Read Kosena paárurain-kwasai 12 Bible Online

paárurain-kwasai 12 - Kosena bible

paárurain-kwasai 12

¹awánaawanda kwíyómpaꞌa umásítaiꞌa éna kwaási agaráátinkai-umasitaiꞌa maarán-úmásítáíꞌa éna moórá-ininko máyowana aaváúgó kwená unáánkwátóiraamba éna áúgomba ánáan-kwirowana máyowana kwíyónko aísamai-andampaꞌa kwáyowana aꞌnómpímbá kánumoꞌa kwáyowana minkánúmópímbá sísamaivakemba kaeꞌá kumbaimái-oꞌa kwáyowana

²ámúkwaraꞌa máyowana kwená kanaamá túwana iyámpói ankáindayavena áíꞌa úwana kwááꞌa túwana

³minkákémbá kwíyómpaꞌa moórá-umasitaikwaraꞌa éna kwaási agaráátinkai-umasitaiꞌa maará éna arááímbá anón-araaimba ména naaeyayán-áúgwáráꞌá ména avakaeté-aꞌnomba kwáyowana aꞌnómpínkémbá siyáánkai-awaayaamba kwáyowana usáyaaitaraiwaina kánumoꞌa avakaeté-kanumoꞌa aꞌnómpímbá kwáyowana

⁴kaer-áyámpákén-óꞌá tuwéna moórá-ayampaken-oꞌa améraandei kwiyúmai awéntayuwowana marapáꞌá kumúwana iyámpói ankánín-ininkona egwaaꞌá ména ankáínaꞌa tuvúꞌ-nasuwánáe séna máyowana

⁵inaamaíyámpói marankówana anón-éna amápaꞌ-maravaken-kwaasiraꞌa asiramái kawáá ínín-iyampoi marankówana Áánútu kárákwiyinintavena miníyámpóí ááéma mósá tavímairena kwemá kawááin-avaraꞌa móankowana

⁶minínínkó inkaiséna kavóná-maravaꞌa kwéna Áánútu kwentávéna toꞌmayaa umánkanaumne sirópaꞌa koména ayáátáákaꞌa 1,260 kanaama komáyowana Áánútu kawáá uráiye.

⁷kawáá úwasa kwíyómpaꞌa ááiꞌa tiyésa Áánútuna kwayóꞌnárawakaꞌa kárákwirowai áwíꞌa Máíkeri kwemá kwená kwayóꞌnáraware arááínkówé kwená kwayóꞌnáraware ááiꞌa tíyówasa

⁸Máíkeriye kwená kwayóꞌnáraware usáyaaitesa kwíyómpakemba arááínkówé kwená kwayóꞌnáraware kwatuwésa

⁹anón-araainkomba awéntáyukaawe. naaóváꞌá marapáꞌá iraankavayaambá aúkéna kwenáwíꞌa Sáátááni póna marapá-kwáásí kampar-áímbá simátímaꞌmaena kwéiyisasa áraiꞌa siyé kwésewana kwaási simái sáwíꞌa kwéumatiyuwaiye. kwenté kwená kwayóꞌnárawate tuwétayuwowasa marapáꞌá kunkáawe.

¹⁰kúmúwaꞌa isááwánda kwíyómpaꞌa moóráwai anónkaꞌa sénaÁánútu aúrankaꞌa ména kentáásí kwaásiyavena sáwí-kwaasiman-owe kampaꞌá símae iráiwaimba awéntayuwaisana marapáꞌá kúmísana póna Áánútu Sáátáánigo tátokaimpinkemba kentáá mégwésiraiye. kentááráꞌá kawáá éna asirayán-úrandako póna mégwésiraisata awánaraumne. Áánútu aiꞌmarówana marapáꞌá kunkáiwaina asirayántá awánaraumne.

¹¹Ísu sipisípi-araakaawai miwítí sáwí-meyamba mairáiwai puwúwana kwená naaemá kunkáimba pósa Áánútun-aai arupí umái simátímaꞌmaesa kwéiyesa sínkamiyata puwúnavo-imayaa íma umbá asiramái mésa Sáátáánigomba usáyaaitaraawe.

¹²keinárawaꞌa kwíyómpaꞌa máyáawai mináíntávéꞌa imáyáa éꞌa aamoí oró. ánivo Sáátáánigo marapáꞌá kumbéna sáwíꞌa kwéimba póꞌa marapáꞌá uwí-nómpáꞌá máyáan-kwaasi sáwíꞌa umái ménaaowe. Áánútu Sáátáánigomba tuvuwínín-kanaama sáwíyankaꞌa tínímba póna Sáátáánigo iséna áyántavena kwéiye kwíyómpakewai siráiye.

¹³súwana minárááínkó áwíꞌa Sáátáánigo imáyáa éna kwíyómpakemba suwéntayuwaisaꞌa marapáꞌá kumbáyaumne séna inaamaiyámpóimo maránkaron-ininkomba kwaꞌmaéna kúwana

¹⁴arááínkó minínínkómbá tuvúwívo séna Áánútu anón-evontaanko ayóíráámbá kaeꞌá amúwana araravámaena kavóná-maravaꞌa kwentávénamo toꞌmayaa umánkaropaꞌa kúwana Áánútu kaumbo-ímá umái avaꞌmoraé-kwiyomba kárákwiraiye.

¹⁵arááínkó minínínkómbá kwaꞌmaéna óiꞌa kááꞌmaena nombá umpíyankaanana mayaꞌmaéna kówinkwae séna kwaꞌmaéna kúwana

¹⁶maragó áwaꞌnaa ena kweyááríkaꞌa maramá kitúwana kwenóipinken-donko mimpímbá kumúwana

¹⁷arááínkó minínínkómbá áyántavena umánkena imáyáa éna séna kwenárááꞌmaatemo éꞌa ááiꞌa tiyánaumne-imayaa uráiye. kwenárááꞌmaaꞌa miwí Áánútun-aai ísámai kaweꞌá ésa Ísu siráin-aimba simátíméwaiman-owe. ááiꞌa tiyánaumne séna uwí-nón-awampaꞌa toꞌmayaa umái méraiye.