Read Kosena 1 Pítaa 3 Bible Online

1 Pítaa 3 - Kosena bible

1 Pítaa 3

¹aaraiyónó maarán-oro. kentuwaiꞌmáá táái ísáaro. kentuwaiꞌmáápinkemba évakarawai Áánútun-aaiyavesa íma áraire kwésesa máyáawai kembá tuwánésa Áánútumpaꞌa ténááontaveꞌa kaweꞌá umái méwasa tuwánésa Áánútun-aaiyavesa áraire sénááowe. íma ayáátáár-aimba séꞌa Áánútuntaveꞌa imáyáa éꞌa kaweꞌá umái méwasa tuwánésa Áánútun-aaiyavesa áraire sénááowe.

³kwaási arááꞌa súrampimba sivúwóvo séꞌa íma konaarirí éꞌa kawer-únánkwátói konaariríyávéꞌa íma anón-imayaa éꞌa

⁴paru umái kentirunkó kaweꞌó ínímba íma ááéma ánásainana mindá Áánútu aúrankaꞌa kaweꞌán-iye.

⁵naaóváꞌá aaraí Áánútuntavesa imáyáa ésa kwemó toꞌmayaa umátínkaron-tantaaꞌa amuꞌmarésa máyón-inimba miwí tuwaiꞌmáá táái isésa kaweꞌá umái maémáembaniye.

⁶minínímpínkémbá moórá-ininko áwíꞌa Séraa awaikó áwíꞌa Ááváramu úwana kwenáái iséna kesí anóndakoma óne siráiye. kaweꞌó éꞌo ímo amápa-tantaataveꞌo táátaveꞌo éꞌo éꞌa kwenayáámúmbaariꞌa ónááowe.

⁷miráumai kwaaimó éꞌa maarán-oro. kentuwainímbááꞌa kaweꞌá umátinkeꞌa miwí túma íma asiramái kwáyáintaveꞌa imáyáa éꞌa túwaꞌnaa oro. keináraware kentuwainímbááre aúnáiꞌa umái ménaaontavena Áánútu kaweꞌá kwéumatinkaivo mindáyaveꞌa kaweꞌá umátínkáaro. mirámó íyanamo éna moórá-umbai-yantaako kentí námúnaa-ampimba íma itáníye. mimbórá-ímáyáán-oro-kwasai.

⁸moórá-aimba ísáaro. kentúma íma maimaé iyéꞌa mimbórá-ímáyáá éꞌa keáváráwáínóndaamo imáyáamo ontembá moórá-morawai mirán-imayaa éꞌa túwaꞌnaa oro.

⁹sáwíꞌo umátinkaiyaꞌo éꞌa anondá íma sáwíꞌa umátínkáaro. sáwí-aimbo simátinkaiyaꞌo éꞌa anondá íma sáwí-aimba simátínkáaro. sáwíꞌo íyawai anondá kaweꞌá umátínkáaro. Áánútu tááyonkaꞌa kaweꞌá umátinkaumne siráimba póꞌa kaweꞌá umátínkáaro.

¹⁰mindáyavena Áánútun-aai aúváívimba agaimaréna sénaévakarawai ayáátáákaꞌa sirunkó kaweꞌá ínaꞌa ménae sésamo ésa kampar-áíné sáwí-aine

¹¹sáwíꞌo kwéon-tantaare tínaaemba umámesa kaweꞌá ésa paru umái ménaaontavesa tiyáántán-kwimai máéro.

¹²Ísóigo arupí umáímo máyáawairaꞌa kwégarakwiyena miwítí námúnaa kwéisena túwaꞌnaa ena sáwíꞌo kwéowai ánaaemba kwéumatimiye agaimaréna siráiye.

¹³kemá tiyáántán-kwimai kaweꞌá kwéomba pósa íma sáwíꞌa umátinkanaaombanivo

¹⁴arupí umái máyáambo umbai-yántááꞌó timíyanamo éna Áánútu kaweꞌá umátinkanivo minúmbáí-yántáátávéꞌa íma anón-imayaa éꞌa minúmbáí-yántááꞌó timínín-kwaasiyaveꞌa íma táátaveꞌa éꞌa

¹⁵Ísu Káráísitintaveꞌa kawer-ímáyáá kwéeꞌa kwentávéꞌa séꞌa kweyáá Ísóigoman-iye síyasa tísaa esamo sésamo Áánútuntaveꞌo imáyáamo ombá nóra simáíya kwéoo síyaꞌo éꞌa kawer-áímbá simátimenaaontaveꞌa toꞌmayaa umái méꞌa

¹⁶kaweꞌá umái kwempakémbá simátíméro. kentirunkó íma kaeꞌnáéꞌa éna arupí umái kwaínaꞌa Ísu Káráísitimpaꞌa aráápamai arupí umáí máyaiyasa évakarawaimo simáímo sáwíꞌo umátinkaiyambo ésa miwí tááigo toséꞌmái tigaemá íníye. mirá ónááontaveꞌa kárákwiyoro.

¹⁷kaweꞌó kwéombo Áánútumo ímo ítátinkainasamo ésa umbai-yántááꞌó timénááomba mindá Áánútundein-iye. ánivo sáwíꞌo kwéombo umbai-yántááꞌó timénááomba mindá kentí ááinkoman-iye.

¹⁸miráumai ímo arupí umáímo máyáawai Áánútunopaꞌa kónááontavena Ísu Káráísiti arupí umái máyáiwai mimbórá-táwai puwéna mimbáyáímá ánásaraiye. kwenáúgo pukówana amankó ména

¹⁹évakarawai timankó ándáraambo kwímai máyómpimba kwenáái kosimátímakaiye.

²⁰naaóváꞌá moóráwai áwíꞌa Nówaa ména non-avóvomayaapaꞌo kwínín-damba úmakonkaꞌa Áánútu kesáái ísáaro séna timuꞌmarówasa kwenáái arááísúntavesa pukówana naaémba Ísumo puwú-tawai miwí timankómbá kwenáái kosimátímakaiye. avakaumboé-kwaasi non-avóvomayaapaꞌo kwínín-daumpaꞌa umáyówana miwí nonkó íma nawíkowasa íma puwésa kaweꞌá umái maémáembaniye.

²¹mindónkómó uráinten-umasitaiꞌa monoꞌ-nómbá kwévetinkaawana Áánútu tíꞌmai kawepáꞌá mégwétinkaiye. nombó kwévetinkaamba paáká-kúrákémbá íma kwésese ovo Áánútumba áísaa owaná tirumpimbá íma aaí kwaíndayavena sáwí-imayaa maitiyuwáníye. Ísu Káráísiti pukáimpinkemba usásinkaintavena sáwíꞌo umáímo máyáampinkemba tíꞌmai kawepáꞌá mégwétinkaiye.

²²Ísu Káráísiti pukáimpinkemba usásinena Áánútu ayáánúrapaꞌa asirayán-áyámpáꞌá uména kwíyómpaken-kwayoꞌnaraware anóndaraware asirayándáraware miráumainarawakaꞌa kwégarakwiyiye.