Read Kpelle Zɛnɛse 16 Bible Online

Zɛnɛse 16 - Kpelle bible

Zɛnɛse 16

¹Eberaŋ ŋɔnɛnîi, Serai fé lóŋ maa sɔlɔ ƃó ní mì. Ize nɛni tɔnɔ ƃé kɛ̀ Serai yêei nyii da kâa dòli a Eega.

²Nya ƃe Serai è mò Eberaŋ ma ǹyɛɛi, “Gáa Yâwɛɛ fé gɛ́ ní a gɛɛ ŋá lóŋ maa sɔlɔ ƃó. Ńyee mu-nɛnii síɣe é kɛ́ íyêei. Tãi da ŋa pâi nîa-pɛlɛɛ maa sɔlɔ ƃôi zârai.” Nya ƃe Eberaŋ è ŋɔnɛnîi wóo sìɣe a tɔ̃yâ.

³Eberaŋ kɛ́ɛ Keena lɔii su a kóraŋ puui, ŋɔnɛnîi Sârai è ǹyée mu-nɛnii Eega sìɣe naa pôlu ma, nyii kɛ̀ a Ize nɛnîi, é dɛ́ɛ ŋɔsurɔ̂ŋ Eberaŋ pɔ́ a ŋɔnɛnî.

⁴Nya ƃe Eberaŋ è lɔ̀ a Eega pɔ̂rɔŋ, é koo síɣe. Tãi Eega è gàa la a gɛɛ a koo síɣei, vé ŋɔ́nɔ kɛ́ ní ƃaa-kɛ-maa tɛɛ̂i ŋɔmɛi-nuui Sârai pɔ́.

⁵Nya ƃe Sârai è mò Eberaŋ ma ǹyɛɛi, “Ímaa-mɛni ƃa mɛni nyɔ́mɔɔi ŋí kɛ̂i a ńyãai. Ŋá ńyee mu-nɛnii tɛ̀ɛ ípɔ, kɛ́lɛ tãi è gàa la a gɛɛ a koo síɣei, vé ŋɔ́nɔ ƃaa-kɛ-maa tɛɛ̂i ḿbɔ. Tɔɔ Yâwɛɛ é kúloai mɛni ŋá tée!”

⁶Kɛ́lɛ Eberaŋ è mò Sârai ma ǹyɛɛi, “Gáa, wála-wala káa íyêei íyee mu-nɛnii mɛi. M̀ɛnii ƃa ŋ̀wɛ̂lii í gɛ́ lai, gɛ́ la.” Nya ƃe Sârai è ŋ̀ɛ́i sèe ma é pú.

⁷Yâwɛɛ ŋɔkélai è Eega kàa ya-loa da kɔlɛ vɛ̃ɛ-kpâlaŋ su. Ǹya-loai ŋí è kɛ̀ Suɔ perei ma.

⁸Nya ƃe Ŋ̀âla-taa-kelai è mò mà ǹyɛɛi, “Sârai yée-mu-nɛnii Eega, ƃa kulâi mí, ƃa liî mí?” Eega è mò ma ǹyɛɛi, “Ŋa pûi, ŋá kúla ḿɛi-nuui Sârai yèei.”

⁹Ŋ̀âla-taa-kelai è mò ma ǹyɛɛi, “Pene pôlu ímɛi-nuui pɔ́ í kɛ́ mu.”

¹⁰Ŋ̀âla-taa-kelai è ŋɔ́nɔ mò mà ǹyɛɛi, “Ŋa pâi ísuui su kɛ̂tɛi a sɛŋ núu fa pɔ̂ri ǹônoi.”

¹¹Ŋ̀âla-taa-kelai è mò mà ŋɔnɔ ǹyɛɛi, “Gáa íkoo káa yâ, ǹyaŋ ƃa pâi lóŋ-surɔ̂ŋ maa sɔlɔ ƃôi. Ƃa pâi ǹáa seêi a Isimai. Kpɛ́ni fêi, Yâwɛɛ a ŋ̀óli tɔ́ɔ ímɛni-solii ma.

¹²A pâi kɛ̂i a lii nyɔ̂ŋ-goi nuu. Ǹyée a pâi kɛ̂i núu kélee mâ. Núu kélee yée kɛ́ ƃô mà. A pâi tɔɔ̂i ŋɔnûai kélee dîa.”

¹³Yâwɛɛ nyii lòno Eega pɔ́i, Eega è ǹáa sèe a Ǹúu Káa Ɣâlai, kpɛ́ni fêi, è mò ǹyɛɛi, “Ŋá Ɣâla kàa a tɔ̃yâ ŋá lɛ́ɛ a ḿvulu gáa pôlu mai?”

¹⁴Mɛni ma dí nya-loai tòli a Vúlu-laa Ɣalai ŋɔya-loai. Gáa Kedɛ da Bere loai.

¹⁵Nya ƃe Eega è lóŋ-surɔ̂ŋ maa sɔlɔ ƃô Eberaŋ mì, Eberaŋ é ǹóŋ láa sée a Isimai.

¹⁶Eberaŋ è kɛ̀ a kóraŋ buu lɔ́ɔlu mɛi saaƃa káo lɔ́ɔlu mɛi da a tãi Eega è Isimai maa sɔlɔ ƃô la mìi.