Read Kpelle Zɛnɛse 26 Bible Online

Zɛnɛse 26 - Kpelle bible

Zɛnɛse 26

¹Puru è tòo ǹɔii su, é kúla nyii pôlu tòo Eberaɣɛ̃ɛ ŋɔtãi mai. Nya ƃe Aise è lì Gera, Felesia-ŋai díkâloŋ Abimelɛ pɔ́ naa.

²Yâwɛɛ è pà bɔ́ ǹyɛɛ mai, “Ífe lì Ize. Ǹɔii ŋa pâi nɛ̂i yâi, nàa ƃé í sée naa.

³Kɛ́ nɔ́ a ŋɔ̃ya ǹɔii ŋí su. Ŋa pâi kɛ̂i íkɔlɛ, ŋá lûwa láa yâ. Kpɛ́ni fêi, ŋa pâi ǹɔii-ŋai ŋí kélee tɛɛ̂i ípɔ ka ísuui. Ŋa pâi gbanaŋ-wooi ŋàa-see kɛ̂i nyii ŋá gɛ̀ ínâŋ Eberaɣɛ̃ɛ yêei.

⁴Ŋa pâi ísuui tâmai yɛ̂ɛ bɛ̂mɛlɛŋ-kaoi gáa ŋ̀elei sui. Ŋa pâi ǹɔii-ŋai ŋí kélee tɛɛ̂i ísuui pɔ́. Ǹɔii-ŋuŋ-ŋai kélee da pâi lûwa sɔlɔ ƃôi ísuui sârai.

⁵Kpɛ́ni fêi, Eberaɣɛ̃ɛ è ŋ́oo mɛ̀ni é ŋátɔ̂ŋ-ŋai mɛi káa é ŋália-wooi síɣe.”

⁶Nya ƃe Aise è sèe Gera.

⁷Tãi nàa-ƃelai dí marê kɛ̀ la ŋɔnɛnîi mɛni mai, è mò dîa ǹyɛɛi, “Gáa a ńzâaƃɔlɔ.” Kpɛ́ni fêi, è kɛ̀ yaôi a gɛɛ é mó a gɛɛ gáa a ŋɔnɛnî. È kɛ̀ gíli ŋá siâi a gɛɛ ǹûai da pâi baâi Lubɛka mɛni ma. Kpɛ́ni fêi, è kɛ̀ a ǹɛ́lɛɛ.

⁸Tãi è tùa la naai, Felesia-ŋai díkâloŋ Abimelɛ è ŋɔwênai lá kàa é Aise káa gɛ́ nɛnî pele pù a ŋɔnɛnîi Lubɛka.

⁹Nya ƃe Abimelɛ è Aise tòli ǹyɛɛ mai, “Ínɛnî ká tí a tɔ̃yâ. Í mò kûa a gɛɛ gáa a ísâaƃɔlɔ, lé mɛni ma?” Aise ǹyɛɛ mai, “Ŋá kɛ̀ yaôi a gɛɛ káfa lâa ḿbaa la mɛ̀ni ma.”

¹⁰Abimelɛ ǹyɛɛ mai, “Í nyíŋi kɛ̀ a kúa lé mɛni ma? Ŋánûai da eî pɔ̀ri ínɛnîi kɛ̂i ǹyêei, ǹyaŋ îi pâi kukɛ̂i kú sɔnyɔ̂ŋ kɛ́.”

¹¹Nya ƃe Abimelɛ è ŋɔnûai kélee lia-woo ƃò ǹyɛɛ diai, “Ǹúui kélee pâi lɛɣɛ̂i nalôŋ ŋí ma kpaa máŋ ŋɔnɛnîi, da pâi maa nuui paâi.”

¹²Aise è sí-sɛŋ sì ǹɔii tí su, é m̀á kula-laa kɛ́ a ŋuŋ tɔnɔ (100) góraŋ tɔnɔ yée mu, kpɛ́ni fêi, Ɣâla è lûwa làa ma.

¹³Aise è nâa pɛ̀lɛ sɛŋ sɔlɔ ƃóɔɔ ma é lɛ́ɛ la zu é tɔ́ɔ kpɔ́ a zu kɛ́tɛ.

¹⁴Ƃála da taa-tulɛ támaa dí kɛ̀ ǹyêei, ŋɔpɛ́rɛi mu-ƃelai támaa. Felesia-ŋai dí kɛ̀ tólo kulâi ma.

¹⁵Felesia-ŋai dí ǹya-loa-ŋai kélee lá fɛ̀ɛ a pɔ̂rɔ, nyii-ŋai ǹâŋ Eberaɣɛ̃ɛ yée mu-ƃelai dí wɔ́lɔ dèe a ŋɔtãi.

¹⁶Abimelɛ è mò Aise ma ǹyɛɛi, “Kula kúsama í lí. Wála-wala-laa támaa káa íyêei é tɛ́ɛ kûa.”

¹⁷Nya ƃe Aise è kùla naa é ŋɔƃûui tɔ́ɔ Gera tiŋ-tiŋ su, é sée naa.

