Read Kosena Ípíru 4 Bible Online

Ípíru 4 - Kosena bible

Ípíru 4

¹kentááyávéna Áánútu séna kesópaꞌa taagándanaaowe simái tarúmakain-aimba kwáyáimba póꞌa keinárawapinkemba évakarawai séꞌa kwenópaꞌa kwéꞌa kwesé koagándanaumne-kanaa matukéꞌa arávasuwaiyavainivo kárákwimai kaweꞌá oró.

²Áánútuna kawer-áímbó ísaraundantemba ááéma kentáá síkwáꞌnáma ísaraambanivo úwoi tááre suꞌmai isésa íma áraire sésa tirumpimbá tátorowana póna mináínkó íma túwaꞌnaa uráiye. mindáyaveꞌa keinárawapinkemba évakarawai séꞌa Áánútunopaꞌa kwéꞌa kwesé koagándanaumne-kanaa matukéꞌa arávasuwaiyavainivo kárákwimai kaweꞌá oró.

³naaóváꞌá Áánútu kwíyóne marawé tarórumai ánásena agándarain-kanaa kwáyáimbanivo kwenááiyavesa íma áraire sésa kwenkáꞌá agevamái méraawaiyavena sénaáwááꞌo tiyúnda asiramái séꞌa kesópaꞌaíma tésa kesé taagándanaaowe siráimbanivo kwenááiyaveta áraire séta kwenkáꞌá agevamái máyaundawaiya kwenópaꞌa kwéta kwesé koagándanaundayaaniye.

⁴Áánútun-aai aúváí-kwandaaivimba kwesé koagándanaundayavenaya agaimaréna sénaÁánútu avaꞌmoraé-kanaa mayáí maimáiánásasuwena avakaeté-kanaa agándaraiye agaimaréna siráimba póna agándai-kanaa kwáyáimbanivo

⁵Áánútun-aai aúváí-kwandaaivimba agaimaréna sénakesópaꞌa íma tésa kesé taagándanaaowe siráimba póna

⁶agándai-kanaa toꞌmayaa úmakaimba pósa évaka-kwaasi kwenópaꞌa kwésa kwesé koagándanaaowe. aivaꞌá Áánútun-aai ísaraawai íma áraire siráamba pósa kwenópaꞌa íma kwésa kwesé agándaraawe.

⁷sáwívar-ima maisuwéna Áánútu moórá-kanaama maréna séna minkánáá tíníye séna Tévítimba simámuwana Áánútun-aai aúváí-kwandaaivimba agaimaréna sénaívéꞌa Áánútumo kwésimatimin-aimba ísáaro.tirumbó makáanteniꞌa íma éꞌa kwenáái ísáaro agaimaréna siráin-aimba kaekáꞌá mináímbá agaimái simátimumpo ísáaro.

⁸naaóváꞌá moóráwai áwíꞌa Yósúwa tíꞌmaena kawer-áyámpáꞌá mátinkomba mináyámpáꞌó Áánútumpaꞌo agándai-ayampaꞌo kwáyonkakai naaémba Áánútu íma moórá-kanaama maréna séna agándanaaon-kanaa tíníye íma siráisino.

⁹Áánútu kwená mayáí ánásasuwena agándai-kanaa makáimba pósa kwená kwaási agándaan-kanaa kwáyáiye.

¹⁰Áánútumo kwená mayáímó ánásasuwenamo agándaraintemba Áánútunopaꞌa kwésa kwesé agándaawaima miwígwáráꞌá mayáí ánásasuwesa agándanaaowe.

¹¹mindáyaveta Áánútunopaꞌa kwéta kwesé agándanaundayaveta siyáántámba kwimáíya mayáíyá kwémayaundaya miráyá onó. kentáá síkwáꞌnáma uráantemba mirá-sáwíꞌá únavaiyaanivo kwenáái ísámai kaweꞌá éta kárákwimai kawer-íyataao.

¹²Áánútu máyáiwai isaná kwenááigo mayáí kwémayaiye. évarevar-ayampaꞌa áwáima táíꞌmatan-tusuwaaineimo póímo kárámaimo túwínkaaꞌo ontembá Áánútun-aaigo kentáásirumpinken-imayaa sáwí-imayaawe kawer-ímáyááwé taaímbaraisata kwéawanaumne. sirááímo tain-tántááré kwésunanaya Áánútun-aaigo taaímbaraisata sáwí-yantaare kawe-tántááré kwéawanaumne.

¹³kwíyómpare marapáré amápa-tantaaꞌa Áánútu aúrankaꞌa íma kwéauyoraivo kwíyómpare marapáré amápa-tantaaꞌa avoraꞌá kwáyáísana kwéawanaiye. kwemá mirá iwáí póna kesáá máyaundawaina ááinta sísaa ínata simámenaundayaaniye. Áánútun-aai aúváí-kwandaaivimba súnda-aimba mirán-áímbá kwáyáintaveta kentáá síkwáꞌnámo uráantemba mirá-sáwíꞌá únavaiyaanivo kwenáái ísámai kaweꞌá éta kárákwimai kawer-íyataao. Ísuma aivaꞌ-mónó-káwáánáꞌán-iye kwaasái.

¹⁴Ísu Áánútu ááninko kentáásí anóndako éna aivaꞌ-mónó-káwáánákó póna kwíyómpaꞌa Áánútuwe uména kentáá súwaꞌnaa enaya kwéaisaa-imba póta kwenááiyaveta áraire siráundayaveta ívéta mináímbá asiramáíya tátoraano.

¹⁵kentáásí aivaꞌ-mónó-káwáánákó marapáꞌá máyonkaꞌa amápa-tantaatavesa sáwí-aimbo sínda isánáe sésa áísaa úmaesa kwéiyumbanivo íma sáwíꞌa uráimba póna kentááyávésamo sáwí-aimbo síyambo isánáe sésamo ombá kentáávímbá íma asirayámbá kwáyáísana kwemá suwánénaya aruntá kwéumasinkaiye.

¹⁶mindáyavena kentáávímbá umbai-yántááꞌá kwáyaindaraꞌa íma sáátaveta kwéonanaya Áánútu úwoi kwésuwaꞌnaa-iwainopaꞌa konanayá aruntá umásinkenaya úwoiya súwaꞌnaa íníye.