma áraire sésa kwenkáꞌá íma agevamái máyomba pósa íma kanaán-umai kwenópaꞌa kwésa kwesé koagándaraan-ainta ísaraumne.