Read Kpelle Zɛnɛse 11 Bible Online

Zɛnɛse 11 - Kpelle bible

Zɛnɛse 11

¹Sîi-woo tɔnɔ nɔ́ ƃé kɛ̀ ŋ̀éniɛi su, ǹyaŋ ŋ̀éniɛi su-ƃelai kélee da kâa zii-woo tɔnɔi ŋí ƃò.

²Tãi ǹûai dí lì la vóloi kulâi-perei, dí kwaa ma kàa Babelɔŋ lɔii su dí sée naa.

³Nya ƃe dí mò díkîe-ni dîa dîyɛɛi, “Ka pá kú pɔ̂rɔ kane kú géreŋ kpɔ́ a ǹɛ́lɛɛ.” Bɔ̂rɔ kane-ŋai dí kɛ̀ a pɛ́rɛ tɔɔ sɛŋ. Dí sɛŋ da kùla ǹɔii mu gɛɛ yɛ̂ɛ kotâa bɔ̂rɔ kane-ŋai see mɛni ma díkîe-ni mɛi.

⁴Dí mò díkîe-ni dîa dîyɛɛi, “Kwaa kú taa tɔ́ kúkpîŋ mɛni mà, kú pɛ́rɛ kɛ́tɛ tɔ́ɔ dôŋ é seri ŋ̀ele-kɔlɔŋ ma, kúlaa é kɛ́ ma a gɛɛ kúfe kɛ̀ nɔ́ a kútaa-taa ǹɔii su gwaa kélee.”

⁵Nya ƃe Yâwɛɛ è pà a gɛɛ é daai káa da bɛ́rɛi nyii-ŋai núu-kpune è dɔ̀ɔi.

⁶Yâwɛɛ è mò ǹyɛɛ, “Gáa, díkaa a núu tɔnɔ, ǹyaŋ díla sîi-woo kɛ́ ƃô tɔnɔɔ. M̀ɛnii da pâi gɛ̂i gɔ́ɔ pîlanii nɔ́ ká ŋí. M̀ɛnii kélee da gbɛ̀tɛ a gɛɛ dí gɛ́i, bɔri a pâi kɛ̂i dîɛ.

⁷Tɔɔ kú lí naa kú dísîi-wooi sumo a gɛɛ dífe díkîe-ni lá-woo mɛni ŋɔ́nɔ.”

⁸Nya ƃe Yâwɛɛ è dítâa-taa kpɔ́ ǹɔii gwaa kélee. Dítaa tɔɔ mɛnii é nâa kpèra.

⁹Mɛni ma dí daai láa sèe a Beebɛ, kpɛ́ni fêi, nàa ƃé Yâwɛɛ è ǹɔii kélee ŋɔsîi-wooi sûmo naa é ǹûai táa-taa ǹɔii gwaa kélee.

¹⁰Sɛ̂ŋ suu pîlaŋ-pere ká ŋí. Tãi è kɛ̀ la a kóraŋ ŋuŋ tɔnɔi (100), è Apasa maa sɔlɔ ƃô kóraŋ feerɛ tɛ̀ɛ ǹya-fɛɛi pôlu ma.

¹¹Apasa maa sɔlɔ ƃóɔɔ pôlu ma, Sɛ̂ŋ è kɛ̀ ɣele ma a kóraŋ ŋuŋ lɔ́ɔlu (500). È lônii-sinaa da nɛyâa maa sɔlɔ ƃô máŋ.

¹²Tãi Apasa ǹyaŋ è kɛ̀ la ɣele ma a kóraŋ buu saaƃa káo lɔ́ɔlui, è Sila maa sɔlɔ ƃô.

¹³Apasa è kɛ̀ ɣele ma a kóraŋ ŋuŋ náaŋ káo saaƃa (403), Sila maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô ŋɔ́nɔ.

¹⁴Sila kɛ́ɛ ɣele ma a kóraŋ buu saaƃai, è Ibɛ maa sɔlɔ ƃô.

¹⁵Sila ǹyaa máŋ è kɛ̀ ɣele ma a kóraŋ ŋuŋ náaŋ káo saaƃa (403) Ibɛ maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô.

