Read Kpelle Zɛnɛse 27 Bible Online

Zɛnɛse 27 - Kpelle bible

Zɛnɛse 27

¹Tãi Aise è pɔ̀lɔ lai ŋ̀ɛ́i fé ŋɔ́nɔ kɛ́ ní kwaa kâai. Nya ƃe è Isɔɔ tòli nyii kɛ̀ a ǹóŋ maa-ŋuŋ ǹyɛɛ mai, “Ńoŋ!” Ǹóŋ è ŋ̀óo su tòo ǹyɛɛ mai, “Ńyãa ká ŋí.”

²Aise ǹyɛɛ mai, “Gáa ŋa nâa pɔ́lɔ, ǹyaŋ fé ńzaa tãi kɔ́lɔŋ.

³Íkerâŋ síɣe da dɔ̃a í lí nɔ̀ɔi su í sua kɔ́ri mî,

⁴Í gbɛtɛ kpɔ́ a mii-sɛŋ yɛ̂ɛ berei ŋa ŋ̀wɛ̂lii lai, í pá la ŋá mii ŋá lûwa too yâ ŋá lɛ́ɛ saâi.”

⁵Ǹyaŋ Lubɛka è kɛ̀ ŋ̀óli tɔɔ̂i Aise ma tãi è kɛ̀ lônoi la Isɔɔ pɔ́i. Tãi nâa Isɔɔ è lì la nɔ̀ɔi su zuai kɔ̂rii,

⁶Lubɛka è mò ǹóŋ Zeeka ma ǹyɛɛi, “Ŋá ínâŋ wóo mɛ̀ni gɛ́ lòno ílîa Isɔɔ pɔ́ ǹyɛɛ mai,

⁷‘Sua páa í ŋíli a mii-sɛŋ yɛ̂ɛ berei ŋa ŋ̀wɛ̂lii lai, í pá la ŋá mii ŋá lûwa too yâ Yâwɛɛ ŋɛ́i ŋá lɛ́ɛ pâi saâi.’

⁸Mɛni ma, ńoŋ, mɛnii ŋa pâi môi yâi gɛ́.

⁹Lí daa-tulɛ kpului sáma, í ƃoli naɣa feerɛ sóŋ í dípaa í pá a dîa ŋá díkpɛtɛ a mii-sɛŋ ínâŋ mì yɛ̂ɛ berei a ŋ̀wɛ̂lii lai.

¹⁰Ƃa pâi liî la ínâŋ pɔ́ a gɛɛ é mii é lûwa láa yâ é lɛ́ɛ pâi saâi.”

¹¹Kɛ́lɛ Zeeka è mò ǹee Lubɛka ma ǹyɛɛi, “Ǹîa Isɔɔ kɔlɔ-leɣa káa ma, ńyaŋ ŋ́gɔlɔ-leɣa fé ḿâ.

¹²Tãi da ńâŋ a pâi ǹyée siâi ḿâ. Ǹyaŋ à gàa a gɛɛ ŋ́gaa moôi, gɛ̀ ní ŋa pâi foo-wôo sɔlɔ ƃôi lûwa pɔ́ ŋá.”

¹³Ǹee è mò ma ǹyɛɛi, “Ńoŋ, tɔɔ ífoo-wooi é kɛ́ ḿâ, kɛ́lɛ, ŋ́oo mɛni nɔ́. Lí í pá a zua-ŋai ḿbɔ.”

¹⁴Nya ƃe è lì é pá a dia ǹee pɔ́, ǹee é díkpɛtɛ a mii-sɛŋ yɛ̂ɛ berei ǹâŋ è kɛ̀ ŋ̀wɛ̂lii lai.

¹⁵Nya ƃe Lubɛka è Isɔɔ ŋɔseɣe-ŋai ǹɛ́lɛɛi sìɣe zu é doo ǹóŋ Zeeka ma.

¹⁶È m̀oli kɔlɔi sîɣe é bɛ́lɛ Zeeka yée ma é da pɛlɛ gɔŋ ma ƃɛ́i gɔlɔ-leɣa fé kɛ́ ní naai.

¹⁷Mii-sɛŋ è gbɛ̀tɛi, è nâa dɛ̀ɛ ǹóŋ Zeeka pɔ́ da gbóloi.

¹⁸Nya ƃe è lì ǹâŋ pɔ́ naa ǹyɛɛ mai, “Ńâŋ!” Ǹâŋ ǹyɛɛ mai, “Ńyãa ká ŋí. Gbɛ̂ɛ ƃa yá ńoŋ?”

