Read Kpelle Zɛnɛse 18 Bible Online

Zɛnɛse 18 - Kpelle bible

Zɛnɛse 18

¹Nya ƃe Yâawɛ è kùla Eberaɣɛ̃ɛ ŋɛ́i tãi è kɛ̀ seeni la Mamera wuru-ŋai mu ŋɔsua kɔlɔ seɣe pɛrɛi láƃelei vóloi ŋái.

²È ŋuŋ mu sìɣe é nàa káa, ǹyaŋ è kpakolo saaƃa kàa tɔɔni ŋ̀ɛ́i. Tãi è díkàa lai, è kùla ŋɔsua kɔlɔ seɣe pɛrɛi láƃelei a kîrɛ é lí é díla koyâŋ. È tôo ǹɔii ma

³ǹyɛɛi, “Ŋánuu-namui, à kɛ̀ ílii lâai ḿaa mɛni ma, ífe tɛ̀ɛ ḿâ ńyãai a íyee mu-nuui.

⁴Tɔɔ dí pá a yá loŋ ká kákɔɔ maa wáa, ká káfii tɔ́ɔ ŋ̀úrii mu.

⁵Tãi kâ pá la ḿbɔ naa ńyãai a káyee mu-nuui, ŋa pâi kpólo loŋ kpɛtɛ̂i kâa. Ká kálii maa sóŋ ká lɛ́ɛ pâi tɛɛ̂i.” Nya ƃe dí mò ma dîyɛɛi, “Gɛ́ yɛ̂ɛ berei í mò lai.”

⁶Nya ƃe Eberaɣɛ̃ɛ è lì zua kɔlɔ seɣe pɛrɛi mu a maa félaa Seera pɔ́ naa, é mó ma ǹyɛɛi, “Zɛŋ kɔ̂ɔŋ kɔpui síɣe í félaƃa kɔ̂ɔŋ zu saaƃa í kpólo kpua saaƃa kpɛ̀tɛ a maa félaa.”

⁷Nya ƃe Eberaɣɛ̃ɛ è lì ŋɔniŋa-ŋai sáma é zolaŋ tɔnɔ soŋ zu é dɛ́ɛ ŋɔyée mu-nuui pɔ́ a gɛɛ é gbɛ̀tɛ a maa félaa.

⁸Nya ƃe Eberaɣɛ̃ɛ è pà a niŋa ŋíni-ya kpona da niŋa ŋíni-ya é pɛ́lɛ niŋa sua ma è gbɛtɛ dímɛni mai, é zee díŋɛi. È tɔ̀ɔ díkɔlɛ ŋ̀úrii mu díkɛ dílaa mìi.

⁹Dí mò ma dîyɛɛi, “Ínɛnîi Seera kɔɔ?” Nya ƃe è mò dîa ǹyɛɛi, “Gáa zua kɔlɔ seɣe pɛrɛi mu.”

¹⁰Ŋ̀ɔ̃yai dɔnɔ è mò ǹyɛɛi, “Kóraŋ tɔnɔ à tɛ̀ɛ ŋa pâi pâi pôlu ƃɛ́, ǹyaŋ ínɛnîi Seera a pâi lóŋ-surɔ̂ŋ maa sɔlɔ ƃôi.” Seera wóli è kɛ̀ a dɔɔ zua kɔlɔ seɣe pɛrɛi láƃelei Eberaɣɛ̃ɛ pôlu-pere.

¹¹Eberaɣɛ̃ɛ da Seera dí nâa kɛ̀ a dípɔlɔɔ. Seera ŋɔlóŋ káa tãi è nâa tɛ̀ɛ.

¹²Nya ƃe Seera è ɣɛ̀lɛ goi pere ǹyɛɛi, “Ŋa nâa pɔlɔ, ŋásurɔ̂ŋ a pɔlɔ, ŋa pɔ̂ri lóŋ kâai?”

¹³Yâwɛɛ è mò Eberaɣɛ̃ɛ ma ǹyɛɛi, “Seera è ɣɛ̀lɛ lé mɛni ma, gɛ́ mò ǹyɛɛ, ‘Ŋa pɔ̂ri ŋɔ́nɔ lóŋ kâai ǹyaŋ ŋa nâa pɔlɔi?’

¹⁴Mɛni da káa naa gbanaŋɔ̂ɔi Yâwɛɛ ma? Kóraŋ tɔnɔ à tɛ̀ɛ ŋa pâi pâi pôlu ípɔ. Ǹyaŋ ínɛnîi Seera a pâi lóŋ-surɔ̂ŋ maa sɔlɔ ƃôi.”

¹⁵Kɛ́lɛ Seera è zîa tòo, kpɛ́ni fêi, è kɛ̀ yaôi, ǹyɛɛ, “Fé ɣɛ́lɛ ní.” Kɛ́lɛ ŋɔ̃ya nalôŋ è mò ma ǹyɛɛi, “Kpao, í ɣɛ̀lɛ.”

¹⁶Nya ƃe ǹûai dí kùla naa dí lí a Sodɔŋ pere. Ǹyaŋ da Eberaɣɛ̃ɛ-ni dí lì a gɛɛ é dípu a pere.

¹⁷Yâwɛɛ è mò ǹyɛɛi, “Fé pâi mɛnii loôi Eberaɣɛ̃ɛ ma nyii ŋa pâi gɛ̂i,

¹⁸Eberaɣɛ̃ɛ ŋɔsuui a pâi kɛ̂i a lɔii-ŋuŋ kɛ́tɛ. Ǹɔii-ŋuŋ-ŋai kélee da pâi lûwa sɔlɔ ƃôi zârai.

