Read Kosena 1 Yóni 2 Bible Online

1 Yóni 2 - Kosena bible

1 Yóni 2

¹kesí iyámpóíyono. íma sáwíꞌa ónááontaveꞌa maanáímbá aúváívimba agaimái timúne. ánivo sáwíꞌo íyanamo éna siráváyáiwaiya ména kesivompátá áísaa íníye. kwemá Ísu Káráísitima arupí iwáíyá kesivompátá áísaa íníye.

²sáwítaamo uráunda-meyamba kentááváꞌá íma tíno séna maimaéna pukáiye. íma kentáásí sáwí-meyane suꞌmainivo amáparawaiti sáwí-meyankwaraꞌa maitiyuwáníntavena pukáiye.

³Áánútun-aaimo taagwiyavétaamo únda áraiꞌa kweséya tarúmaiya máyaumneya kwésune.

⁴Áánútun-aaimo ímo taagwiyávónkaꞌo ombá Áánútuwe tarúmai máyaumnemo sembá kampaꞌá sewaná miwívímbá Áánútuna árair-aimba íma kwáyáiye.

⁵ánivo Áánútun-aaimo taagwiyávówai Áánútumpaꞌa tirumbá ámaꞌmai kaweꞌá kwéowe. kesáámó Áánútuwe tarúmai máyaumnemo kwésundawaiya Ísu Káráísitimo máyontemba kesáá miráyá umáíya ménaumne. miráyáámó kwéunda áraiꞌa Áánútuwe tarúmaiya máyaumneya kwésune. ááéraan-amaankoma aúnáiꞌa uráin-kwasai.

⁷kesí kwaási ísáaro. kemó kwéagayaunda íma aúná-amaamban-ivo ááéraan-amaamba kwéagaimai timúne. aivaꞌá simátímakaamba áꞌa ísaraan-amaamba kwéagaimai timúne.

⁸ánivo túnín-tantaaꞌa kwéauyokwisana áraiꞌa sámo kain-tántááꞌá kwévaarimba póna ááéraan-amaamba aúnáiꞌa umái kwévaariye. Ísu Káráísitina mayáívínkémbá minámáámbá paárurena keinárawapinkwaraꞌa minámáámbá kwévaariye.

⁹kentí kwaásiyavai tíyámba kwéumatinkaambanivo sámo kain-áyámpáꞌá máyaumne sembá sámo kain-áyámpáꞌá íma máémba túnín-ayampaꞌa paaí máyáawe.

¹⁰ánivo kentí kwaásimo tirumbó tíméwai sámo kain-áyámpáꞌá máyáamba pósa miwívímbá sáwí-yantaaꞌa íma kwáyáímba pósa óꞌowi tuwánésa sáwí-ampaꞌa íma kwégowe.

¹¹ánivo kentí kwaásiyavaimo tíyámbo kwéumatinkaawai miwí túnín-ayampaꞌa máyáawana túnín-tantaako túrampaꞌa káátagwisasa múguꞌmaaguꞌa úmaesa kwégowe.

¹²kesí iyámpóíyono. keinárawatavena Ísu Káráísiti pukáimba póna Áánútu kentí sáwí-imayaa maitíyukaintaveꞌa kemá maanáúváí agaimái kwétimune.

¹³anón-kwaasiyono. ááinkaꞌa maramá íma kwáyowana moóráwai maémáimba kwemá ívékwaraꞌa máyáísaꞌa kwená ááimba kwéisaantaveꞌa maanáúváí agaimái kwétimune. ívé-kwaasiyono. Sáátáánigomba usáyaaitaraantaveꞌa maanáúváí agaimái kwétimune.

¹⁴iyámpóíyono. Áánútu kentivo isaꞌá kwempáꞌá tiráantaveꞌa maanáúváí agaimái kwétimune. anón-kwaasiyono. ááinkaꞌa moóráwai maémáimba kwemá ívékwaraꞌa máyáísaꞌa kwená ááimba kwéisaantaveꞌa maanáúváí agaimái kwétimune. ívé-kwaasiyono. asiramái méꞌa Áánútun-aai tirumpimbá tátoreꞌa Sáátáánigomba usáyaaitaraantaveꞌa maanáúváí agaimái kwétimune.

