Read Kpelle Zɛnɛse 14 Bible Online

Zɛnɛse 14 - Kpelle bible

Zɛnɛse 14

¹Babelɔŋ kaloŋ Amalafɛ da Ilasa kaloŋ Alio é pɛ́lɛ Elaŋ lɔii ŋɔkâloŋ Kedolaomɛ ma da Goyiŋ lɔii ŋɔkâloŋ Tidai-ni dítãi ma,

²dí kɔ́ pɛ̀lɛ Sodɔŋ kaloŋ Bera ma da Gomora kaloŋ Bɛsa, da Adama kaloŋ Sina da Zeƃoyiŋ kaloŋ Simebɛ, é pɛ́lɛ Bela (ǹyaa ƃa Zoa) lɔii ŋɔkâloŋ ma.

³Nya ƃe ǹûai ŋí kélee dí kòyaŋ Sidiŋ tiŋ-tiŋ su, nyii da dòli a Ǹyúo Saai.

⁴Dí tíi kɛ̀ Kedolaomɛ mì a kóraŋ puu káo feerɛ, kɛ́lɛ góraŋ buu káo saaƃai su dí tɔ̀ɔ mà.

⁵Góraŋ buu káo náaŋ su Kedolaomɛ da gâloŋ-ŋai kélee kɛ̀ bôlui, dí pà dí Lefa-ŋai yée-mɛi ɣále ƃɛ́i da nàa tòli a Asero Kanayiŋ, dí Zuzi-ŋai lókwa ƃɛ́i da nàa tòli a Aaŋ, dí Emi-ŋai yée-mɛi ɣále ƃɛ́i da nàa tòli a Kiriatayiŋ ŋɔtiŋ-tiŋ sui.

⁶Dí Ori-ŋai yée-mɛi ɣále ǹyée lɔii su da nàa tòli a Sɛi, dí seri Ɛɛ-paraŋ, nyii gáa vɛ̃ɛ-kpâlaŋ koyaŋ mai.

⁷Dí pène pôlu dí pá Imisipa, ƃɛ́i da nàa tòli máŋ a Kedɛi, dí Amaleki-ŋai dílɔii kélee síɣe. Dí Amɔra-ŋai yée mɛi ɣále máŋ, nyii-ŋai kɛ̀ Azazo Tamai.

⁸Nya ƃe Sodɔŋ kaloŋ da Gomora kaloŋ, Adama kaloŋ da Zeƃoyiŋ kaloŋ é pɛ́lɛ Bela (ǹyaa ƃa Zoa) kaloŋ ma, dí lì dí kɔ́ pɛ́lɛ

⁹Elaŋ kaloŋ Kedolaomɛ ma da Goyiŋ kaloŋ Tidai, Babelɔŋ kaloŋ Amalafɛ é pɛ́lɛ Ilasa kaloŋ Alio ma Sidiŋ tiŋ-tiŋ kɔlɛ. Kâloŋ náaŋ dí tɔ̀ɔ kâloŋ lɔ́ɔlu mâ.

¹⁰Ǹyaŋ lóa siŋɔɔ támaa è kɛ̀ Sidiŋ tiŋ-tiŋ kɔlɛ. Tãi Sodɔŋ da Gomora kaloŋ-ŋai dí pù lai, da-ni dí tòo ǹoa-ŋai su, gbéli-ŋai dí pù dí lí ǹyéei su.

¹¹Nya ƃe díkpɔara-ƃelai dí Sodɔŋ da Gomora sãai kélee sìɣe da dímii-sãai, dí lí a dîa.

¹²Dí Eberaŋ ǹêɣe lóŋ La nyii kɛ̀ máŋ Sodɔŋ da ǹyée-ŋa-sãai kélee sìɣe.

¹³Ǹûai pûi, dɔnɔ è pà é Ibulu kaloŋ Eberaŋ kíli ŋá pono. Eberaŋ ŋɔsua kɔlɔ seɣe pɛrɛi è kɛ̀ Amɔra-nuui Mamera ŋɔwúru maa waa-ŋai kɔlɛ. Mamera è kɛ̀ a Isekɔ da Anɛ-ni dília. Dí kɛ̀ a Eberaŋ ŋɔkpɔŋ-maa-ƃela.

