Read Kpelle Zɛnɛse 2 Bible Online

Zɛnɛse 2 - Kpelle bible

Zɛnɛse 2

¹Ŋ̀elei da ǹɔii dí nâa kpɛ̀ɛ a kpɛtɛ́ɛ da zu-sãai kélee.

²Díi-ŋai kélee Ɣâla è gɛ̀i è gélee kpɛ̀ɛ ŋ̀ele kûui mɛi feerɛ ɣelei é lɛ́ɛ pâi serîi. Gbɛɛ ŋɔtíi-ŋai kélee mai, è víi tɔ̀ɔ a ŋ̀ele-kuui mɛi feerɛ-ɣelei.

³Mɛni ma Ɣâla è lûwa làa ŋ̀ele-kuui mɛi feerɛ ɣelei ma é maa wáa. Kpɛ́ni fêi, maa ɣelei tí ƃé è víi tɔ̀ɔ la ŋɔɣéniɛi kpɛtɛ tîi kɛ́ɛ ma.

⁴Ŋelei da ǹɔii díkpɛtɛ-pere ká ŋí tãi Ɣâla è díkpɛ̀tɛ lai. Tãi Yâwɛɛ[1] Ɣâla è ǹɔii da ŋ̀elei kpɛ̀tɛ lai,

⁵kala da kélee fé niî kɛ̀ kula ní ǹɔii ma da wúru, kpɛ́ni fêi, Yâwɛɛ Ɣâla fé niî kɛ̀ tuna kɛ́ ní é pú ǹɔii ma. Ǹyaŋ núu-kpune fé kɛ́ ní naa a gɛɛ é tíi kɛ́ ǹɔii ma.

⁶Kɛ́lɛ yá è kùla ǹɔii mu é ǹɔii ŋɛ́i yɔɔ.

⁷Nya ƃe Yâwɛɛ Ɣâla è pɔ̂rɔ sìɣe ǹɔii ma é núu-kpune kpɛtɛ la, é vúlu-laa lɛwoi pú zũai. Nya ƃe núu-kpune è kɛ̀ a vúlu.

⁸Nya ƃe Yâwɛɛ Ɣâla è sûa kpɛ̀tɛ Idɛŋ, vóloi ƃelai-pere é nalôŋ pú naa nyii è gbɛ̀tɛi.

⁹Yâwɛɛ Ɣâla è gɛ̀ wúru-ŋa dí pɔmûŋ zûai su, nyii-ŋai dílɛlɛɛi mii mɛni ma. Vúlu-laa wurii máŋ è kɛ̀ zûai sáma da dáre wurii nyii gáa mɛni lɛ́lɛɛ da mɛni nyɔ́mɔɔ kɔ́lɔŋ mɛni mai.

¹⁰Ya-lee tɔnɔ è kùla Idɛŋ pere a gɛɛ é yá tɛ́ɛ zûai pɔ́. Ǹyaŋ naa ƃé ǹyá-leei ŋí ŋáa è kɔ̀lɛ naa é kɛ́ a ya-lee náaŋ.

¹¹Nya-leei maa-ŋuŋ láa ƃa Pisɔŋ nyii dínaŋɔ̂ɔi Avila lɔii ma ƃɛ́i gôo káa naai.

¹²Ǹyaŋ gôoi gáa ǹɔii tí sui, ǹɛ́lɛɛi. Gûyɛ wuru da kɔni sɔ̃ɔ kpanaŋɔɔ-ŋa káa naa.

¹³Nya-leei veerɛ-ɣelei láa ƃa Giɔŋ nyii dínaŋɔ̂ɔi Kusi lɔii mai.

¹⁴Nya-leei zaaƃai láa ƃa Taigiri nyii a lî Asiria lɔii vóloi ƃélai perei. Ǹya-lêei náaŋ-ɣelei láa ƃa Yufeletii.

¹⁵Yâwɛɛ Ɣâla è nalôŋ sìɣe é bú Idɛŋ sûai su a gɛɛ é tíi kɛ́ naa é naa mɛi káa.

¹⁶Yâwɛɛ Ɣâla è mò nalôŋ ma ǹyɛɛi, “ƃa pɔ̂ri zûai ŋí su-wuru-ŋai kélee m̀á mîi,

¹⁷kɛ́lɛ dáre-wurii nyii gáa mɛni lɛ́lɛɛ da mɛni nyɔ́mɔɔ kɔ́lɔŋ mɛni mai, ífe m̀á da mîi. Kpɛ́ni fêi, ŋ̀elei ƃa m̀á da mìi lai, ƃa pâi sâa títi ƃôi.”

¹⁸Nya ƃe Yâwɛɛ Ɣâla è mò ǹyɛɛ, “Vé lɛ́lɛ ní a gɛɛ nalôŋ é kɛ́ ƃɛ́ ǹyaa tɔnɔ. Ŋa pâi ŋɔkpɔŋ-maa-nuu lɛ́lɛɛ kɛ̂i ma é kɛ́ gɔlɛ.”

¹⁹Nya ƃe Yâwɛɛ Ɣâla è sua sîi kélee kpɛ̀tɛ a pɔ̂rɔ da ŋɔni-ŋai é pá a dia nalôŋ pɔ́ a gɛɛ é gáa berei a pâi dílaa seêi lai. Ǹyaŋ ǹáai nalôŋ è fúlu-sɛŋ tɛi-tɛi kélee tòli lai, ǹáa ká kɛ̀ tí.

²⁰Nalôŋ è taa-tulɛ kélee láa sèe, ŋɔni-ŋai da fúlu-sãa kélee gáa ǹɔii sui, kɛ́lɛ nalôŋ ŋɔkpɔŋ-maa-nuu fé kɛ́ ní naa a gɛɛ é kɛ́ gɔlɛ.

²¹Nya ƃe Yâwɛɛ Ɣâla è nalôŋ pîli nyîi a zu kôya. Tãi è kɛ̀ nyii lai, Ɣâla è geŋe kpãya-kao tɔnɔ kùla bɛ̂rɛ ma, é nàa láa tɛ́ a ǹuu.

²²Yâwɛɛ Ɣâla è nalôŋ keŋe-kpãya-kaoi sìɣe é nɛnî kpɛtɛ la, é pá la nalôŋ pɔ́.

²³Nya ƃe nalôŋ è mò ǹyɛɛi, “Gbɛɛ ŋái ǹúui ŋí káa a ŋ́gao, gɛ́ ƃò a ńuu. Tɔɔ dí dóli a ‘Nɛnî,’ kpɛ́ni fêi, è kùla surɔ̂ŋ kponôi.”

²⁴Mɛni ma surɔ̂ŋ a nâa ǹâŋ da ǹee lɛ̀ɛ é kánaŋ ŋɔnɛnîi ma, da ǹyaa dí kɛ́ a kpono tɔnɔ.

²⁵Nalôŋ da ŋɔnɛnîi dí kɛ̀ a díkaŋ, ǹyaŋ ŋumɛ fé kɛ́ ní díŋɛi.