Read Kosena paárurain-kwasai 13 Bible Online

paárurain-kwasai 13 - Kosena bible

paárurain-kwasai 13

¹máyowana awánaawanda moórá anón-avaa-kwamba uwí-nómpínkémbá iyéna avakaeté-aꞌnomba kwáyowana áwááyaamba aꞌnómpínkémbá siyáánkai irówana usáyaaitaraiwaina kánumoꞌa siyáánkai mináwááyáámpímbá kwáyowana Áánútuntavai simái sáwíꞌa umánkaron-aimba aꞌnómpínkáꞌá agaimái kwimakówana

²kwemá anón-avaar-iyankaamba ména aísamaima anón-iyanko aísamairaamba kwáyowana óiꞌa aváár-íyán-óikaamba kwáyowaꞌa awánaawanana ááéma moóráwai puwínkwáe séna tuvuwúwana urón-karevuꞌa kawáúgun-avima kwáyowana tuvuwúwana íma puwéna úwoi máyowana arááínkó kwená asirayámbá aména simámena séna mararáꞌá kawáá úndavaꞌa kawáá uwo súwasa amápaꞌ-maravaken-kwaasi awánésa táátavai ésa kentáásí anóndakoman-iye sésa kwenarááíma kwarésa

⁴arááínkó anón-avaa-kwankomba asirayámbá ámakontavesa arááínkóná imáyáagwaraꞌa mósá marésa anón-avaa-kwankona imáyáa mósá marésa sésa anón-avaa-kwanko usáyaaitaraimba pósa íma kanaán-umai ááiꞌa tiyamánkanaaowe siráawe.

⁵suwaná Áánútu mináváá-kwámbá érankowana ména kwenáúma maimaé kwéiyena Áánútumba simái sáwíꞌa kwéumankowana kaumbo-ímá umái avaꞌmoraé-kwiyomba Áánútu érankowana ména

⁶Áánútumba simái sáwíꞌa umánkena kwenáwíꞌa simái sáwíꞌa kwéena Áánútumo máyáipaꞌa simái sáwíꞌa kwéena kwíyómpaꞌo máyáawai simái sáwíꞌa umátinkomba isááwánana

⁷Áánútu érankowana ména Áánútuna kwaásiye ááiꞌa tiyámái kwéusayaaitena amápar-akun-andaraken-kwaasiye óꞌon-oꞌon-kuwara-kwaasiye óꞌon-oꞌon-aimba kwésun-kwaasiye amápaꞌ-maravaken-kwaasirare kwégawaa úwasa

⁸amápaꞌ-maravaꞌa máyón-kwaasi anón-avaa-kwankona imáyáa mósá makáawe. Áánútu maramá íma taróruronkaꞌa sipisípi-araakaawai kentáásí sáwí-meyamba mairáiwai pukáiwai kwená aúváívimba maíꞌmaiꞌa ónááon-kwaasi túwíꞌa agaimakáivo mináúváívímbá túwíꞌa íma agairáin-kwaasi anón-avaa-kwankona imáyáa mósá makáawe.

⁹kemá Yóni súnda ísáawai póꞌa mináímbá ísámai kaweꞌá oró.

¹⁰ándávaꞌa mótinkanae sésamo ésa mirá ónááowe. tínkamonasa puwígwáe sésamo ésa mirá ónááowe. mindáyavesa Áánútuna kwaási íma Áánútumba auwéꞌa kwenkáꞌá aráápamai asiramái máéro kemá Yóni kwésune.

¹¹minkákémbá awánaawanda moórá-avaa-kwamba maravínkémbá iréna sipisípi-araakaamba umái ména aꞌnómpínkémbá kaer-áwááyáámbá kwáyowana amósámba arááínkó amósánkaamba éna

¹²kéꞌnaan-avaa-kwanko aúrankaꞌa ména asirayámbá kwenkákémbá kwémaena mayáímá kwémaena amápaꞌ-maravaken-kwaasiyavena séna anón-avaa-kwankona imáyáa mósá máráaro séna ááémo moóráwaimo puwínkwáe séna tuvúwúwana úwoi máyowaintavena kéꞌnaan-avaa-kwankontavena mináímbá séna

¹³óꞌon-oꞌom-bayai ímo awánarom-bayai kwémaena séna kwíyómpakemba iramá kumuwó súwana kwaási túrankaꞌa kwégumuwana

¹⁴Áánútu érankowana ména kéꞌnaan-avaa-kwanko aúrankaꞌa óꞌon-oꞌom-bayai ímo awánarom-bayai kwémaena marapá-kwáásí sáwí-ampaꞌa tavisimái mégwétiyuwena simátimena séna anón-avaa-kwanko áúwawakaaniꞌa úmaraiyana kwenáwíꞌa anómba íno séna ááémo moóráwaimo puwínkwáe séna tuvúwúwana úwoi máyowaintavena mináímbá súwasa isésa mirá uwaná

¹⁵Áánútu érankowana ména kéꞌnaan-avaa-kwanko áúwawakaaniꞌo úmárówaimba ááma amúwana aaí séna kesí imáyáama íma mósá makáawai tínkamiyasa púwóro súwasa mirá kwéuwana

¹⁶maravínkémbá usaráiwai asiramái súwasa anón-kwaasiyeúwoi-kwaasiye óísankwara-kwaasiye óísaniyaain-kwaasiye úwoi kwénaaun-kwaasiye óꞌowiti mayáímá kwémaesa meéyámbá ímo kwémayon-kwaasiye miráumai-kwaasi anón-avaa-kwankona aúvái agayésa évakaꞌa túwayaankaꞌa agáyówasa évakaꞌa tiyáánkaꞌa agáyówasa

¹⁷évakarawai mináváá-kwánkó áwíꞌa agáyówasa évakarawai náámpaamba agayésa mindáámpáánkóná ááimba kwenáwíꞌa agaimárón-kwaasi toómbá meéyán-uwasá ímo mirán-áúváí agaimárón-kwaasi íma toómbá meéyán-uráawe.

¹⁸kemá Yóni súmpo mináímbá kaweꞌá umái imáyáa oró. kawer-ímáyáágwárá-kwáásí mindáámpáánkóná ááimba isánááowe. mindáámpáámbá kwaásigontavaiman-iye. mindáámpáámbá 666 iye kemá Yóni kwésune.