¹⁹Zeeka è mò ǹâŋ ma ǹyɛɛi, “Íloŋ maa-ŋuŋ Isɔɔ ƃa ńyãa. Mɛnii í mò mai ŋâa gɛ́. Ímu síɣe í mii-sɛŋ míi í lûwa too ḿâ.”

²⁰Kɛ́lɛ Aise è mò ǹóŋ ma ǹyɛɛi, “Ǹóŋ, gɛ̀ɛi léŋ í zuai sɔlɔ ƃô a maa félaai?” È zu tòo ǹyɛɛi, “Kpɛ́ni fêi, Yâwɛɛ nyii gáa a Íɣâlai, è kpɔ̀ŋ ḿâ.”

²¹Nya ƃe Aise è mò Zeeka ma ǹyɛɛi, “Ńoŋ lɛɣɛ a ńyãa ŋá ńyee sía yâ ŋá gáa a kɛ̀ íkaa a ńoŋ Isɔɔ a tɔ̃yâ.”

²²Nya ƃe Zeeka è lɛ̀ɣɛ a ǹâŋ Aise. Aise é ǹyée sía mà ǹyɛɛi, “Íwoo kɛ̂ɛi yɛ̂ɛ Zeeka wóo, kɛ́lɛ íyee kɛ́ɛ yɛ̂ɛ Isɔɔ.”

²³Vé maa kpɛɛ ní, kpɛ́ni fêi, ǹyée è kɛ̀ nɔ́ yɛ̂ɛ ǹîa Isɔɔ yée. Nya ƃe è lûwa lâa ma.

²⁴È marê kɛ̀ ǹyɛɛ mai, “Ńoŋ Isɔɔ ƃa yá a tɔ̃yâ?” Ńyɛɛ mai, “Isɔɔ ƃa ńyãa.”

²⁵È mò ma ǹyɛɛi, “Pá la ŋá míi ŋá lûwa láa yâ.” Nya ƃe è pà la bɔ́ é mii, é pá bɔ́ a ŋwãai é gbele.

²⁶Nya ƃe ǹâŋ Aise è mò mà ǹyɛɛi, “Ńoŋ, lɛɣɛ a ńyãa í íla-gbɔ see ḿâ.”

²⁷Nya ƃe è lɛ̀ɣɛ la é ǹá-gbɔ see mà. È ŋɔseɣei kúŋ mɛ̀ni é lûwa láa ma ǹyɛɛ mai, “Ńoŋ kɔlɔ kúŋ lɛ̂lɛɛi yɛ̂ɛ wolâi kúŋ nyii Yâwɛɛ è lûwa làa mai.

²⁸Ɣâla é lúu kúla ŋ̀elei su é ǹɔii lɛ́lɛ, é mii-sɛŋ támaa tɛ́ɛ ípɔ da ŋwãai!

²⁹Nûa dí tíi kɛ́ yɛ̂. Lɔii-ŋuŋ-ŋa dí pɛ́lɛ íkɔɔ mu. Kɛ́ a ílêɣe-ni da ílîa-ni mɛi-nuu. Ílee ǹônii dí pɛ́lɛ íkɔɔ mu. Náɣaŋ é kɛ́ diai dîa da ínàɣaŋ. Lûwa é kɛ́ diai kélee dîa da lûwa làa yâi.”

³⁰Aise kɛ́ɛ a kpɛɛ lûwa lâai Zeeka ma, Zeeka è kɛ̀ nɔ́ pâi kulâi ǹâŋ Aise kɔlɛ é lí, ǹîa Isɔɔ kɛ́ kùla gbâna-pili siai ma gɛ́ pà.

³¹Ǹyaa máŋ è mii-sɛŋ lɛ́lɛɛ kpɛ̀tɛ é pá la ǹâŋ pɔ́. È mò ǹâŋ ma ǹyɛɛi, “Ńâŋ, ímu síɣe í ŋásuai míi ńyãai a íloŋ, a gɛɛ í lûwa láa ḿâ.”

³²Ǹâŋ Aise è mò ma ǹyɛɛi, “Gbɛ̂ɛ ƃa yá?” È zu tòo ǹyɛɛi, “Íloŋ maa-ŋuŋ Isɔɔ ƃa ńyãa.”

³³Nya ƃe Aise líi è kàra-kara ǹyɛɛi, “Gɛ̀ ní gbɛ̂ɛ ƃé zuai pâa é pá la ŋá gélee míi í lɛ́ɛ pâi, ŋá lûwa láa mai? Tɔ̃yâ mà ǹûwai káa nâa mà.”

