Read Kpelle Zɛnɛse 15 Bible Online

Zɛnɛse 15 - Kpelle bible

Zɛnɛse 15

¹Mɛni-ŋai ŋí kélee pôlu ma, Yâwɛɛ è lòno Eberaŋ pɔ́ zĩ̂a su ǹyɛɛ mai, “Eberaŋ, ífe yào. Ŋa pâi ímaa kɔ̃ɔ̂i. Ífela-fei a pâi kɛ̂i a gɛ́tɛ.”

²Kɛ́lɛ Eberaŋ è mò ma ǹyɛɛi, “Óo Yâwɛɛ Ɣâla, lé ƃé ƃa pâi dɛ̂ɛi ḿbɔ, kpɛ́ni fêi, fé pâi lóŋ maa sɔlɔ ƃôi? Ǹúui ŋ́gɔ̃liŋ a pâi lɛɛ̂i ǹyêei ǹyaa ƃa Iliezɛ nyii kùla Dɛmɛikai?”

³Eberaŋ è mò ma ŋɔ́nɔ ǹyɛɛi, “Gáa, ífe lóŋ tɛ̀ɛ ní ḿbɔ. Ǹúɛi gáa ŋápɛrɛi mui, ǹyaa ƃé pâi lɛɛ̂i ŋ́gɔ̃liŋ mɛi.”

⁴Nya ƃe Yâwɛɛ è lòno bɔ́ ǹyɛɛ mai, “Nalôŋ ŋí fé pâi lɛɛ̂i íkɔ̃liŋ mɛi. Íkpîŋ lóŋ ƃé pâi lɛɛ̂i íkɔ̃liŋ mɛi.”

⁵Nya ƃe Ɣâla è kùla la ŋ̀énii ŋá ǹyɛɛ mai, “Ŋ̀élei su káa à kɛ̀ ƃà pɔ̂ri bɛ̂mɛlɛŋ-káo-ŋai lônoi, í dílono. Bere ƃé ísuui a pâi tâmai la.”

⁶Nya ƃe è làa a Yâwɛɛ. Ǹyaŋ Yâwɛɛ è ŋɔlaa-lai sìɣe a tɔ̃yâ-laa.

⁷Nya ƃe è mò ma ǹyɛɛi, “Ńyãa ƃa Yâwɛɛ nyii íkùla Babelɔŋ-ŋai dítaai su da kɛ̂ ma Ɔɔi, ŋá pá a yá a gɛɛ ŋá ǹɔii ŋí tɛ́ɛ ípɔ a ípɔɔ.”

⁸Kɛ́lɛ Eberaŋ è mò ma ǹyɛɛi, “Óo Yâwɛɛ Ɣâla, ŋa pâi gɔ́lɔŋ-pere kɛ̂i léŋ a gɛɛ ǹɔii a pâi kɛ̂i a ḿbɔɔ?”

⁹Yâwɛɛ è mò ma ǹyɛɛi, “Pá mî a kóraŋ saaƃa niŋa loŋ, da kóraŋ saaƃa ƃoli saa, da kóraŋ saaƃa ƃala-sirɛ da tòloŋ tɔnɔ é pɛ́lɛ pôpo loŋ ma.”

¹⁰Nya ƃe è pà a dîa bɔ́ é dípaa é dísu tée a gbua feerɛ-feerɛ, é gbua láa tɛi-tɛi gîe-ni téniŋ ma, kɛ́lɛ vé ŋɔni-ŋai su tée ní.

¹¹Tãi ŋɔni-ŋai dí pà la a gɛɛ dí zua poma-ŋai lúu kpélei, Eberaŋ è díkpɛ̀.

¹²Tãi vólo-kaoi è kɛ̀ kpɛɛ̂i la ɣele mai, Eberaŋ è pìli nyii su kôya su. Ǹyaŋ kpíni kɛ́tɛ è tòo ma.

¹³Nya ƃe Yâwɛɛ è mò Eberaŋ ma ǹyɛɛi, “Dɔ̃yâi ŋí kɔ́lɔŋ a gɛɛ ísuui su-ƃela da pâi kɛ̂i a ŋɔ̃ya-ŋa lɔii da su nyii vé a dípɔɔi. Da pâi kɛ̂i naa a luɛ-ŋa. Da pâi dímɔ̃lɛi naa kóraŋ ŋuŋ náaŋ (400) yée mu.

¹⁴Kɛ́lɛ ǹɔii-ŋuŋ da pâi tíi kɛ̂i mîi, ŋa pâi ŋɔmɛnii ŋá teêi. Nyíŋi pôlu ma, da pâi kulâi naa a tɔɔ-laa su kɛ́tɛ.

¹⁵A kɛ̀ a yá, ƃa pâi liî ínâŋ-ni pɔ́ lii-see su. Ƃa pâi pɔlɔ̂i a ŋánaa í lɛ́ɛ saâi.

¹⁶Ílônii díwɔ̂ lonii lônii díɣeniɛi su, da pâi pâi pôlu ƃɛ́, kpɛ́ni fêi, Amɔra-ŋai díŋwana-lɔɔi fé niî kpɛɛ ní.”

¹⁷Tãi vólo-kaoi è tòo la gbínii é pɛ́lɛi, ŋɔŋ-luru da ŋɔŋ-soŋ dí tɛ̀ɛ zua kpua-ŋai ŋí loai.

¹⁸Maa ɣelei tí Yâwɛɛ è góno tèe Eberaŋ yèei ǹyɛɛ mai, “Ŋa ǹɔii ŋí tɛ́ɛ ísuui pɔ́ é kúla Ize lɔii kóyaŋ ma é seri Yufeletii Ya-leei mâ nyii gáa a

¹⁹Keena-ŋai, Kɛniza-ŋai, Kamoni-ŋai,

²⁰Ita-ŋai, Pɛriza-ŋai, Lefa-ŋai,

²¹Amɔra-ŋai, Keena-ŋai, Gigasa-ŋai da Zɛbusi-ŋai dílɔii.”