Read Kosena 1 Pítaa 4 Bible Online

1 Pítaa 4 - Kosena bible

1 Pítaa 4

¹Ísu Káráísiti áíꞌa úniꞌa umánkówana asiramáímo imáyáamo uráintemba keinárawakwaraꞌa asiramái imáyáa oró. túraꞌo tíꞌo úniꞌo umátínkówai miwímó sáwíꞌo ónááon-imayaago íma tátokaiye.

²marapáꞌó máyáamba sáwí-imayaayaveꞌa tirááíyaveꞌa íma kwéeꞌa Áánútuna imáyáavinkeniꞌa oró.

³Áánútunopaꞌo ímo tiráán-kwaasimo kwéontemba keinárawakwaraꞌa mirá uráavo ívéꞌa íma mirá kwéowe. ááéma maarán-umai áwáyo-tantaaꞌa kwéeꞌa sáwí-imayaayaveꞌa tirááíyaveꞌa kwéeꞌa uwoꞌaóꞌ-nómbá kwéneꞌa uwoꞌaóꞌá kwéeꞌa toómbá námae kwéiyeꞌa uwoꞌaóꞌ-nómbó kwéneꞌo uwoꞌaóꞌó ónááontaveꞌa torupamái méꞌa kígaumo umándanaao sumpur-áínkón-ááima mósá maréꞌa kwaántá-kwaasiyonti imáyáa mósá maréꞌa mirá uráambanivo

⁴ívéꞌa íma miwísé torupamái méꞌa mirá-sáwí-yántááꞌá íma owasá tuwánésa sésa ívéꞌa nóra séra íma mirá kwéoo simái sáwíꞌa kwéumatinkaawe.

⁵Áánútu toꞌmayaa umái ména pukén-kwaasigwara túvamaimo mén-kwaasigwaraꞌa miwímó máyáawaina ááimba tísaa ínasa simámiyana miwítí meéyámbá timíníye.

⁶marapáꞌó máyónkaꞌo uráam-beyamba mairésamo pukáawai Áánútumo máyáintemba miwí timankómó miráumaimo ménaaontavena Ísu Káráísiti kwenamankó kwená áséi-kwasai púwún-kwaasi kosimátímakaiye. Áánútu mayáígóná asirayámbá tímakain-kwasai.

⁷amápa-tantaaꞌa ánásanin-kanaa sáwíyankaꞌa tínímba póꞌa námúnaa símaeꞌa kwéiyon-aimpimba kawer-ímáyáá umái kárákwiyoro.

⁸moórá-morawaivimba kentirumbá timí-timi kwéeꞌa mirámó éꞌo éꞌa sáwíꞌo umátinkanaaomba mirá-sáwí-yántáátávéꞌa íma anondá ónáe-imayaa éꞌa

⁹namu-kwaasímó tíyamba naambá toómbá timéꞌa íma íꞌái simátínkáaro.

¹⁰kaweꞌá umátinkanaaontavena Áánútu moórá-mora-kwaasi óꞌon-oꞌom-bayaigona asirayámbá tímakaimba póꞌa íma úwoi maéꞌa minásíráyándéí moórá-mora-kwaasi túwaꞌnaa oro.

¹¹Áánútun-aai kwésimatimewai mináín-úramba arupí umái simátíméro. kwétuwaꞌnaa-owai Áánútu kwétimin-asirayandei túwaꞌnaa oro. Ísu Káráísiti kwétuwaꞌnaa-isaꞌa mirá kwéeꞌa mindáyaveꞌa amápa-tantaataveꞌa Áánútu áwíꞌa mósá kwémaraawe. Áánútu áwíꞌa anómba kwaíkwaiꞌa kwéisana kwená asirayánkó mirámó kwéimba mindá árair-aimban-iye. Ísumbo umánkaraantemba kembá tíꞌa índaiꞌa ónááon-kwasai.

¹²kesí kwaási kentí imáyáa kwéunda-kwaasi owaná kentópaꞌa anón-umbai-yantaaꞌa timbá minúmbáí-yántáápímbá méꞌa mindáyaveꞌa íma táátaveꞌa éꞌa séꞌa óꞌoran-tantaaꞌa kesópaꞌa tiráiye íma seró. Áánútuwema asiramáíya máyáantavaiyaꞌi. íya asiramáíya máyáantavaiyaꞌiyo. minúmbáí-yántááꞌá kentópaꞌa kwétiye.

¹³Ísu Káráísitimbo áíꞌo úniꞌo umánkóntemba keinárawaꞌa tíꞌa úniꞌa umátínkaraamba póna kentirunkó kaweꞌá ínana Ísu Káráísiti ságayankwaraꞌa kumíndaraꞌa kentirunkó anón-kaweꞌa íníye.

¹⁴Ísu Káráísitina kwaásima ontávésamo simáímo sáwíꞌo umátinkanaaombo éꞌa íma imáyáa íyana kentirunkó kaweꞌá éna Áánútun-amanko óꞌoran-amanko keinárawate máyáintavena kentirunkó kaweꞌá íníye.

¹⁵keinárawapinkemba íma moóráwai kaekó kwaási tinkámbai puwésa íma umóyámbá ésa íma óꞌon-oꞌon-tantaaꞌa sáwíꞌa ésa íma aosaambá kwiyésa mirámó íyawaimo ésa sáwí-meyamba mayánááovo

¹⁶Ísu Káráísitina kwaási-iꞌo onkákémbó umbai-yántááꞌó timíyaꞌo éꞌa íma táátaveꞌa oró. miwí tirunkómó sáwíꞌo kwéinasamo Káráísitina kwaási owémó kwésiyamba Áánútumpaꞌa súwi seró.

¹⁷Áánútu amáparawaimo máyáawaina ááimbo tísaa ínín-kanaamo tínímba aivaꞌá kwená kwaásiya sísaa ena kentáámó umbai-yántááꞌó siménamo énaya kwená áséi-kwasaimo arááíráan-kwaasi anón-umbai-yantaaꞌa timíníye.

¹⁸mindáyavena Áánútun-aai aúváívimba agaimaréna sénaÁánútu arupí umái máyáawaima sáwí-imayaavinkemba tíꞌmai kawepáꞌá métínkáimba mindá umbai-máyáímán-ivo Áánútuntavesamo ímo aamoimó ésamo sáwíꞌo kwéowai miwí sáwíꞌo umáímo máyáampimba miráumai sáwíꞌa umái ménaaowe agaimaréna siráiye.

¹⁹miráumai Áánútu kwená imáyáavinkemba séna umbai-yántááꞌá kentópaꞌa tíníye siráin-kwaasi kaweꞌá úmae kwéiyeꞌa Áánútunkaꞌa agevamái máéro. Áánútumo taróruraiwai éna sinteníꞌa iwáí kwégarakwiyivo kwenkáꞌá agevamái máéro.