Read Kosena paárurain-kwasai 7 Bible Online

paárurain-kwasai 7 - Kosena bible

paárurain-kwasai 7

¹iséꞌa minkákémbá awánaawanda kwíyómpaken-kwayoꞌnarawaꞌa éíyaimba mésa amápaꞌ-maragona éíyain-ayampaꞌa mésa mararáré taairaré uwí-nónkáré úndáma toráívo sésa tátokowaꞌa

²awánaawanda kwíyómpakemba moórá-kwayoꞌnaꞌa aaváúmó usópakemba téna agayáí-yántááꞌá Áánútu asirayánkwáráwáíndéí toréna minéíyáíndárau tááyena Áánútumo marawé uwí-nóné sáwíꞌa ónááon-asirayamba tímakon-eiyaindarau tááyena

³anónkaꞌa séna marawé taaiyé uwí-nóné íma sáwíꞌa éꞌa amuꞌmakéwata Áánútuna mayáí-kwáásí túwayaankaꞌa aúvái agaimáráanata keinárawaꞌa naaémba marawé taaiyé uwí-nóné sáwíꞌa oró súwaꞌa isááwánana

⁴séna Ísareri áánimbaaꞌa tísaavutantambo uráawai túwayaankaꞌa Áánútuna aúvái agaimakáawai táámpamai séna 144,000 kwaasin-owe.

⁵minkwáásí Yútaan-andaraken-kwaasi 12,000 kwaasi uwasá Árúpenin-andarakemba 12,000 kwaasi uwasá Kátaan-andarakemba 12,000 kwaasi uwasá

⁶Ásan-andarakemba 12,000 kwaasi uwasá Návatarain-andarakemba 12,000 kwaasi uwasá Mánásaan-andarakemba 12,000 kwaasi uwasá

⁷Símíyonin-andarakemba 12,000 kwaasi uwasá Áríváin-andarakemba 12,000 kwaasi uwasá Isakáán-andarakemba 12,000 kwaasi uwasá

⁸Sépiyuraanin-andarakemba 12,000 kwaasi uwasá Yósépin-andarakemba 12,000 kwaasi uwasá Pénisaminin-andarakemba 12,000 uwasá miráumai-kwaasi Áánútuna aúvái túwayaankaꞌa agaimakáawe súwaꞌa ísaraumne. Ísu Káráísitina kwaásiti kwaasái.

⁹iséꞌa minkákémbá awánaawanda sáwíva-kwaasi íma kanaán-umai táámpaawanda-kwaasi mésa amápaꞌ-maravaken-kwaasi amápar-akun-andaraken-kwaasi óꞌon-oꞌon-kuwara-kwaasi óꞌon-oꞌon-aimbo kwésun-kwaasi mésa kawááin-avaona aúrampaꞌa mésa kentáásí sáwí-meyambo mairáiwai aúrankaꞌa mésa kwayán-únánkwátói urésa aamoí kwéuntavaiye sésa kwáátaan-anama tokésa

¹⁰anónkaꞌa sésa Áánútu kentáásí Ísóigo kawááin-avaraꞌa máyáiwaiye kentáásí sáwí-meyambo mairáiwaiye sáwíꞌo umáímo máyaundavinkemba kawer-ámpátá mégwésinkaaiye suwasá

¹¹kwíyómpaken-kwayoꞌnarawaꞌa amápaꞌa kawááiwai máín-ayampare anón-kwaasiye éíyaimbo túvamaimo máyówaiye úkúmaresa mésa kívairesa Áánútuna imáyáa ésa áwíꞌa mósá marésa

¹²sésa árair-aimban-iye séta Áánútu áwíꞌa mósá kwémaraunanaya kwená óꞌoran-aaimba kwaíkwaiꞌa isaná kwená kawer-ímáyáágó kwaíkwaiꞌa isatá kwentávéta súwiya kwésunanaya kwenáwíꞌa anómba isaná kwená asirayánkó kwaíkwaiꞌa isaná kwaásiraꞌa kawáá úmae kwéiyisata árair-aimba iyéyá kwésune siráawe.

¹³minkákémbá anón-kwaasivinkemba moóráwai sísaa ena séna kwayán-únánkwátói uráan-kwaasi náávakena nááwaꞌiyo súwaꞌa

¹⁴kemá séꞌa anóndakoo kemá íma ísaraumpo emá ísaraane séwánana kwemá séna miwímá anón-umbaima tíméwasa Áánútumba íma auwésa asiramái méraawe. unáánkwátóimo sese owanamó kaweꞌó kwéintemba miwímá kentáásí sáwí-meyambo mairáiwai puwúwana naaemá kunkáimba pósa kwayán-únánkwátóiraamba úmaresa kaweꞌá umái máyáawe.

¹⁵mindáyavesa Áánútu kawááin-avaona aúrampaꞌa mésa aaváyaavimba eénáinkaꞌa noꞌwáámba kwenópaꞌa kwená mayáí mayáíꞌ-mayaiꞌa kwéowe. kawááin-avaraꞌa máyáiwai miwí tapáínana

¹⁶íma ókwaraꞌa táái tinkéna nontáváígwáráꞌá íma tinkáinana miwí tineꞌá íma aaꞌá kéna íma kokoꞌá ínasa kaweꞌá umái ménaaowe.

¹⁷kentáásí sáwí-meyambo mairáiwai kawááin-avaona avumpimbá máyáimba póna miwíráꞌá kárákwiyena tíꞌmaena kaweꞌ-nómpáꞌá mótinkainasa minkáwéꞌ-nómbá nésa maíꞌmaiꞌa ónááowe. Áánútu miwí tiꞌnumá uwátiyuwainasa íma iviꞌá táiyana moórá-yantaaꞌa íma aáváán-tuwáíyamba kaweꞌá umái ménaaowe anón-kwaasivinkemba moóráwai simásímakaiye.