Read Kosena 1 Pítaa 2 Bible Online

1 Pítaa 2 - Kosena bible

1 Pítaa 2

¹aúnáiꞌa umái máyáamba póꞌa sáwí-yantaakomba tínaaemba umásuweꞌa íma kampaꞌá séꞌa íma kaumbo-káér-imayaa éꞌa kaweꞌ-máyáímó kwémayaiyantavena kentirunkó íma simái sáwíꞌa umátinkainaꞌa túwíkwaraꞌa íma simái sáwíꞌa umátinkeꞌa máéro.

²umarambó náántavenamo tínkáíntemba Áánútuna kawer-áíntávéna mirán-umai táái tinkáíno. Áánútun-aai toónkáámbá kwéneꞌa táákaevayan-kwaasiraamba umái méꞌa Áánútuna aambá kwaꞌmaéꞌa íyóro.

³Ísóigo kaweꞌá umátínkarainaꞌa miráumai méꞌa Áánútuna aambá kwaꞌmaéꞌa íyóro.

⁴naaóváꞌá monoꞌ-námbá óntandei urónkaꞌa ávonkaan-ontamba awánésa úwoi-ontamban-iye sésa tukáawe. miráumai Ísumba Áánútu kaweꞌnáꞌán-iye séna ítámakaimba awánésa áúkaawe. kwemá ávon-ontankaamban-ivo kwenópaꞌa teró.

⁵óntandeimo naambó ontembá Áánútu keinárawaꞌnei kwená naankáámbá úmarena keinárawate méniye. kwená mayáí-kwáásí éꞌa kwená mayáíyé suꞌmai kwémayaiyana Ísu Káráísiti túwaꞌnaa ínímba póna Áánútu kentí mayáíyávéna aamoí íníye.

⁶mindáyavena naaóváꞌá Áánútun-aai aúváívimba agaimaréna sénaÁánútu séna kawer-óntámbá ítámareꞌa naambó asiramáímo kwaíkwaiꞌo íníntaveꞌa Sáíyono-naopaꞌa ávonkaan-ontamba makáumne. óntantavenamo siráintembo íníwaimpaꞌo agevamáímo ménaaowai íma tigaeyávésa ónááowe siráiye mináímbá Ísu Káráísitintavena simái agaimakáiye.

⁷Áánútun-aaiyaveꞌa áraire séꞌa kwenkáꞌá agevamái máyáawai minóntánkó anómban-iye kwésevo Áánútun-aaiyavesa íma áraire kwésewai minóntánkóntávésa íma mirán-áímbá kwésewe. mindáyavena Áánútun-aai aúváívimba agaimaréna sénaóntan-damba on-kwáásí moórá-ontantavesa sáwíꞌa kwéiye sésa maisukáawe. aáno minóntánkó ávonkaamba uráiye agaimaréna siráiye.

⁸moórávaꞌa agaimaréna sénaminóntánkáꞌá tísamaimaturarésa tanaambá vánááowe agaimaréna siráiye. tanaambó vaantembá Áánútun-aai araaisésa miráumai tanaambá kwévaawe. ááéma íma mirá uráankaꞌa Áánútu séna mirá ónááowe siráinkaꞌa pósa miráumai tanaambá kwévaawe.

⁹miwí Áánútun-aai arááíráavo íma mirá éꞌa mimbórá-ándá-kwáásíráámbá éꞌa Áánútu ítámakain-kwaasi éꞌa anóndakona monoꞌ-máyáí-kwáásí éꞌa Áánútundei-iꞌa umátínkarain-kwaasi owaná Áánútu túnkwiyan-ayampakemba kwená ságayan-ayampaꞌa mégwétinkaisaꞌa óꞌoran-kaweꞌ-mayai máyáin-aimba kosimátímaꞌmae naaónááontavena ítámakaiye.

¹⁰ááéma íma Áánútuna kwaási-iꞌa uréꞌa ívéꞌa kwená kwaási-iꞌa owaná ááéma íma arumbá umátínkaraimba isaná ívéꞌa arumbá kwéumatinkaiye. Áánútuna mayáí-kwáásín-owe kwaasái.