¹⁶Tãi Ibɛ è kɛ̀ la a kóraŋ buu saaƃa káo náaŋ, è Pelɛ maa sɔlɔ ƃô.

¹⁷Pelɛ maa sɔlɔ ƃóɔɔ pôlu ma, Ibɛ è kɛ̀ ɣele ma ŋɔ́nɔ a kóraŋ ŋuŋ náaŋ pôlu buu saaƃa (430), é lônii-sinaa da nɛyâa maa sɔlɔ ƃó.

¹⁸Pelɛ ǹyaa máŋ è kɛ̀ ɣele ma a kóraŋ buu saaƃa é lɛ́ɛ pâi Leu maa sɔlɔ ƃôi.

¹⁹Pelɛ è kɛ̀ ɣele ma a kóraŋ ŋuŋ feerɛ káo lɔ́ɔlu mɛi náaŋ (209) Leu maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô ǹyaa máŋ.

²⁰Leu kɛ́ɛ ɣele ma a kóraŋ buu saaƃa káo feerɛ, è Siru maa sɔlɔ ƃô.

²¹Leu è kɛ̀ ɣele ma a kóraŋ ŋuŋ feerɛ káo lɔ́ɔlu mɛi feerɛ (207) Siru maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô.

²²Siru è kɛ̀ a kóraŋ buu saaƃa é lɛ́ɛ pâi Naɔ maa sɔlɔ ƃôi.

²³È kóraŋ ŋuŋ feerɛ (200) kɛ̀ Naɔ maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô máŋ.

²⁴Naɔ ǹyaa máŋ è kɛ̀ a kóraŋ buu feerɛ káo lɔ́ɔlu mɛi náaŋ é lɛ́ɛ pâi Tera maa sɔlɔ ƃôi.

²⁵È kóraŋ ŋuŋ tɔnɔ pôlu buu káo lɔ́ɔlu mɛi náaŋ (119) kɛ̀ ɣele ma Tera maa sɔlɔ ƃóɔɔ pôlu ma. Ǹyaa máŋ è lônii-sinaa da nɛyâa maa sɔlɔ ƃô.

²⁶Tera è kɛ̀ a kóraŋ buu lɔ́ɔlu mɛi feerɛ é Eberaŋ maa sɔlɔ ƃó da Naɔ é pɛ́lɛ Araŋ ma.

²⁷Tera suu pîlaŋ-pere ká ŋí. È Eberaŋ maa sɔlɔ ƃô da Naɔ é pɛ́lɛ Araŋ ma. Araŋ ǹyaŋ ƃé La maa sɔlɔ ƃô.

²⁸Araŋ è sàa ǹâŋ Tera túɛ Ɔɔ, Babelɔŋ lɔii su ƃɛ́i dí màa sɔlɔ ƃô naai.

²⁹Nya ƃe Eberaŋ da Naɔ dí nɛnî kùla. Eberaŋ ŋɔnɛnîi láa ƃé kɛ̀ a Serai, Naɔ ŋɔnɛnîi láa kɛ́ ƃô a Maka. Maka è kɛ̀ a Araŋ ǹóŋ-nɛni. Araŋ è kɛ̀ a Ika ǹâŋ.

³⁰Serai è kɛ̀ a gbómaa.

³¹Tera è ǹóŋ Eberaŋ sìɣe da Araŋ ǹóŋ La nyii kɛ̀ a ǹóŋ ŋɔlóŋ, é Serai siɣe nyii kɛ̀ a ǹóŋ Eberaŋ ŋɔnɛnîi, da dîa-ni dí kúla Babelɔŋ-ŋai dítaai su da kɛ̂ ma Ɔɔi, dí lí Keena lɔii su. Kɛ́lɛ tãi dí sèri la Araŋ taa-leei sui, dí sèe naa.

³²Tera è kóraŋ ŋuŋ feerɛ káo lɔ́ɔlu (205) kɛ̀ ɣele ma. È sàa Araŋ taa-leei su.