Read Kosena 3 Yóni 1 Bible Online

3 Yóni 1 - Kosena bible

3 Yóni 1

¹kemá Ísóigona kwaásiraꞌa kárákwiraundawai éꞌa maanáúváí agaimái amúne. Káyásiyo maanáúváí awánaao. Ísóigona árair-aimba ísaraundayaveꞌa sirumbá kwéamune.

²kesí kwaási ónaꞌa sirumbá kwéamune. Ísu Káráísitina aampaꞌá kaweꞌá umái kwégonda-aimba ísaraumne. miráumai kaweꞌá umái ménana íma áíꞌa íníntaveꞌa Áánútumpaꞌa námúnaa kwésune. ená mayáí kaweꞌá kwéondayaveꞌa Áánútumpaꞌa námúnaa kwésune.

³Ísóigona kwaási évakarawai enópakemba kesópaꞌa tésa entávésa tasésa enarumpimbá árair-aimba tátore máyaane sewaꞌá isáúnana kesirunkó kaweꞌá kwéiye. miráumai áraiꞌa arupí-ampaꞌa kwégwe máyaane.

⁴kesí iyámpói áraiꞌa arupí-ampaꞌa kwégowe-aimba iséꞌa aamoí kwéunda póna mináámóígómá évaka-tantaataveꞌo aamoimó únda-aamoigomba usáyaaitaraiye.

⁵kesí kwaásigompo Ísóigona kwaási enópaꞌa kuráamba túwaꞌnaa ema kaweꞌ-máyáí mairáanasa minkwáásívínkémbá óꞌom-bapaken-kwaasi enópaꞌa kuráamba miwígwáráꞌá túwaꞌnaa éma kaweꞌ-máyáí mairáane.

⁶miwí maankáꞌá Ísóigona kwaásiya tasimásimesa sésa emá arumbá tímakaandawai tasimásímakaawe. óꞌom-bapaꞌa Áánútuna mayáí komayánáe kwésewai emá aambó kónááon-tantaaꞌa kwétuwaꞌnaa-onda mindá kaweꞌá kwéone.

⁷miwímá Ísu Káráísitina mayáí maimaé kwénaaesa Ísu Káráísitimpaꞌo ímo tiráan-kwaasirakemba meéyámbá íma kwémayaawe.

⁸mindáyaveta Ísu Káráísitimpaꞌo tiráunda-kwaasiya miwíyá túwaꞌnaaya onó. miráumai tágárotamaiya máyaundaya pósa árair-aimba isánááowe.

⁹ákí-auvai agaimái tuwááwánana Ísóigona kwaásitopaꞌa kúwana moóráwai áwíꞌa Táyótevi kentávésa anóndakoman-iye sígwáe séna mináúváívínkén-áímbá iséna íma ísámai kaweꞌá uráimba póꞌa

¹⁰enópaꞌa kwéꞌa kwaási túrankaꞌa Táyótevi uráin-kwasai kosimátimenaumne. Táyótevi kentáá sáwíꞌa umásinkenaya kampar-áíntá simásínkaraiye. íma mináíné suꞌmainivo Ísóigona kwaási kwenópaꞌa kuráamba kwená naaúmpaꞌa íma mósá tínkaraiye. évakarawai kentí naaúmpaꞌa mósá tinkánáe suwaná íma mirán-oro séna monoꞌ-náúmpákémbá tiꞌmátukaiye.

¹¹kesí kwaásiyo. sáwíꞌo ontembá íma mirá éma kaweꞌó ontembá mirán-uwo. kaweꞌó úmae iyówai Áánútuna kwaásiman-ovo sáwíꞌo úmae iyówai Áánútumpaꞌa íma kwétewe.

¹²amáparawai Témítiyaantavesa kaweꞌnáꞌán-iye kwésewe. kwená mayáí awánésa sésa áraiꞌa kaweꞌ-máyáí kwémayaiye kwésewe. kesáágwáráꞌá miráyá kwésune. kwésunda-ainta árair-aimba ísaraawe.

¹³ayáátáár-aimba simámenaeꞌa maanáúváívímbá íma agayáúmpo

¹⁴sáwíyankaꞌa enópaꞌa kwéꞌa enaúrankaꞌa koméꞌa kosimámenaumne.

¹⁵paru umái máyaantaveꞌa Áánútumpaꞌa námúnaa kwésune. ená kwaási kesé máyáawai sésa kaweꞌá umái ménaro kwésewe. kentáásí kwaási esé máyáantaveta séta kaweꞌá umái máéroya kwésumpo moórá-mora-kwaasi simátimiyo. kemá Yóni kesáái ánásaiye.