¹⁴Tãi Eberaŋ è mɛ̀ni la a gɛɛ da ŋɔkáayɔi sóŋ a kɔ-sôŋ, è ŋɔkúluƃa ŋuŋ saaƃa pôlu puu káo lɔ́ɔlu mɛi saaƃai (318) sìɣe nyii-ŋai kɛ̀ ŋɔpɛ́rɛi mui, da dîa-ni dí lɛ́ɛ gâloŋ-ŋai pôlu dí lí Daŋ.

¹⁵Nya ƃe è díŋaa kɔ̀lɛ gbínii su, da ŋɔyée-mu-ƃelai dí díkpɔara-ƃelai yée mɛi ɣále dí díkpɛ dí lɛ́ɛ dípôlu dí seri Oba, ƃɛ́i nàa káa Dɛmɛika ŋûa-perei.

¹⁶Nya ƃe è pà pôlu a zãâi kélee da ŋɔkáayɔi La ŋɔsãai da nɛyâai é pɛ́lɛ ǹûai dîa.

¹⁷Tãi Eberaŋ è kùla la Kedolaomɛ da gâloŋ-ŋai kɛ̀ gɔlɛ díyee mɛi ɣále siai mai, Sodɔŋ kaloŋ è lì dúɛ tɔɔ̂i Savɛ tiŋ-tiŋ su (ƃɛ́i da nàa tòli a Gâloŋ ŋɔtiŋ-tiŋ).

¹⁸Salɛŋ Kaloŋ da dòli a Mɛkisɛdɛi, è pà bɔ́ a kpólo da ŋwãai. È kɛ̀ a Ɣâla nyii Màa Tɛ̂ɛi a Gɛ́tɛi, ŋɔsâla-laa soŋ-nuui.

¹⁹Nya ƃe è lûwa làa Eberaŋ ma ǹyɛɛi, “Ɣâla nyii Màa Tɛɛ̂i a Gɛ́tɛi, nyii ŋ̀elei kpɛ̀tɛ da ǹɔii ŋɔlûwai é kɛ́ Eberaŋ ma!

²⁰Lûwa é kɛ́ Ɣâla ma nyii màa tɛɛ̂i a gɛ́tɛi, nyii íkpɔara-ƃelai tôo íyêei!” Nya ƃe Eberaŋ è zãâi kélee buu-ɣelei tɛ̀ɛ Mɛkisɛdɛ pɔ́ nyii è gùla yêei kɛ̂i.

²¹Nya ƃe Sodɔŋ kaloŋ è mò Eberaŋ ma ǹyɛɛi, “Ŋánûai tɛ́ɛ ḿbɔ, í zãâi síɣe a ípɔɔ.”

²²Kɛ́lɛ Eberaŋ è mò ma ǹyɛɛi, “Ŋa ḿvoo Yâwɛɛ yêei nyii Màa Tɛɛ̂i a Gɛ́tɛi, nyii ŋ̀elei kpɛ̀tɛ da ǹɔii,

²³a gɛɛ fé yee-karo tɔnɔ kpîŋ, kpaa máŋ kɔlɔ-ɣɛli da sɛŋ kélee sìɣe nyii gáa a ípɔɔi, ífa la mó la yɛ̂ɛi, ‘Ńyãa ƃé Eberaŋ tɔ̀ɔ.’

²⁴Fé pâi sɛŋ da kélee siɣêi é kúla mii-sɛŋ pôlu nyáŋkpa-ŋai dí mìi, da zãâi ǹûai kwa dîa-ni kú lìi, dí ŋáa kɔ̀lɛ díloai. Maa-ƃelai ƃa Anɛ, Isekɔ da Mamera. Tɔɔ dí díwɔ sãai sɔlɔ ƃó.”