Read Kpelle Zɛnɛse 30 Bible Online

Zɛnɛse 30 - Kpelle bible

Zɛnɛse 30

¹Tãi Leesɛ è gàa la a gɛɛ vé lóŋ maa sɔlɔ ƃó ní Zeeka mìi, è nâa kɛ̀ tólo kulâi ǹîa ma. Ńyɛɛ Zeeka mai, “Lóŋ tɛ́ɛ ḿbɔ. À wàla kɛ́ tí ŋa pâi saâi.”

²Zeeka è ǹíi ŋwàna Leesɛ ma ǹyɛɛ mai, “Ńyãa ƃa Ɣâla nyii íkpômai?”

³Leesɛ ǹyɛɛ mai, “Ńyee mu-nɛnii Bila ká ŋí. Ka ǹyaa ká lɔ́ pɔ̂rɔŋ a gɛɛ é lóŋ láa ŋ́gɔɔ mɛi, é gɛ́ máŋ ŋá lóŋ sɔlɔ ƃó zârai.”

⁴Nya ƃe è ǹyée mu-nɛnii Bila tɛ̀ɛ bɔ́ a ŋɔnɛnî. Da ǹyaa dí lɔ̂ pɔ̂rɔŋ.

⁵Bila è koo sîɣe é lóŋ-surɔ̂ŋ maa sɔlɔ ƃó.

⁶Nya ƃe Leesɛ è mò ǹyɛɛi, “Ɣâla a ŋámɛnii ŋá tée. A ŋ́oo mɛ́ni máŋ a lóŋ-surɔ̂ŋ tɛ́ɛ ḿbɔ.” Mɛni ma è ǹôloŋ láa sèe a Daŋ.

⁷Leesɛ yée mu-nɛnii Bila è ŋɔ́nɔ koo sîɣe é ǹóŋ-surɔ̂ŋ veerɛi maa sɔlɔ ƃó.

⁸Nya ƃe Leesɛ è mò ǹyɛɛi, “Ŋa kɔ́ kpɔ́ ǹîa pɔ́ a gbanaŋɔɔ, ŋa ǹyée mɛi ɣále.” Mɛni ma è ǹôloŋ láa sèe a Nɛfɛtɛli.

⁹Tãi Liɛ è gàa la a gɛɛ va ŋɔ́nɔ pɔ̂ri lóŋ kâai, è ǹyée mu-nɛnii Zipa tɛ̀ɛ Zeeka pɔ́ a nɛnî.

¹⁰Nya ƃe Zipa è lóŋ-surɔ̂ŋ maa sɔlɔ ƃô Zeeka mî.

¹¹Liɛ è mò ǹyɛɛi, “Mɛni lɛ́lɛɛ a kula ḿâ.” Mɛni ma è ǹóŋ-surɔ̂ŋ láa sèe a Gâa.

¹²Liɛ yée mu-nɛnii Zipa è ŋɔ́nɔ lóŋ-surɔ̂ŋ maa sɔlɔ ƃô a veerɛ-ɣelei Zeeka mì.

¹³Liɛ è mò ǹyɛɛi, “Ńii nɛ̃ɛ̂i, kpɛ́ni fêi, nɛyâai da pâi ńdôlii a lii-nɛ̃ɛ.” Mɛni ma è ǹôloŋ láa sèe a Asɛ.

¹⁴Tãi sí-sɛŋ kula-tãi è sèri lai, Lubiŋ è lì gbâlaŋ ŋá é wúru-ƃa sii da káa naa nyii da dòli a madɛi, (nyii a kâa nɛnî kɛ̀ é koo síɣei) é pá la ǹee Liɛ pɔ́. Nya ƃe Leesɛ è mò Liɛ ma ǹyɛɛi, “Kpera yɛ̂ íloŋ ŋɔwúru-ƃai da fé mî.”

¹⁵Kɛ́lɛ Liɛ è mò ma ǹyɛɛi, “Nyíti fé táma ní a gɛɛ ƃa ŋásurɔ̂ŋ kúla ńyêei? Ƃa ŋ̀wɛ̂lii ŋɔ́nɔ í ńoŋ ŋɔwúru-ƃai kúla ńyêei?” Leesɛ ǹyɛɛ mai, “Ƃà íloŋ ŋɔwúru-ƃai tɛ̀ɛ ḿbɔ, gɛ̀ ní Zeeka a pâi sâa lâai íkɔlɛ a gbínii.”

