Read Kosena 1 Yóni 4 Bible Online

1 Yóni 4 - Kosena bible

1 Yóni 4

¹kesí kwaásiyono. sáwíva-kwaasi kampaꞌ-mónór-áímbá simátímaꞌmaesa kwénaaesa Áánútun-amanko kesirumpimbá máyáiyemo sembá íma ááéma áraire seró. mirá sentávéꞌa miwí tirumpimbá máyáin-amamba Áánútun-amanaꞌi. áꞌowan-amanaꞌiyo. mindá awánéꞌa mináímbá ísáaro.

²Ísu Káráísiti Áánútunopakemba marapáꞌá kwaási kunáúkaiye kwésewai miwí tirumpimbá Áánútun-amanko máyáiye. mináímbó sewaꞌó ísáamba Áánútun-amankoma miwívímbá máyáiye seró.

³Ísu Káráísitintavesa mináímbá íma sewáí miwí tirumpimbá máyáin-amanko íma Áánútun-amankoman-ivo Káráísitina namuro-kwáásígón-amankoman-iye. Káráísitina namuro-kwáásígó tínín-aimba ísaraamba isaná marapáꞌá máyáiye.

⁴kesí iyámpóíyono. Áánútu árááꞌa éꞌa kampaꞌ-mónór-áímbá kwésimatimewai usáyaaitaawe. Áánútun-amanko kentirumpimbá máyáivo Áánútumpaꞌo ímo tiráawai miwí tirumpimbá óꞌon-amanko máyáiye. Áánútun-amanko minámánkómbá usáyaaitaraiye.

⁵kampaꞌ-mónór-áímbá kwésimatimewai Áánútumpaꞌa íma tembá marapáꞌá kwémaen-aimba kwésimatimewasa marapá-kwáásí miwí táái kwéisaawe.

⁶kesáá Áánútuna kwaásiya únasaya Áánútuna kwaási kesááiya kwéisaavo óꞌon-kwaasi íma Áánútuna kwaási pósa kesááiya íma kwéisaawe. miráumaiya árair-amanko miwívímbá máyáin-kwaasiye kampar-ámánkó máyáin-kwaasiye taaínkaar-úmaeta kwéiyune. Áánútu arumbá kwétimin-kwasai.

⁷kesí kwaásiyono. tirumbá kwétimewaina ááimba kwemá Áánútuma póta Áánútun-akumba sirumbá tíméno. tirumbá kwétimewai Áánútumpaꞌa tésa kwená kwaási-iꞌa kwéowe.

⁸Áánútu tirumbá kwétimewaina ááimba pósa tirumbá íma kwétimen-kwaasi Áánútumpaꞌa íma kwétewe.

⁹Áánútu mimbórá ááninkomba aiꞌmarówana marapáꞌá kumbéna kentááyávéna ísámai puwéna aúnáiꞌa umái maíꞌmaiꞌa ónaundayavenaya puwéna arumbá símakainta póna mirá uráiye.

¹⁰Áánútumba siruntáámó amúndaya íma anónta ámakaumne. Áánútu arumbá símakenaya ááninkomba aiꞌmarówana marapáꞌá kumbéna sáwítaamo uráunda-meyamba maisiyuwáínana kentááváꞌá íma tíníntavena pukáiye. mirámó uráimba Áánútu anómba arumbá símakaiye.

¹¹kesí kwaásiyono. Áánútu miráumai arumbá kwésimimba póta kentáásí kwaási miráumai siruntá tíméno.

¹²kwaási Áánútumba aneꞌá íma kwéawanaawe. kentáásí kwaási siruntá kwétimunda Áánútu keséya máyáísata áraiꞌa siruntá Áánútumba kwéamune.

¹³Áánútun-amanko kentáásirumpimba máyáintaveta séta kesáá Áánútuwe tarúmai máyaunanaya Áánútu keséya tarúmai máyáiye-aimba kwésune.

¹⁴kentáásivowa ááninkomba aiꞌmarówana sáwíꞌo umáímo máyáampinkemba iyátinkaindayavena marapáꞌá kumúwata awánaraunda kwésimatimundayaawe.

¹⁵Ísuntavesamo Áánútu ááninkoman-iye kwésewai Áánútuwe tarúmai máyáawana Áánútu miwísé tarúmai máyáiye.

¹⁶Áánútu arumbá kwésimisata mindáyaveta áraireya kwésune. Áánútu tirumbá kwétimewaina ááimba pósa tirumbó kwétimewai Áánútuwe tarúmai máyáawana Áánútu miwísé máyáiye.

¹⁷Áánútu kentáá imáyáa símakaisata siruntá Áánútumba kwéameta póta máyaundawaina ááimbo sísaa ínín-kanaamo tíndaraꞌa asiramáíya ménaumne. Ísu Káráísiti arumbá símíntenta marapáꞌá máyaundarata siruntá kwétimundaya póta sísaa ínín-kanaamo tíndaraꞌa asiramáíya ménaumne.

¹⁸Áánútumba tirumbá kwéamewai íma kwéinkaisewe. áraiꞌa Áánútumba tirumbá kwéamewai miwívínkémbá inkaisí-ímáyáá íma kwáyáiye. sáwíꞌo uráam-beyantavesa kwéinkaisewai Áánútumba íma áraiꞌa tirumbá kwéamewe.

¹⁹aivaꞌá Áánútu arumbá símakaintaveta póta siruntá kwéamune.

²⁰miwítí kwaásiyavesa tirumbó sáwíꞌo kwéumatinkaawaꞌo ombá Áánútumba sirumbá kwéamune sembá kampaꞌá kwésewe. miwítí kwaási tineꞌá tuwánésa tirumbá íma tímakaawai pósa Áánútun-aneꞌa íma awánaraawai íma kanaán-umai tirumbá kwéamewe.

²¹Ísu Káráísiti asiramái séna Áánútumba tirumbá kwéamewai miwítí kwaásigwaraꞌa tirumbá tíméro siráiye.