Read Kpelle Zɛnɛse 28 Bible Online

Zɛnɛse 28 - Kpelle bible

Zɛnɛse 28

¹Nya ƃe Aise è Zeeka tòli é lûwa lá ma é mó ma ǹyɛɛi, “Ífe Keena nɛyâai da kùla a nɛnî.

²Ímu siɣe í lí Mɛsopotamia ílee ǹâŋ Bɛtuɛ pɔ́ naa í nɛnî kula naa ílee zâaƃɔlɔ Laƃaŋ ǹônii-nɛyãai sáma.

³Ŋ̀wála-wâla kélee Ɣalai é lûwa láa yâ é gɛ́ í ƃûu ƃó ísuui é kɛ́ a núu-kpulu su kɛ́tɛ.

⁴Ɣâla é Eberaɣɛ̃ɛ ŋɔlûwai tɛ́ɛ ípɔ ka ísuui a gɛɛ ǹɔii Ɣâla è dɛ̀ɛ Eberaɣɛ̃ɛ pɔ́ ƃɛ́i íkaa naa a ŋɔ̃yai, é kɛ́ a ípɔɔ.”

⁵Nya ƃe Aise è Zeeka tɛ̀ɛ é lí Araŋ-nuui Bɛtuɛ ǹóŋ Laƃaŋ pɔ́ naa. Laƃaŋ è kɛ̀ a Zeeka da Isɔɔ dílee Lubɛka zâaƃɔlɔ.

⁶Isɔɔ è gàa a gɛɛ Aise a lûwa láa Zeeka ma a dɛ́ɛ Mɛsopotamia a gɛɛ é nɛnî kula naa. È gàa ŋɔ́nɔ a gɛɛ tãi è lûwa làa la mai, è mò ma ǹyɛɛi, “Ífe Keena nɛyaai da kùla a nɛnî.”

⁷Ǹyaŋ Zeeka è ǹâŋ wóo mɛ̀ni da ǹee é lí Mɛsopotamia.

⁸Tãi Isɔɔ è gàa la a gɛɛ Keena nɛyâai dífe ǹâŋ Aise líi láa níi,

⁹Isɔɔ è lì Isimai pɔ́ naa é Nebayo zâaƃɔlɔ Maala kula a nɛnî, nyii kɛ̀ a Eberaɣɛ̃ɛ ǹóŋ Isimai ǹóŋ-nɛnii. Maala è nâa kɛ̀ a Isɔɔ ŋɔnɛnîi zaaƃa-ɣelei.

¹⁰Zeeka è kùla Bɛɛsiba é lí Araŋ pere.

¹¹Nya ƃe è pà kwaa da ma é nyii naa, kpɛ́ni fêi, vóloi è nâa lì. È naa kɔnii dɔnɔ sìɣe é nɔ́ ŋ̀uŋ mu é ŋ̀uŋ láa mɛi gɛ́ nyîi.

¹²Nya ƃe è see ƃô é déle káa bîlaŋɔɔ ǹɔii ma, ŋ̀uŋ tɛ́ɛ ŋ̀ele-kɔlɔŋ su. Ɣâla ŋɔkéla-ŋai dí kɛ̀ tɛ̂i díkɛ yèŋ.

¹³Yâwɛɛ è tɔ̀ɔ délei ŋuŋ túɛ ǹyɛɛi, “Ńyãa ƃa Yâwɛɛ, nyii gáa a ínâŋ Eberaɣɛ̃ɛ da Aise díɣâlai. Ǹɔii íkaa lâa-ni mai, ŋa pâi dɛ̂ɛi ípɔ ká ísuui.

¹⁴Ǹyaŋ ísuui a pâi tâmai yɛ̂ɛ ǹɔii mâ ŋãyai. Ǹyaŋ ísuui a pâi serîi vóloi liî-pere da vóloi kulâi-pere, ǹɔii ŋûa-pere da ǹɔii kwára-pere. Ka ísuui kásârai, lûwa a pâi kɛ̂i ǹɔii su-ƃelai kélee dîa.

¹⁵Ŋ́gaa íkɔlɛ. Ŋa pâi ímɛi kâai ƃɛ́i kélee ƃa liî naai, ŋá pá a yá pôlu ŋɔ́nɔ ǹɔii ŋí su, kpɛ́ni fêi, fé pâi teêi yâ é lɛ́ɛ la zu m̀ɛnii ŋá mò yâi ŋá gɛ́.”

¹⁶Nya ƃe Zeeka è ŋ̀ɛ́i lá ƃò ŋɔnyii su ǹyɛɛi, “Tɔ̃yâ ma, Yâwɛɛ káa ƃɛ́, ǹyaŋ fé kɛ́ ní a gɔ̂lɔŋɔɔ!”

¹⁷È kɛ̀ yaôi. Nya ƃe è mò ǹyɛɛi, “Ƃɛ́ maa pɔlɔ-pɔlɔɔi léŋ ŋí? Nyíŋi fa pɔ̂ri kɛ̂i a sɛŋ da kpɛ́ni é kúla Ɣâla ŋɔpɛ́rɛi pôlu. Ǹyaŋ nyíŋi káa a Ɣâla-taa siɣãŋ lá.”

¹⁸Nya ƃe Zeeka è mu sìɣe a ŋ̀ele-wala pɛpɛi, é gɔnii síɣe nyii è nàa ŋ̀uŋ mu é ŋ̀uŋ láa mɛi, é dɔɔ a Ɣâla-teƃele é wúlɔ pú mà.

¹⁹Zeeka è naa láa sèe a Bɛtɛ (zu-kulai ƃa Ɣâla ŋɔpɛ́rɛi, kɛ́lɛ daai láa ƃe kɛ̀ a Luzi a maa-ŋuŋ).

²⁰Nya ƃe Zeeka è góno tèe ǹyɛɛi, “À kɛ̀ Ɣâla a pâi kɛ̂i ŋ́gɔlɛ é mɛi káa ŋásiai su é mii-sɛŋ tɛ̀ɛ ḿbɔ ŋá mii é seɣe tɛ́ɛ ḿbɔ ŋá doo ḿâ,

²¹a gɛɛ ŋá pá ŋɔ́nɔ ńâŋ ŋɔpɛ́rɛi mu lii-see su, gɛ̀ ní Yâwɛɛ a pâi kɛ̂i a Ŋáɣâla.

²²Gɛ̀ ní gɔnii ŋí ŋá dɔ̀ɔ a Ɣâla teƃelei, a pâi kɛ̂i a Ɣâla ŋɔpɛ́rɛ. Zɛŋ kélee Ɣâla a dɛ̀ɛ ḿbɔi, ŋa pâi buu-ɣelei tɛɛ̂i bɔ́.”