Read Kosena paárurain-kwasai 9 Bible Online

paárurain-kwasai 9 - Kosena bible

paárurain-kwasai 9

¹isááwánana minéíyáíndárau tínaaemba moóráwai uwíremba tuvuwúwaꞌa awánaawanda kwíyómpakemba moórá-oꞌa kásímaena marapáꞌá kunkón-okomba moóráwai kíma aména maipímbá avéúmba íma kwáyom-baikaken-kima amúwana maimaéna

²mimbáíkóná ontá tisuwówana kígaumo ésamo agáyáawanamo anón-umumbo intembá mimbáípínkémbá iyéna aaváúgwárá kwíyónkwaraꞌa mói úyatuwowana

³minúmúmpínkémbá aꞌnórímbá marapáꞌá kuména taairaaúꞌó kavúwówanamo títemo intembá mináꞌnóríntónkó mirán-ásíráyámbá torówana

⁴mináꞌnóríntóntávéna moóráwai simátimena séna taaigwará owáígwárá karaan-tantáákwáráꞌá íma néꞌa Áánútuna aúvái túwayaankaꞌa agaimakáan-kwaasi íma tiyéꞌa Áánútuna aúvái túwayaankaꞌa íma agaimakáan-kwaasi tíyáaro.

⁵íma puwígwáivo íma anónkaꞌa tiyéꞌa évaꞌaasei-kwiyonkaꞌa tiyáíyana tíꞌa íno. taairaaúꞌó kavúwówanamo títemo intembá mirá tíꞌa íno.

⁶minkánáávímbá títe ínasa puwónaumne síyambanivo puwónááon-amba avakáá uwááesa túvamai ménaaowe siráiye.

⁷súwaꞌa awánaawanda mináꞌnóríntónkó moórá-poigo áwíꞌa ósinkaan-aꞌnorintomba mésa ááiꞌo tiyáíyanesa toꞌmayaa ésa kwaásiraan-toiꞌa kwáyowasa tiꞌnómpímpáꞌá óntanko áwíꞌa kórinei úmakon-kanumoꞌa kwirówana

⁸miwí tiꞌnóntáu ayáátááꞌa aarai tiꞌnóntáuraamba úwana miwí túwááyaamba asirayámbá anón-iyanti túwááyaankaamba úwasa

⁹tíntaaraꞌa asirayán-kwéúꞌá kausokésa ááiꞌo tiyánáesamo tiyáántámbo taantembá mináꞌnóríntónkó tiyóísántámbá kwétesa

¹⁰miwí timéraampaꞌa kwaivain-áwááyaankaamba ésa kwaásimo vaawanamó títemo intembá évaꞌaasei-kwiyonkaꞌa mirán-ásíráyámbá tokáawe.

¹¹miwítí anóndako avéúníyaai-maikaꞌa kárákwirowai áwíꞌa Yútaa-kwaasi tááivinkemba Ípíru-aimpinkemba Ápátono suwasá Kíríki-kwaasi tááivinkemba Ápóriyono suwaná mináwíkóná ááimba sáwíꞌa umásúwáiwaiman-iye siráawe.

¹²kemá Yóni awánéꞌa séꞌa aiva-sáwí-méyámbá ánásaimba póna kae-sáwí-méyámbá kwáyáimba póna paáriniye kemá Yóni súne.

¹³kwíyómpakendarawaꞌa évaꞌaaseinarawaꞌa uwíremba tuvúkáawana miwí tínaaemba moóráwai uwíremba tuvuwúwana Áánútu aúrankaꞌa kóri-ontandei úmakon-taareiraꞌa évarevar-ayaairakemba aaigówé suꞌmai súwaꞌa isááwánana

¹⁴minkwíyómpákén-kwáyóꞌnáꞌá uwíremba tokówaintavena séna anón-donko áwíꞌa Yúvérétísi-nompaꞌa kwíyómpaken-kwayoꞌnarawaꞌa éíyaimba ándávakemba ayútinkaao súwasa

¹⁵amuꞌmaꞌmáésa kwéiyuwana minkánáá túwana ayútinkowasa kaer-áyámpáꞌó máyón-kwaasi tiyuwésa moórá-ayampaꞌo máyón-kwaasi tínkamonasaya puwígwáe sésa kuwasá

¹⁶ááiꞌo tiyánááon-kwaasi ósin-arósáanumpimba kun-kwáásímó táámpomba sáwívaꞌa 200,000,000 kwaasiman-owe iséꞌa

¹⁷kaainkááníꞌa umái awánaawanda sáwívar-osin-arosaanumpimba máyón-kwaasi tíntaava-kweuꞌa naaeyayáné sokóne terávuwe mirán-kwéútómbá araaꞌnaanurówaꞌa awánaawanasa ósin-tiꞌnóntómbá anón-iyan-aꞌnonkaamba asirayán-tíꞌnóntómbá kwáyowana tóipinkemba iramá kéna úmúmba éna sáwí-kwiyumba kwéena mirá kwéuwasa

¹⁸kaer-áyámpáꞌó máyón-kwaasi tiyuwésa moórá-ayampaꞌo máyón-kwaasi tóipinken-tantaaꞌnei tínkamuwasa pukáawe.

¹⁹minósíntómbá íma tóipine suꞌmai asirayámbá torésa timéraampakwaraꞌa iraankavayaan-áꞌnónkáámbá asirayámbá tokésa kwaási vowasá pukáawe.

²⁰vowasá púwúmbanivo túvamaimo máyón-kwaasi miwítí sáwí-mayaima íma tuwésa kwaántá-kwaasiyonti imáyáa mósá marésa óꞌon-oꞌon-ontandei taaineí úmakon-tantaatavesa kesí ísóigowe sésa íma aúramba awánéna íma aaí iséna íma kwénaain-tantaakontavesa kesí ísóigowe sésa imáyáa mósá maꞌmaé kwéiyesa

²¹miwítí sáwí-mayai íma tuwésa tínkamuwasamo púwóniꞌa uwasá pukaaꞌá kwéagayesa uwaaꞌá kwévesa aarai-úmóyáné kwaai-úmóyáné óꞌon-oꞌon-tantaakwarar-umoyane kwéesa mirá úmae iráawe.