¹¹kesí kwaásiyono. óꞌom-baravaken-kwaasi póꞌa marapáꞌá kwááyu méꞌa mindáyaveꞌa marapá-tántáátávésa tirááíyavesamo kwéomba tínaaemba umátimeꞌa ímo tínaaembo umátimiyanamo éna mintántáákó tavisimái kentí imáyáa sáwíꞌa umátinkaniye.

¹²Áánútunopaꞌo ímo tiráán-kwaasivimba méꞌa kaweré suꞌmai úmae iyíyasa sáwíꞌa kwéowe suwááesa kentí kaweꞌ-máyáí tuwánésa pósa Áánútuma marapá-kwáásíyávéna imáyáa índa-kanaavimba kogwantésa kwenáwíꞌa mósá maránááowe.

¹³Ísóigonataveꞌa imáyáa éꞌa marapáꞌó kárákwiraan-anon-kwaasi tísamaivimba áíkwiyeꞌa aivaꞌó kárákwiraiwai aísamaivimba áíkwiyeꞌa

¹⁴kwemó usásintinkaraiwai tísamaivinkwaraꞌa áíkwiyoro. sáwíꞌo kwéowai sáwí-meyamba timésa kaweꞌó kwéowai kawer-áímbá simátimenaaontavena usásintinkaraiwai mindáyaveꞌa tísamaivinkwaraꞌa áíkwiyoro.

¹⁵Áánútu maarámó ónááontavena arááíma kwétaiye. kaweꞌó íyasamo ésa sáwí-imayaavinkembo úwoi-aimbo kwésewai táái kentí kaweꞌ-máyáígó itáníye.

¹⁶Áánútu kentí sáwí-imayaago tátokaimpinkemba iyátínkaraisana póna íma tátokaisaꞌa méꞌa miráumaimo máyáamba íma aúpáꞌá sáwíꞌa kwéeꞌa Áánútuna mayáí-kwáásí póꞌa kwemó sinteníꞌa kwéeꞌa

¹⁷amáparawaiyaveꞌa imáyáa éꞌa Áánútuna kwaási kentí kwaásivimba kentirumbá kwétimeꞌa Áánútu áároi kwéinkaiseꞌa méꞌa marapáꞌó kárakwiraiwai áái mósá máráaro. Ísumo uráinteniꞌa mirán-oro-kwasai.

¹⁸mayáí-kwáásíyóno. kentí anón-kwaasi táái iséꞌa síyanteniꞌa mirán-oro. íma kawer-ánón-kwáásí tááiye suꞌmai iséꞌa túwáávitemo íyan-anon-kwaasi tááigwaraꞌa ísáaro.

¹⁹keinárawaꞌo ímo sáwíꞌo íyasamo umbai-yántááꞌó úwoimo timíyaꞌo Áánútuntaveꞌa imáyáa éꞌa asiramáímo méwanamo éna Áánútu kaweꞌá umátinkaniye.

²⁰ánivo sáwíꞌo íyasamo tínkamiyambo aánoumaimo méwanamo éna Áánútu kentúwíꞌa íma mósá maráníye. ánivo kaweꞌó íyasamo tínkamiyaꞌo asiramáímo méwanamo éna Áánútu kaweꞌá umátinkaniye.

²¹Ísu Káráísitimba áíꞌa úniꞌa umánkaraamba keinárawatavena imáyáa éna asiramái ména mirán-ámbá agaráátínkaraimba póꞌa mirán-oro. mirá ónááontavena Áánútu tááyaraiye.

²²Áánútun-aai aúváívimba agaimaréna sénaíma kampar-áímbá séna ímasáwí-aimba simbá ísaraawe Ísuntavena mináímbá agaimaréna siráiye.

²³simái sáwíꞌa umánkowana anondá íma sáwíꞌa umátinkowasa áíꞌa úniꞌa umánkowana anondá sáwí-meyamba mayánááowe íma simátimena arupí umai-meyambo timíníwaina imáyáa asiramái uráiye.

²⁴Ísu Káráísiti sáwítaamo uráunda-meyamba maimaéna taairaꞌá pukáiye. sáwíꞌo kwéundaya sínaaemba umámeta arupí umáíya ménaundayavenaya pukáiye. kwenáúmo sáwíꞌo umánkaraantavena póna kentáá kaweꞌá umásínkaraiye.

²⁵keinárawaꞌa uwóváguraawana tíꞌmaena tisaꞌá keinárawakaꞌa kárákwiraiwaina aampaꞌá kwégwaraawe.