³⁴Tãi Isɔɔ è ǹâŋ wóo-ŋai ŋí mɛ̀ni lai, è wɔ̀lɔ kpɔ́ a zu kɛ́tɛ ǹyɛɛi, “Lûwa láa ḿâ máŋ, óo ńâŋ!”

³⁵Kɛ́lɛ ǹâŋ è mò ma ǹyɛɛi, “Ílêɣe è pà ƃɛ́ a wôya-pere, ǹyaŋ aâ ílûwai sɔlɔ ƃó.”

³⁶Isɔɔ ǹyɛɛ mai, “Ǹáa ƃa Zeeka a tɔ̃yâ. Kpɛ́ni fêi, a ŋôya sii ŋí kɛ́ nâa a ńyãa gîei feerɛ. È ŋápɔɔ-sɛŋ sìɣe, ǹya ƃe a ŋɔ́nɔ ŋálûwai síɣe.” Naa pôlu ma è mò ǹâŋ ma ǹyɛɛi, “Lûwa da kélee fé naa ḿɛni ma ŋɔ́nɔ?”

³⁷Aise è Isɔɔ wóo su tòo ǹyɛɛi, “Gáa, ŋa nâa gɛ́ a ímɛi-nuu. Ŋa ǹîa-ni da ǹêɣe-ni kɛ́ a ǹyée mu-ƃela. Ŋa mii-sãa da ŋwãai tɛ́ɛ bɔ́. Lé ŋaŋ ƃé ŋa pɔ̂ri gɛ̂i yɛ̂ ńoŋ?”

³⁸Isɔɔ è ǹâŋ wóo su tòo ǹyɛɛi, “Ńâŋ, ǹûa tɔnɔi tí nɔ́ ƃé ílai? Óo ńâŋ, lûwa láa ḿâ máŋ!” Isɔɔ è làɣi a wɔ́lɔ.

³⁹Nya ƃe ǹâŋ Aise è ŋ̀óo su tòo ǹyɛɛi, “Íkɛ̂i a pâi kɛ̂i lɔii nyɔ́mɔɔ ma ƃɛ́i sí-sɛŋ fa lɛ̂lɛ naa, lúu fa pù naai.

⁴⁰Ƃa pâi ífulu-laai kɛ̂i íkɔ kɔ́-sãai sârai. Ƃa pâi kɛ̂i a ílêɣe ŋɔtíi kɛ́-nuu. Kɛ́lɛ ƃa ítɔɔ̂i kpànaŋ, tãi a pâi pâi gbîrii ŋí a pâi kulâi íŋûa.”

⁴¹Ǹyaŋ Isɔɔ è nâa Zeeka kpɔ̀ara ǹúwai mɛni ma ǹâŋ è nàa mai. Nya ƃe è mò ǹyɛɛi, “Ńâŋ saa tãi a kɛ́ lɛɣɛ̂i. À sàa, ŋa pâi ńêɣe Zeeka paâi.”

⁴²Kɛ́lɛ Lubɛka è ǹóŋ maa-ŋuŋ Isɔɔ wóo-ŋai ŋí mɛ̀ni, é ǹóŋ Zeeka worɛ̂ tɛ̀ɛ ǹyɛɛ mai, “Gáa, ílîa Isɔɔ a gbɛ̀tɛ gíli ŋá a gɛɛ é ípaa.

⁴³Mɛni ma m̀ɛnii ŋa pâi môi yâi m̀ɛni. Pú í lí ńzâaƃɔlɔ Laƃaŋ pɔ́ naa Araŋ.

⁴⁴Ka ǹyaa ká lɛɛ naa é lɛ́ɛ la zu ílîa ŋɔlii-ŋwanai ŋá é yéŋ.

⁴⁵Lɛɛ naa é lɛ́ɛ la zu ílîa ŋɔlii-ŋwanai ŋá é yéŋ é nia mɛnii ma í gɛ̀ lai. Gɛ̀ ní ŋa pâi íworɛ̂ tɛɛ̂i í kúla naa. Ŋa pâi ƃalânii ńônii veerɛ su a ɣele tɔnɔ lé mɛni ma?”

⁴⁶Nya ƃe Lubɛka è mò Aise ma ǹyɛɛi, “Ŋáfulu-laai maa lii-sɛlɛŋ káa mâ Ita-nɛyãai mɛni ma. À kɛ̀ Zeeka à Ita-nɛyâai ŋí dɔnɔ kùla a nɛnî ǹɔii ŋí su, gɛ̀ ní lé fúlu-laa lɛ́lɛɛ ƃé pâi kɛ̂i ńyêei?”