¹⁵Áánútumpaꞌo ímo tiráawaimo ontembá mindáyaveꞌa aamoí íma oró. marapákén-tántáátávéꞌa aamoí íma oró. marapákén-tántáátávésamo aamoimó owáímá Áánútuntavesa íma aamoí kwéowe.

¹⁶marapákén-kwáásímó kwéowaina ááimba íma Áánútumpakemba kwéowe. kwaási kentí imáyáavinkemba kwéesa áꞌowiti náaindaamba túran-anda kwéesa túwíꞌa maimaésa kwéiyesa kwéomba íma Áánútumpakemba kwéovo marapákén-ámbá kwégwaraawe.

¹⁷marapákén-tántááꞌó tirááímo kwétain-tantaaꞌa maambáráꞌá ánásainasa Áánútumba arááíma tainíꞌa kwéon-kwaasi aasiyaasí maíꞌmaiꞌa ónááowe. Káráísitina namuro-kwáásítí kwaasái.

¹⁸kesí iyámpóíyono. naaén-kanaa maramó ánásanin-kanaa sáwíyankaꞌa tíníye. naaémba Ísu Káráísitina namuro-kwáásígó tíníye suwaꞌá ísaraawe. Káráísitina namuro-kwáásí sáwívaꞌa áꞌa paáruraamba póta mindáyaveta naaén-kanaa sáwíyankaꞌa tíníye kwésune.

¹⁹kentáávínkémbá Káráísitina namuro-kwáásí moórá-mora máyómba pósa usásimbai paárésa siyuwésaya kóuraawe. áraiꞌo kentáásí kwaásimo máyáankakai úwoi máésino. siyuwésaya kóuraantaveta íma kentáásí kwaásin-owe kwésune.

²⁰Ísu Káráísiti Áánútun-amankomba aiꞌmarówana kuména kentirumpimbá máyáísaꞌa póꞌa árair-aimba kwéisaawe.

²¹árair-aimba íma kwéisaantavaiye séꞌa ímanivo árair-aimba kwéisaantaveꞌa maanáúváí kwéagayaumne. árair-aimpinkemba kampar-áímbá íma paárisaꞌa ísaraantaveꞌa maanáúváí agaimái timúne.

²²anón-kampaꞌo sen-kwáásí maarán-kwáásímán-owe. Ísu Káráísitintavesa Áánútu íma usásinankaraiwaiman-iye kwésen-kwaasi ésa Ísu Káráísitina namuro-kwáásí-íꞌa ésa Áánútunte ááninkonte tínaaemba kwéumatimewe.

²³Áánútu ááninkomba tínaaemba umámewai avowánkwáráꞌá mirá kwéombanivo Ísu Káráísitintavesa Áánútu ááninkoman-iye kwésewai ááninkonte avowántéyópaꞌa tarúmai máyáawe.

²⁴Ísun-aai aivaꞌá ísaraan-aimba tirumpimbá asiramái tátoraamba íma ivátuweꞌa miráumai Áánútunte ááninkonteyopaꞌa tarúmai maíꞌmaiꞌa oró.

²⁵maarán-áímbá Ísu Káráísiti asiramái simásimenaya séna aúnáiꞌa umái maíꞌmaiꞌa ónááoniꞌa kwéumatinkaumne simásímakaintaawe.

²⁶kampar-áímbá simátiyuwaavo séꞌa maanáúváí agaimái timúne.

²⁷kampar-áímbá simátiyuwaawai kwéombanivo Ísu Káráísiti Áánútun-amamba tirumpimbá tínkaraimba póna maíꞌmaiꞌa éna íma kampar-áímbá simátimena árair-aimba kwésimatimiye. mirámó kwésimatimisaꞌo ombá árair-aimba kampar-áímbá taaínkaaꞌa kwéowe. simátímíntemba mirá éꞌa Ísu Káráísitiye tarúmai kwémaewe.

²⁸kesí iyámpóíyono. kwesé tarúmai máyáamba póꞌa Ísu Káráísiti kumíndaraꞌa kwenaúrankaꞌa íma tigaeyávéꞌa éꞌa úwoi asiramái ménaaowe.

²⁹Ísu Káráísiti arupí umái máyáin-aimba áꞌa ísaraawe. moórá-ainkwaraꞌa ísáaro. miráumai arupí umái máyáawai áraiꞌa Áánútuna iyámpóíman-owe.