¹⁶Tãi Zeeka è kùla la gbâlaŋ ŋá a ŋ̀ele-wulii, Liɛ è lì ǹá koyânii é mó ma ǹyɛɛi, “Pá ḿbɔ, kpɛ́ni fêi, ŋa íya a ńoŋ ŋɔwúru-ƃai.” Nya ƃe è nyii gɔlɛ a gbínii tí.

¹⁷Ɣâla è ŋ̀óli tɔ̀ɔ Liɛ ma. Nya ƃe è koo sîɣe é ŋɔlóŋ-sinaai nɔ́ɔlu-ɣelei maa sɔlɔ ƃó Zeeka mì.

¹⁸Liɛ è mò ǹyɛɛ, “Ɣâla a ŋáfela-fei tɛ́ɛ ḿbɔ, kpɛ́ni fêi, ŋá ńyee mu-nɛnii tɛ̀ɛ ŋásurɔ̂ŋ pɔ́.” Mɛni ma è ǹóloŋ láa sèe a Isaka.

¹⁹Nya ƃe Liɛ è ŋɔ́nɔ koo sîɣe é ǹóŋ ǹɔ́ɔlu mɛi dâi maa sɔlɔ ƃó Zeeka mì.

²⁰È mò ǹyɛɛi, “Ɣâla a sama-sɛŋ lɛ́lɛɛ tɛ́ɛ ḿbɔ. Ŋásurɔ̂ŋ a pâi nâa ƃaa-kɛ-maa tɛɛ̂i ḿbɔ, kpɛ́ni fêi, ŋa lóŋ-surɔ̂ŋ lɔ́ɔlu mɛi da maa sɔlɔ ƃó mì.” Mɛni ma è ǹôloŋ láa sèe a Zɛbulɔŋ.

²¹Naa pôlu ma è lóŋ-nɛni maa sɔlɔ ƃô, é ǹáa sée a Dina.

²²Nya ƃe Leesɛ kíli è tòo Ɣâla ŋá, é ŋ̀óli tɔ́ mà, é lóŋ tɛ́ɛ bɔ́.

²³È koo sîɣe, é lóŋ-surɔ̂ŋ maa sɔlɔ ƃó ǹyɛɛ, “Ɣâla a ŋumɛi kúla ŋ́ɛi.”

²⁴Nya ƃe è ǹôloŋ láa sèe a Zosɛ, ǹyɛɛi, “Ŋa ŋ̀wɛ̂lii Yâwɛɛ é ŋɔ́nɔ lóŋ tɛ́ɛ ḿbɔ máŋ.”

²⁵Tãi Leesɛ è Zosɛ maa sɔlɔ ƃô lai, Zeeka è mò Laƃaŋ mà ǹyɛɛi, “Ńdɛ̂ɛ pôlu ŋá lí ŋ́gbîŋ lɔii su ŋánûai pɔ́ naa.

²⁶Ŋánɛyâai ŋa dímaa tíi kɛ̀ íyêei, dítɛɛ ḿbɔ da ŋánîa-pɛlɛɛi kwa dîa-ni kú lí, kpɛ́ni fêi, í berei kɔ́lɔŋ ŋa tíi kɛ́ la yɛ̂ɛi.”

²⁷Kɛ́lɛ Laƃaŋ è mò mà ǹyɛɛi, “Nɛ̀ɛ naa ŋá nyíŋi ƃó yâ. Ŋá gɔ́lɔŋ ŋɛi-kɛ-maa-ŋa sârai a gɛɛ Yâwɛɛ a lûwa láa mâ ísârai.

²⁸Ífela-fei láa ƃó ŋá dɛ́ɛ ípɔ.”

²⁹Zeeka è mò ǹyɛɛi, “Yá kpîŋ í gɔ́lɔŋ berei ŋa tíi kɛ́ la yɛ̂ da berei ítaa-tulɛ-ŋai da ƃûu ƃó la ńzârai.

³⁰Kpɛ́ni fêi, gbulu lôŋ nɔ́ ƃé kɛ̀ íyêei ŋá lɛ́ɛ pâi. Ǹyaŋ a nâa pòo kpɔ́ a zu kɛ́tɛ. Yâwɛɛ a lûwa láa yâ ńzârai. Tãi ká ŋí nâa a gɛɛ ŋá ŋ́gbîŋ mɛni kɛ́.”