¹⁹Kpɛ́ni fêi, ŋá nɛ̀ a gɛɛ é ǹônii da ŋɔpɛ́rɛi mu-ƃelai kɛ́ dí ŋápɛrɛi mɛi káa bôlu ma a tɔ̃yâ-mɛni kɛ́ɛ da teniŋ-mo laa, a gɛɛ ŋá gbanaŋ-wooi ŋàa-see kɛ́ ŋá gɛ̀ Eberaɣɛ̃ɛ yêei.”

²⁰Nya ƃe Yâwɛɛ è mò ǹyɛɛi, “Berei ŋa wɔ́lɔ-woo mɛnîi la a Sodɔŋ da Gomora láa dísɔnyɔ̂ŋ su kɛ́tɛi mɛni mai,

²¹ŋa pâi liî naa ŋá gáa à kɛ̀ m̀ɛni-ŋai ŋí díkaa a tɔ̃yâ. À kɛ̀ vé tí, ŋa pâi gɔ̂lɔnii.”

²²Nya ƃe zinâai dí kùla naa pere dí lí a Sodɔŋ pere. Kɛ́lɛ Eberaɣɛ̃ɛ è kɛ̀ niî tɔɔni Yâwɛɛ ŋɛ́i-tuɛ.

²³Nya ƃe Eberaɣɛ̃ɛ è lɛ̀ɣɛ Yâwɛɛ kɔlɛ, ǹyɛɛ mai, “Ƃa pâi dɔ̃yâ-ƃelai su karâi da ŋwana-lɔ̂ɔ-ƃelai gîe ma?

²⁴À kɛ̀ ǹyaŋ tɔ̃yâ-ƃela buu lɔ́ɔlu (500) da kɛ̀ taa tɔnɔ su, ƃa pâi nàa su karâi, ífe pâi naa malôŋ kâai dɔ̃yâ-ƃela buu lɔ́ɔlui mɛ̂ni ma, nyii-ŋai díkaa naai?

²⁵Nyíŋi fé kɛ̀ tí a gɛɛ í ŋwana-lɔ̂ɔ-ƃelai su kara da dɔ̃yâ-ƃelai gîe ma, a gɛɛ dɔ̃yâ-ƃelai dí mɛni-soli káa ŋwana-lɔ̂ɔ-ƃelai sârai. Nyíŋi fé kɛ̀ tí. Vé a sɛŋ a gɛɛ ŋ̀éniɛi kélee ŋɔmɛni ŋa-tee-nuui é tɔ̃yâ mɛni kɛ́?”

²⁶Nya ƃe Yâwɛɛ è mò ma ǹyɛɛi, “A kɛ̀ ŋà tɔ̃yâ-ƃela buu lɔ́ɔlu kàa Sodɔŋ, gɛ̀ ní ŋa pâi naa malôŋ kâai dímɛni ma.”

²⁷Eberaɣɛ̃ɛ è ŋ̀óo su tòo ǹyɛɛi, “Gáa, ńyãai ŋ́gaa nɔ́ a pɔ̂rɔ da lúui, ŋa ńii kpéle ŋa lóno Yâwɛɛ pɔ́.

²⁸À kɛ̀ ǹyaŋ dɔ̃yâ-ƃela buu lɔ́ɔlui ŋí ǹɔ́ɔlu fé naa, ƃa pâi daai su karâi ǹúu lɔ́ɔlui ŋí mɛni ma kùla buu lɔ́ɔlui mai?” Nya ƃe è mò ma ǹyɛɛi, “Fé pâi daai su karâi à kɛ̀ ŋà tɔ̃yâ-ƃela buu náaŋ káo lɔ́ɔlu kàa naa.”

²⁹È ŋɔ́nɔ lòno bɔ́ ǹyɛɛ mai, “A kɛ̀ tɔ̃yâ-ƃela buu náaŋ nɔ́ ƃé naai?” È mò ma ǹyɛɛ, “Fé pâi nàa su karâi à kɛ̀ a tɔ̃yâ-ƃela buu náaŋ kàa naa.”

³⁰È mò ǹyɛɛi, “Óo Yâwɛɛ, ílii fé ŋwàna, à kɛ̀ ŋà lòno ŋɔ́nɔ. À kɛ̀ buu saaƃa à kɛ̀ naa?” È zu tòo ǹyɛɛi, “Ŋà buu saaƃa kàa naa, fé pâi nàa su karâi.”

³¹Eberaɣɛ̃ɛ è mò ǹyɛɛi, “Gáa, ŋa lóno Kúnuu-namui pɔ́ a lii-kpele. À kɛ̀ buu feerɛ à kɛ̀ naa?” È mò ma ǹyɛɛi, “Fé pâi nàa su karâi dímɛni ma.”

³²Nya ƃe è mò ŋɔ́nɔ ǹyɛɛi, “Óo Kúnuu-namui, ílii fé ŋwâna, ǹyaŋ ŋa pâi lônoi ŋɔ́nɔ. À kɛ̀ tɔ̃yâ-ƃela puu da kɛ̀ naa?” È mò ma ǹyɛɛi, “Fé pâi naa su karâi dɔ̃yâ-ƃela puui mɛni ma.”

³³Tãi Yâwɛɛ è kpɛ̀ɛ la a lónoɔɔ Eberaɣɛ̃ɛ pɔi, è lì. Eberaɣɛ̃ɛ ǹyaŋ é lí bɔ́ naa.