Read Kosena 1 Pítaa 5 Bible Online

1 Pítaa 5 - Kosena bible

1 Pítaa 5

¹kemá Ísóigona kwaásiraꞌa kárákwiraundawai únaꞌa keinárawate Ísóigona kwaásiti anón-kwaasi simátíménda ísáaro. Ísu Káráísitimbo áíꞌo úniꞌo umánkaraamba kesúrandei awánéꞌa kwemó ságayankwaraꞌo kumíndaraꞌa miságáyámpímbá ménaumpo

²monor-ánón-kwáásí simátíménda ísáaro. sipisípiraꞌo kárákwiraawaimo kaweꞌó ontembá miráráán-umai Áánútumo kwená kwaásimo tímakaiwairaꞌa kárákwiyoro. íma kárákwiyonae síyampinkembo kárákwiyeꞌa Áánútumba arááíma táíndaiꞌa umái kárákwiyoro. óntamba mayánáe-imayaa íma éꞌa túwaꞌnaa ónáe-imayaa éꞌa mimbáyáíráꞌá kárákwiyoro.

³Áánútumo tímakain-kwaasiraꞌa kárákwiyomba íma móruna tiyuwéꞌa kaweꞌó umáímo mémba tuwánésa keinárawaꞌo ontembá mirá ónááowe.

⁴aivaꞌó kárákwiraiwaimo kwíyómpakembo kumíndaraꞌa keinárawaꞌa usáyaaitaraawaiti óꞌoran-kaweꞌ-meyamba timínana íma ánásena kwaíkwaiꞌa íníye.

⁵ívé-kwaasi kentí anón-kwaasi táái ísáaro. amáparawai kentúma íma maimaé iyéꞌa moórá-morawai túwaꞌnaa umai máéro. mindáyavena Áánútun-aai aúváívimba agaimaréna sénaÁánútu kentúmo maimaé kwéiyowai kwétuwentayuwaivo kwenaísamaivimba kwémaewai kwétiravayaiye agaimaréna siráiye.

⁶mindáyaveꞌa Áánútu asirayáwáí aúrankaꞌa kentúma íma maimaé iyíyana kwemó imáyáamo índa-kanaa kentúwíꞌa mósá maráníye.

⁷Áánútu keinárawaꞌa kwétuwaꞌnaa-ena kárákwiraivo umbai-yántáákóná imáyáa kwembá ámatuweꞌa máéro.

⁸áwáávitemo in-íyánkómó póímo kwaásimo vándaintemba Sáátáánigo kwaásimo kweiváríꞌo índayavena kwéivo táátaveꞌa kwéeꞌa kárákwiyoro.

⁹Áánútun-aaiyaveꞌa asiramái imáyáa kwéeꞌa Sáátáánigon-aai aꞌáo seró. amápaꞌ-maravakewaimo Áánútun-aaiyavesamo árairemo kwésewaitopaꞌa mirán-úmbáí-yántááꞌá kwétivo imáyáa éꞌa Sáátáánigon-aai aꞌáo seró.

¹⁰umbai-yántááꞌá kentópaꞌa sáwíyankaꞌa kwénimba Áánútu kasenkuíꞌa umátinkena tirávamai asiramátinkainaꞌa asiramái ménaaowe. Áánútu úwoi túwaꞌnaa úmae kwéiyena Káráísitiye tarútinkena séna kesí ságayan-ayampaꞌa ságayambo ímo ánásanin-ayampaꞌa métinkanaumne siráiwai mirá íníye.

¹¹kwená asirayánkó kwaíkaiꞌa éna íma ánásanimba mindá árair-aimban-iye.

¹²moóráwai áwíꞌa Síyóvénesi súwaꞌnaa isaꞌá kínda simái kwéagayaumne. kwemá Áánútuna kwaási éna kesí mayáímá kaweꞌá umái kwémayaiye. asiramátinkanaundayaveꞌa maanáúváí kwéagayaumpo áraiꞌa Áánútu úwoi kwésuwaꞌnaa-in-aimba kwésimatimunda tirumpimbá asiramái tátoreꞌa máéro.

¹³Áánútuna kwaási Pépíróni-naopaꞌa máyáawai Áánútumo keinárawaꞌo ítámakaintemba miwí ítámakaiwai keinárawatavesa sésa kaweꞌá umái máéro sewaná kesááninko áwíꞌa Máákaagwaraꞌa séna kaweꞌá umái máéro kwésiye.

¹⁴Ísu Káráísitina kwaásin-ovo moórá-morawaivimba kentirumbá timéꞌa tiyáámba tíméro. Káráísiti kwená kwaási paru kwéumatinkaintaveꞌa námúnaa kwésune. kemá Pítaamo súnda-aimba kwéanasaiye.