Read Kosena paárurain-kwasai 11 Bible Online

paárurain-kwasai 11 - Kosena bible

paárurain-kwasai 11

¹simásímatuwowana moóráwai naambó agambatuwésamo on-ándámá siména séna Áánútuna monoꞌ-námbá koagambaré póímo tuvúꞌmáímo agáyáan-ontan-taarei koagambaré Áánútuna imáyáa kwéon-kwaasi táámpe

²ánivo naamáúvaꞌa íma agambaré ivá túwénasa úwoi-kwaasi íma Áánútuna kwaási tésa minkáwéꞌ-náópaꞌa sáwíꞌa úmae iyónááomba kaumbo-ímá umái avaꞌmoraé-kwiyomba maisuwésa ánásanaaomba mindáyavai naamáúvaꞌa íma agambaraaó.

³kaeꞌnárai asirayámbá timéꞌa tiꞌmáráanasarai kwésarai tirumbá kwéoyantavesarai avután-únánkwátói urésarai 1,260 kanaaraꞌa kesáái áraiꞌa simátímaꞌmaesarai iyóyááoiye simásímakaiye.

⁴Ísóigo mararáꞌá kárákwiraiwai aúrankaꞌa kae-táímá mintáígó arampinkémbá masawémba kwéatiyen-taima kwáyáísana mintáígóná ááimba minkwáásíráí óye. Ísóigo aúrankaꞌa kaer-ómbá kúraꞌmaraisana kwáyáísana minónkóná ááimba minkwáásíráí óye.

⁵minkwáásíráíyávésamo sésamo sáwíꞌa umátinkanae síyanamo éna mindárai tóipinkemba ira-ausankó miwítí namuro-kwáásí kavuwíníye. minkwáásíráí sáwíꞌa umátinkanae síyawai mirámó íyamba kavuwínasa puwónááowe.

⁶Áánútu mindárai asirayámbá timúwasarai aaꞌá íma tíno síyanaraimo éna Áánútun-aai kwésimatimiyan-kanaavimba íma aaꞌá tíníye. nonkóntávésaraimo naae-nómbá auvuwómó síyanaraimo éna mirá íníye. tíꞌa ínomo sésarai amápar-umbai-yantaaꞌa kwaásitopaꞌa tínor-aimo síyanaraimo éna mirá íníye.

⁷mirá ínasarai mindárai Áánútun-aai simátímatuwaiyana avéúmbó ímo kwáyáim-baikakewai téna ááiꞌa tiyéna usáyaaitainasarai puwíyana

⁸anón-daopaꞌ-marupaꞌa mindárai túma kwéniye. kentí Ísóigo taairaꞌá pukáipaꞌa mindáóko áwíꞌa aúpá-kwíꞌá Sótómu-naopare Ísípi-naopare miváꞌá mindárai túma kwáyainasa

⁹óꞌon-oꞌon-kuwara-kwaasiye amápar-akun-andaraken-kwaasiye óꞌon-oꞌon-aimba kwésen-kwaasiye amápaꞌ-maravaken-kwaasiye tóyo esa mindárai túma taawánésa sésa íma utaaró kwésiyana kaumbo-táwai umái éíyainkomba kwáyáꞌwái íníye.

¹⁰Áánútun-aai simátímakaayandarai marapá-kwáásíyávésarai sáwísawaa kwéowe séyááoyan-ainko tirumbá sáwíꞌa íníye. mindáyavai mindáraimo puwóyááoyantavena tirunkó kaweꞌá ínasa aamoí ésa amápa-tantaaꞌa kwenamín-kwenamimba ónááowe.

¹¹minkáúmbó-táwai umái éíyainkomba kwáyáꞌwái Áánútu mindárai tááma timínasarai usásinesarai méyasa tuwánésa táátavai íyana

¹²kwíyómpakemba moóráwai anónkaꞌa simátimena séna maaváꞌá íyókaiyo sínasarai ainámpímbá iyíyasa kentí namuro-kwáásí tuwánáíyana

¹³mirá-íya-tawai anóm-barima táínda anón-daopaꞌa avaréíyain-ayampaꞌa úwoi máyaiyasa moórá-ayampaꞌa naambá tawisínaawisi umái sáwíva-kwaasi 7,000 kwaasi puwíyasa úwoimo túvamaimo máyaiyan-kwaasi tiyántámbá kwétainasa táátavai kwéesa Áánútuntavai kwená ááimba óꞌoran-aaimban-iye sénááowe.

¹⁴kemá Yóni mirán-kááíníꞌa awánéꞌa séꞌa mirá umbá póna kae-sáwí-méyámbá ánásowana naaé-sawi-meyamba sáwíyankaꞌa tíníye súne. naaén-uwiremba tuvúkáin-kwasai.

¹⁵minkákémbá kwíyómpakendarawaꞌa avaꞌmoraénarawaꞌa uwíremba tuvúkáawana miwí tínaaemba moóráwai uwíremba tuvuwúwaꞌa isááwánasa kwíyómpaꞌa sáwívarawai sésamarapá-kwáásíráꞌá kawáá uráawai ánásaawasarai kentáásí Ísóigoe usásinankaiwaiye aasiyaasíkawáá úmae iyóyááoiye

¹⁶suwasá moórá-kwaai aíyayaan-umai éíyain-anon-kwaasi Áánútuna egwaaꞌá kawááuwai máyón-ayampaꞌa mésa aísamaivimba kívairesa kwená imáyáa ésa áwíꞌa mósá marésa

¹⁷sésaÁánútu Ísóigoo amápar-asirayamba tokáandawai aivaꞌá mé ívékwaraꞌa máyaandawai e sáwívar-asirayamba toké kwaásiraꞌa ááimba ásámai kwégawaa ónda póta súwiya kwésune.

¹⁸amápaꞌ-maravaken-kwaasi embá áwááꞌa kwéaeewa ívéꞌa miwímó áwááꞌo tiyíníyonda-kanaama kwétiye. pukáan-kwaasi miwí táái tísaa umai isé ená kwayó-kwáásí enáái simátímakaawaiye anón-kwaasiye úwoi-kwaasiye miwí ená imáyáa mósá marésa enáwíꞌa mósá máráawaiye kaweꞌ-méyámbá timé marapáꞌá sáwí-mayai mairáawai sáwí-meyamba timíníyone siráawe.

¹⁹suwaná minkákémbá kwíyómpaꞌa Áánútuna monoꞌ-nánkóná ontá tigúwaꞌa awánaawanda mimbónóꞌ-náúmpáꞌá kawe-ánáveumba kwáyowana naaóváꞌó Áánútumo Mósesimbo simámakon-amaambo siyáánkai-amaambo óntan-kwandaairaꞌo agaimái mimpímbó makón-anaveumba awánaawanana kwíyónaai kwésuwana tawáomba kwéuwana anón-awairai kwésuwana anóm-barima kwétowana anón-kaiyaramba kwégumuwana mirá kwéuwaꞌa awánaraumne.