Read Kpelle Zɛnɛse 21 Bible Online

Zɛnɛse 21 - Kpelle bible

Zɛnɛse 21

¹Yâwɛɛ è Seera nàa kàa yɛ̂ɛ berei è mò lai, é m̀ɛnii kɛ́ mì yɛ̂ɛ berei è góno tèe la ǹyêei.

²Seera è koo sîɣe é lóŋ-surɔ̂ŋ máa sɔlɔ ƃô Eberaɣɛ̃ɛ mì a bɔlɔ tãi, a tãi Ɣâla è lòno la bɔ́i.

³Eberaɣɛ̃ɛ è ǹóŋ ŋí láa sèe a Aise.

⁴Nya ƃe Eberaɣɛ̃ɛ è ǹóŋ Aise see kpono-mɛi a tãi è kɛ̀ la a fólo lɔ́ɔlu mɛi saaƃa, yɛ̂ɛ berei Ɣâla è mò la mai.

⁵Eberaɣɛ̃ɛ è kɛ̀ a kóraŋ ŋuŋ tɔnɔ (100) é lɛ́ɛ pâi Aise maa sɔlɔ ƃôi Seera mà.

⁶Nya ƃe Seera è mò ǹyɛɛi, “Ɣâla a ŋáɣɛlɛ-maa-ƃela kɛ́ ma. Ǹúui kélee pâi m̀ɛnii ŋí mɛnîi, a pâi ɣɛ̂lɛi.”

⁷È mò ǹyɛɛi, “Gbɛ̂ɛ ƃêi pɔ̂ri môi Eberaɣɛ̃ɛ ma a gɛɛ Seera a pɔ̂ri ŋíni tɛɛ̂i lóŋ pɔ́? Nya ká ŋaŋ ŋa lóŋ-surɔ̂ŋ káa mì a bɔlɔ tãi.”

⁸Nôloŋ è kɛ̀tɛ dí ǹá kúla ŋíni ma. Nya ƃe Eberaɣɛ̃ɛ è kúu kɛ́tɛ kɛ̀ a ǹóŋ lá kula ɣele ŋíni ma.

⁹Kɛ́lɛ Seera è Ize nɛnîi Eega ǹóŋ kàa nyii è gàa Eberaɣɛ̃ɛ mîi, gɛ́ pêle kɛ̀ a ǹóŋ Aise.

¹⁰Nya ƃe è mò Eberaɣɛ̃ɛ ma ǹyɛɛi, “Ǹúɛ-nɛnîi ŋí kpɛ́ da ǹóŋ a gɛɛ ǹóŋ da ńoŋ Aise dífa lâa kɛ́ la a kúkɔ̃liŋ nâmela.”

¹¹Ǹyaŋ m̀ɛnii ŋí fé kɛ́ ní a Eberaɣɛ̃ɛ líi láa mɛni ǹóŋ mɛni ma.

¹²Kɛ́lɛ Ɣâla è mò Eberaɣɛ̃ɛ ma ǹyɛɛi, “Ílii fé tòo pôlu ǹúɛ-nɛnîi ŋí mɛni ma da ǹóŋ. M̀ɛnii kélee Seera a mò yâi, gɛ́ yɛ̂ɛ berei è mò lai. Kpɛ́ni fêi, da pâi ísuui láa seêi Aise sârai.

¹³Kɛ́lɛ ŋa pâi ǹúɛ-nɛnîi ǹóŋ ŋɔsuui su kɛ̂tɛi máŋ. Kpɛ́ni fêi, gáa a íloŋ.”

¹⁴Nya ƃe Eberaɣɛ̃ɛ è mu sìɣe a ɣele-wala pɛpɛ é kpólo síɣe da yá sɛŋ-folo é dɛ́ɛ Eega pɔ́ é ǹôloŋ pomo Eega pôlu é díkula naa ma. Nya ƃe nɛnîi è lì gɛ́ sìa-sia Bɛɛsiba fɛ̃ɛ-kpalaŋ su.

¹⁵Tãi ǹyái è kpɛ̀ɛ la ǹya leɣii sui, ǹúɛ-nɛnîi è ǹôloŋ sèe kpɔlɔ mu.

¹⁶È lì é sée kwaa kôya ma, ƃɛ́i ŋɔkôya è kɛ̀ a yée kɔni pilìi. È mò ǹyɛɛi, “Fé ŋ̀wɛ̂lii a gɛɛ ŋá ńoŋ saâi káa.” Tãi nɛnîi è kɛ̀ seeni la naai, ǹôloŋ è wɔ̀lɔ a ŋ̀óo su kɛ́tɛ.