¹⁸Ǹya-loa pɔlɔ-ŋai dí wɔ́lɔ dèe Eberaɣɛ̃ɛ ŋɔtãi mai, Aise è gélee su kùla. Kpɛ́ni fêi, Felesia-ŋai dí díla fɛ̀ɛ máŋ a pɔ̂rɔ Eberaɣɛ̃ɛ saa pôlu ma. Náa-see-ŋai Eberaɣɛ̃ɛ è wɔ́lɔ zèe ǹya-loa-ŋai ŋí diai, dîa nɔ́ ƃé Aise è zèe dîa.

¹⁹Kɛ́lɛ tãi Aise yée-mu-ƃelai dí ya-loa da kpɛ́ni tèe la dí yá káai,

²⁰daa-tulɛ mɛi-kaa-ƃelai kɛ̀ Gerai dí laa-saa pɛ̀lɛ Aise ŋɔtaa-tulɛ mɛi-kaa-ƃelai dîa m̀ɛni ma. Dí mò dîa dîyɛɛ, “Ǹyái káa a kúpɔɔ.” Nya ƃe Aise è ǹyái láa sèe a “Laa-saa,” kpɛ́ni fêi, dí laa-saa pɛ̀lɛ dîa mɛ̀ni ma.

²¹Nya ƃe dí ŋɔ́nɔ ya-loa da kpɛ́ni tèe, dí laa-saa kɛ́ mɛi ŋɔ́nɔ. Nya ƃe è ǹáa sèe ŋɔ́nɔ a “Kpɔara.”

²²È kùla naa é ya-loa nina tée. Dífe laa-saa kɛ́ ní nyíti mɛi. Mɛni ma è ǹáa sèe a “Ŋ̀uŋ-ma-ƃo” ǹyɛɛi, “Kpɛ́ni fêi, Yâwɛɛ a nâa kwaa mâ kɛ́ naa kúmɛni ma, ǹyaŋ kwa pâi nâa ƃûu ƃôi ǹɔii su.”

²³Dí kùla naa dí lí Bɛɛsiba.

²⁴Yâwɛɛ è pà bɔ́ a maa kpínii tí ǹyɛɛ mai, “Ńyãa ƃa ínâŋ Eberaɣɛ̃ɛ Ŋɔɣâlai. Ífe yào, kpɛ́ni fêi, ŋ́gaa íkɔlɛ. Ǹyaŋ ŋa pâi lûwa làai yâ, ísuui é ƃûu ƃó ńyee-mu-nuui Eberaɣɛ̃ɛ sârai.”

²⁵Nya ƃe è Ɣâla-teƃele kpɛ̀tɛ naa, é Yâwɛɛ fɛli é ŋɔsua kɔlɔ seɣe pɛrɛi tɔ́ɔ naa. Naa ƃé Aise yée-mu-ƃelai dí ya-loa tèe naa.

²⁶Abimelɛ da ŋɔlia-woo ƃó-nuui Auza é pɛ́lɛ ŋɔkɔ́-kuluƃa-ŋai túɛ-nuui Piko ma, dí kùla Gera dí lí Aise pɔ́ naa.

²⁷Nya ƃe Aise è mò dîa ǹyɛɛi, “Ka pâi ḿbɔ naa lé mɛni ma? Ǹyaŋ ka ŋ́gbɔara ka ŋ́gula kásamai?”

²⁸Dîyɛɛ mai, “Kwa nâa gáa a gɛɛ Ɣâla káa íkɔlɛ. Mɛni ma kwa ŋ̀wɛ̂lii a gɛɛ kpanaŋ-woo é kɛ́ kwa kâa-ni kúloai, kú kúkono tée kúkîe-ni yêei,

²⁹a gɛɛ ífe pâi mɛni nyɔ́mɔɔ kɛ̂i a kúa yɛ̂ɛ berei kúfe lɛɣɛ ní la yâi. Kɛ́lɛ kú íkùla nɔ́ kúsama í lí lii-see sui. Ǹyaŋ Yâwɛɛ ŋɔlûwai káa yâ.”

³⁰Nya ƃe Aise è kúu kɛ̀ dîa, dí dílaa míi dí ŋwãai kpele.

³¹Dí dímu sìɣe a ŋ̀ele-wala pɛpɛi, dí díkono tée díkîe-ni yèei a gbanaŋɔɔ. Aise è dípu a pere dí lí lii-see su.

³²Maa ɣele tɔnɔi tí Aise yée mu-ƃelai dí pà dí ǹya-loai mɛni ƃó mà nyii dí dèei. Dí mò ma dîyɛɛi, “Kwaâ yá káa.”

³³Aise è ǹya-loai tòli a “Kono-Tee.” Maa mɛni ƃé daa-leei láa káa la sâa a Bɛɛsiba, zu-kulai ƃa “Gono-tee ya-loai.”

³⁴Tãi Isɔɔ è kɛ̀ la a kóraŋ buu náaŋ, è Ita-nuui Bɛɛri ǹóŋ-nɛnii Zudi kùla a nɛni da Ita-nuui Ilɔŋ ǹóŋ-nɛnii Basema.

³⁵Ǹyaŋ ǹûai ŋí dí Aise da Lubɛka líi su kàra mɛ̂ni támaa kɛ̀.