Read Kosena 2 Pítaa 1 Bible Online

2 Pítaa 1 - Kosena bible

2 Pítaa 1

¹kemá Sáímoni Pítaa maanáímbá maanáúváívímbá agaimaráúmpo ísáaro. kemá Ísu Káráísitina aantá-kwaasi úndanivo kesáámó úndantembo Áánútun-aaiyaveꞌo árairemo kwésewai ísáaro. kentáásí Áánútuwe Ísu Káráísiti sáwí-imayaavinkemba iyásínkáiwaiye arupí umái mésarai kawer-ímáyáá símakaayata mindáraise aráápamaiya kaweꞌá umáíya máyaumne.

²Áánútuwe kentáásí Ísóigo Ísuntetopaꞌa téꞌa kawer-ímáyáá tamaéꞌa mirámó úmae kwéiyomba úwoi túwaꞌnaa úmae iyésarai paru umátínkávaꞌa iyíyaꞌa ménaaowe. Áánútu kentáámá ításinkarain-kwasai.

³Ísu Káráísiti sááyowana kwená ságayanko kwená óꞌoran-kaweꞌ-mayaigo tavisúwata kwenópata téta kawer-ímáyáá taísaraumne. Ísu Káráísiti mirán-kwáásígó póna kwemó kaweꞌá umátinkanaumnemo siráin-aimbo éna mirá ínímba póna kwená asirayámbá kwésimisata Áánútuntaveta aamoí éta arupí umái méta kwenáái simátímakaundaya póna marapáké-sáwí-ásíráyánkómó kwaásimo sáwíꞌo kwéiwai keinárawa tineꞌá íma tátorainaꞌa tuvíntuweꞌa Áánútuwe tarúmai ménaaowe.

⁵mindáyaveꞌa imáyáa éꞌa maarámó ónááontaveꞌa asiramái mayáí máyáaro. Áánútun-aaiyaveꞌa áraire séꞌa kwenkáꞌá agevamái máyáamba kawer-ááímbá maréꞌa minkákémbá kawer-ímáyáávínkéníꞌa kwéeꞌa minkákémbá

⁶kentúraꞌa kárákwiyeꞌa minkákémbá asiramái méꞌa íma tívón-káínaꞌa Áánútuntaveꞌa aamoí umái méꞌa

⁷Áánútuna akúmbá máyáantaveꞌa túwaꞌnaa úmae kwéiyeꞌa kentirumbá timéꞌa

⁸mirán-oro. mirámó úmae iyéꞌo éꞌa Ísóigo Ísu Káráísitina kawer-ímáyáá iséꞌa anóniꞌa umái méꞌa kentí mayáí áúgwaraꞌ-mayai mayánááowe.

⁹mirán-káwéꞌ-máyáímó ímo kwémayaawai Áánútumo sáwí-imayaamo maitíyukain-aimba tuwinkásuwesa tááꞌo káúnkaiwairaamba umái máyáawe.

¹⁰kesí kwaásiyono. Áánútu keinárawaꞌa tááyamai ítámakaivo imáyáa éꞌa kwesé asiramái máéro. mirámó éꞌo éꞌa sáwí-amba íma kwaránááowe.

¹¹miráumaimo méwanamo éna kentáásí Ísóigo Ísu Káráísiti sáwí-imayaavinkenta iyásínkáiwai keinárawatavena séna tíyaꞌa kárákwiraanaꞌa kesópaꞌa maíꞌmaiꞌa úmae iyónááowe síníye.

¹²mináráír-áímbá áꞌa ísareꞌa asiramái kwégwaraamba póꞌa simátímaꞌmae íyónaꞌa imáyáa úmae iyónááowe.

¹³marapáꞌó máyaundaraꞌa simátímaꞌmae íyónaꞌa imáyáa úmae iyónááowe. mirámó ónaunda kaweríꞌa ónaumne.

¹⁴ááéma kentáásí Ísóigo Ísu Káráísiti simásimena séna puwíníyone siráimba póꞌa sáwíyankaꞌa puwéꞌa íma marapáꞌá ménaunda póꞌa

¹⁵mináímbá agaimaréꞌo púwónda awánéꞌa mináíntávéꞌa imáyáa úmae iyónááowe. Ísuna ságayamba awánáúmne siráin-kwasai.

¹⁶kentáásí Ísóigo Ísu Káráísiti asirayánkwáráꞌá kumíníye-aimba íma manír-áínkáántá simátímakaundayaanivo súrandeiya kwená usáyaaitaya-sagayanta awánaraundayaveta árair-aimba simátímakaumne.

¹⁷Áánútu ítámakain-omakaꞌa Ísuwe máyaawananaya Áánútu kentáásivowa Ísu áwíꞌa anómba éna usáyaaitaya-sagayampinkemba séna kesááninko ónana ávááraumai entávéna kwésinkaisaꞌa ávááraumai aamoí kwéumankaumne kwíyómpakemba súwata ísaraumne.

¹⁹ísaraundayaveta asiramái séta naaóváꞌá Áánútun-aai simátímakon-aimba árair-aimban-iye. súndaya mináímbá imáyáa oró. túnkain-ayampaꞌa sáma kwégain-aimban-ivo mináímbá aúváívimba awánáíyana aaváúmó usénamo sámo kaintembá kentí imáyáavinkemba miráumai sáma káínana Ísu Káráísiti aaváúmó usaráisanamo kwáyáin-okoraamba umái sáma kamátinkaniye.

²⁰simátíménda-aimba ísámai kaweꞌá oró. naaóváꞌá Áánútun-aai simátímakowai aúváí-kwandaaivimba agaimakón-ainkona ááimba kemá kwaási kentáásí imáyáavinkemba íma kanaán-umai isánaundayaawe.

²¹íma miwítí imáyáavinkemba simái agaimakáavo Áánútun-amanko kwenáái simátimuwasa agaimakómba Áánútun-amanko mináínkóná ááimba kwésuwaꞌnaa-isata kwéisaumne.