³¹Laƃaŋ è mò ma ǹyɛɛi, “Lé ƃé ŋa pɔ̂ri dɛ̂ɛi ípɔ?” Zeeka ǹyɛɛ mai, “A kɛ̀ ƃà pɔ̂ri nyíŋi kɛ̂i mî, gɛ̀ ní ífe sɛŋ da tɛ̀ɛ ḿbɔ. Ŋa pâi ŋɔ́nɔ ítaa-tulɛ-ŋai mɛi kâai.

³²Tɔɔ ŋá sía ítaa-tulɛ-ŋai sáma sâa ŋá m̀álai dɛi-ŋai da m̀olii bɔ̃yɛ-ŋai kúla zu, dí kɛ́ a ŋáfela-fei.

³³Tínaa tuɛ-pere ƃa pâi gɔ̂lɔnii à kɛ̀ ńzãâi. Tãi ƃa pâi pâi la a gɛɛ í ŋáfela-fei su káai, à kɛ̀ ƃà ƃoli kélee kàa naa nyii vé pɔ̃yɛ ní, kpaa máŋ ƃála nyii vé tɛi níi, gɛ̀ ní ŋá ŋûma.”

³⁴Nya ƃe Laƃaŋ è mò ma ǹyɛɛi, “Ǹɛ̂lɛɛi. Gɛ́ yɛ̂ɛ berei í mò lai.”

³⁵Kɛ́lɛ maa ɣelei tí Laƃaŋ è m̀oli-sirɛ pɔ̃yɛ-ŋai da m̀oli-saa pɔ̃yɛ-ŋai kélee ɣɛ̀ɛ zu é pɛ́lɛ m̀ála-sirɛ tɛi-ŋai da m̀ála-saa tɛi-ŋai kélee dîa, é dítɛɛ ǹônii-sinaai pɔ́.

³⁶Laƃaŋ è lì a daa-tulɛ-ŋai ŋí kwaa kôya ma ƃɛ́i naa è kɛ̀ a ɣele-kuu saaƃa siai. Zeeka è kɛ̀ Laƃaŋ ŋɔtaa-tulɛ kpéli-ŋai mɛi kâai.

³⁷Zeeka è wúru ŋunu sîi saaƃa sìɣe é díkala kúla dîa, é díkala da lɛɛ naa loai a gɛɛ dí pɔ̃yɛ.

³⁸È ŋ̀úru-ŋai ŋí tɔ̀ɔ ƃɛ́i daa-tulɛ-ŋai da kâa díkpèle naai. Kpɛ́ni fêi, naa ƃé da kâa tɛ̀ɛ naa díkîe-ni dîa tãi da kâa lì la díkpelêi.

³⁹Tãi dí tɛ̀ɛ la ŋ̀úru-ŋai ŋí ŋɛ́i-tuɛi, dí koo sîɣe dí díkaa, dílônii pɔ̃yɛɛ.

⁴⁰Zeeka è daa-tulɛ-lonii ŋí ɣɛɛ zu é díkɛ a gbîŋ pɔ́ɔ. Vé dílɛɛ ní naa dí píli Laƃaŋ ŋɔɔ-ŋai sáma.

⁴¹Tãi daa-tulɛ su kpanaŋɔɔ-ŋai da kâa kɛ̀ tɛ̂i lai, Zeeka a kâa ŋ̀úru-ŋai lâa ƃɛ́i da kâa díkpèle naai a gɛɛ díkɛ díkaa.

⁴²Kɛ́lɛ vé ŋ̀úru-ŋai ŋí láa ní daa-tulɛ fíi-kpɛɛ-ŋai ŋɛ́i-tuɛ. Mɛni ma daa-tulɛ fíi-kpɛɛ-ŋai dí kɛ̀ a Laƃaŋ ŋɔɔ-ŋai, zu kpanaŋɔɔ-ŋai dí ƃò a Zeeka ŋɔɔ-ŋai.

⁴³Zeeka è tɔ̀ɔ a ŋánaa. Taa-tulɛ támaa è kɛ̀ ǹyêei da luɛ-ŋa, soo-fáleŋ-ŋa da wɛlɛ-sôo-ŋa.