¹⁷Ɣâla è ǹôloŋ wɔ́lɔ-woo mɛ̀ni. Nya ƃe Ŋ̀âla-taa-kelai è Eega tòli ǹyɛɛ mai, “Eega, lé ƃé kɛ̂i a yá? Ífe yào, kpɛ́ni fêi, ƃɛ́i ǹôloŋ káa naai, Ɣâla a ŋ̀ɔ́lɔ-woo mɛni.

¹⁸Ímu siɣe í lí í ǹôloŋ síɣe í ŋ̀á-nɛnɛ, kpɛ́ni fêi, ŋa pâi ŋɔsuui su kɛ̂tɛi.”

¹⁹Nya ƃe Ɣâla è nɛnîi ŋɛ́i lá ƃò é ya-loa tɔnɔ káa. È lì é ŋɔya lêɣii lá fɛ́ɛ a yá é da tɛɛ ǹôloŋ pɔ́ é gbele.

²⁰Ǹyaŋ Ɣâla è kɛ̀ ǹôloŋ kɔlɛ é lɛ́ɛ la zu é ƃɔlɔ. È kɛ̀ vɛ̃ɛ-kpâlaŋ su é lɛ́ɛ naa é kɛ́ a kerâŋ pili-nuu lɛ́lɛɛ.

²¹È kɛ̀ Paraŋ fɛ̃ɛ-kpalaŋ su. Nya ƃe ǹee è nɛnî kùla mì Ize lɔii su.

²²Maa tãi tí su, Abimelɛ è lì a ŋɔkɔ-kuluƃa-ŋai mɛi-nuui Piko Eberaɣɛ̃ɛ pɔ́ naa ǹyɛɛ Eberaɣɛ̃ɛ mai, “Ɣâla káa ípôlu mɛni kélee su ƃa gɛ̀i.

²³Mɛni ma, ífoo ńyêei ƃɛ́ a Ɣâla a gɛɛ ífe pâi wôya kɛ̂i a ńyãa da ńônii kpaa máŋ ŋásuui da, kɛ́lɛ berei ŋa tûa la a yá a ǹɛ́lɛɛi, ƃa pâi tûai a ńyãa a ǹɛ́lɛɛ da ǹɔii íkaa zu a ŋɔ̃yai.”

²⁴Nya ƃe Eberaɣɛ̃ɛ è mò ma ǹyɛɛi, “Ŋa pâi ḿvôoi.”

²⁵Tãi Eberaɣɛ̃ɛ è ǹya-loai maa mɛnii làa la Abimelɛ ŋɛ́i, nyii Abimelɛ ŋɔtíi-kɛ-ƃelai dí zòŋ a wála-walai,

²⁶Abimelɛ è mò ǹyɛɛi, “Fé ǹúui kɔ́lɔŋ m̀ɛnii ŋí kɛ̀i, ífe mó ní ḿâ, ǹyaŋ fé niî mɛni da kɔ́lɔŋ ní é pîlaŋ mà fɛ̂ɛ sâa.”

²⁷Nya ƃe Eberaɣɛ̃ɛ è ƃála sìɣe da niŋa é dɛ́ɛ Abimelɛ pɔ́, dífeerɛŋɔɔ dí díkono tée díkîe-ni yèei.

²⁸Eberaɣɛ̃ɛ è ƃála-saa lɔ́ɔlu mɛi feerɛ kùla ŋɔƃála-ŋai sáma é dílɔ a dee.

²⁹Nya ƃe Abimelɛ è mò Eberaɣɛ̃ɛ ma ǹyɛɛi, “M̀ála-saa lɔ́ɔlu mɛi feerɛi ŋí í dílɔ̀ a deei, zu-kulai ƃa lé?”

³⁰È mò ma ǹyɛɛi, “Ƃa pâi m̀ála-saa lɔ́ɔlu mɛi feerɛi ŋí sɔlɔ ƃôi ńyêei a gɛɛ í kɛ́ a sêre a gɛɛ ńyãa ƃé ǹya-loai ŋí tèe.”

³¹Mɛni ma dí nàa láa sèe a Bɛɛsiba. Kpɛ́ni fêi, naa ƃé dífeerɛŋɔɔ dí dífoo naa gîe ma.

³²Nya ƃe dí kono-tee kɛ̀ Bɛɛsiba. Abimelɛ da ŋɔkɔ-kuluƃa-ŋai mɛi-nuui Piko dí dímu sìɣe dí lí pôlu Felesia-ŋai dílɔii su.

³³Eberaɣɛ̃ɛ è tamari wuru sì Bɛɛsiba, gɛ́ Yâwɛɛ fɛ̀li naa.

³⁴Nàa pôlu ma Eberaɣɛ̃ɛ è kɛ̀ Felesia-ŋai dílɔii su a ŋɔ̃ya a tãi su kôya.