Read Kpelle Zɛnɛse 33 Bible Online

Zɛnɛse 33 - Kpelle bible

Zɛnɛse 33

¹Nya ƃe Zeeka è mu sìɣe é Isɔɔ káa pâi núu ŋuŋ náaŋ (400) kɛ́ ƃò ma. Nya ƃe Zeeka è nîa-pɛlɛɛi ŋá kɔ̀lɛ Liɛ da Leesɛ é pɛ́lɛ díyee-mu-nɛyaa feerɛi dîa.

²È ǹyée mu-nɛyâai tɔ̂ɔ tuɛ-pere da dílônii, é Liɛ da ǹônii lɛɛ nàa pôlu, Leesɛ da Zosɛ dí lɛ́ɛ gbɛɛ ŋá.

³È tɛ̀ɛ dîa é lí é pɛ́lɛ ǹɔii ma ǹîa kɔ́ mu gîei lɔ́ɔlu mɛi feerɛ é lɛ́ɛ la zu é seri mà.

⁴Nya ƃe Isɔɔ è lì ǹá koyânii a kîrɛ. È kpùlɔŋ mà, é ɣíri gɔŋ mâ, é ǹá-gbɔ see mà, dí wɔ́lɔ.

⁵Tãi Isɔɔ è ŋuŋ mu sìɣe la é nɛyâai káa da nîa-pɛlɛɛi, è mò ǹyɛɛi, “Gbɛ̂ɛ-ni ƃe ŋí ka dîa-ni ka pâi?” Zeeka ǹyɛɛ mai, “Ǹîa-pɛlɛɛi nyii-ŋai Ɣâla è dítɛ̀ɛ íyee-mu-nuui pɔ́ ŋɔƃɛlɛ-seei sui.”

⁶Nya ƃe ǹyée-mu-nɛyãai da dínîa-pɛlɛɛi dí lɛ̀ɣɛ a Isɔɔ dí pɛ́lɛ gɔ́ɔ mu.

⁷Liɛ ǹyaa máŋ da ŋɔnîa-pɛlɛɛi dí lɛ̀ɣɛ la dí pɛ́lɛ gɔ́ɔ mu. Naa pôlu mâ Zosɛ da Leesɛ dí lɛ̀ɣɛ mà máŋ dí pɛ́lɛ gɔ́ɔ mu.

⁸Isɔɔ è mò ǹyɛɛi, “Ǹúu kpɔŋ ŋí kélee ŋa díkâai, dípa mɛni ŋuŋ ƃa lé?” Zeeka è zu tòo ǹyɛɛi, “A gɛɛ ŋá ílii láa ƃíai a ŋánuu-namui.”

⁹Kɛ́lɛ Isɔɔ è mò ma ǹyɛɛi, “Ńêɣe, sɛŋ támaa káa ńyêei. Ísãâi dí lɛ́ɛ naa.”

¹⁰Kɛ́lɛ Zeeka è mò ǹyɛɛi, “Kpaa, à kɛ̀ ílii lâai ḿaa mɛni ma, gɛ̀ ní kpera yɛ̂ íyee sée ŋásama-sãai ŋí mu. Kpɛ́ni fêi, tɔ̃yâ ma, íŋɛi káa mî káa nɔ́ yɛ̂ɛ núu a Ɣâla ŋɛ́i kàa, a berei í íyee sèe la ḿû a lii-laai.

¹¹Kpera yɛ̂, íyee sée ŋásama-sãai mu nyii-ŋai ŋa pá la ípɔi, kpɛ́ni fêi, Ɣâla a ƃɛlɛ-see kɛ́ mî, kpɛ́ni fêi, ŋɔ́nɔ sɛŋ támaa káa ńyêei.” Nya ƃe è lɛ̀ɛ lônoi bɔ́ é ǹyée sée zãâi mu.

¹²Nya ƃe Isɔɔ è mò ǹyɛɛi, “Kwaa lí. Ǹyaŋ ŋa pâi liî kátuɛ.”

¹³Kɛ́lɛ Zeeka è mò ma ǹyɛɛi, “Ŋánuu-namui í gɔ́lɔŋ a gɛɛ nîa-pɛlɛɛi fíi aâ kpɛɛ, fɛ̂ɛ ŋɔ́nɔ ŋá kpáaŋ mála-ŋai da niŋa-ŋai mɛni ma nyii-ŋai díkaa a kɔ̃ɔ-leei. Da sìa a dîa a ɣele tɔnɔ kpîŋ díkelee da pâi saâi.

¹⁴Tɔɔ ŋánuu-namui, é lí tuɛ, ńyãai a íyee-mu-nuui ŋá lɛ́ɛ pôlu. Ŋa pâi siâi yɛ̂ɛ berei daa-tulɛ-ŋai da nîa-pɛlɛɛi da siâi lai é lɛ́ɛ la zu ŋá seri ŋánuu-namui mâ Idɔŋ.”

¹⁵Mɛni ma Isɔɔ è mò ǹyɛɛi, “Tɔɔ ŋá ŋánûai da lɛɛ ƃɛ́ íyêei.” Kɛ́lɛ Zeeka è mò ma ǹyɛɛi, “Lé mɛni ma? Tɔɔ ŋá ŋánuu-namui líi láa.”

¹⁶Nya ƃe Isɔɔ è lène pôlu a ŋ̀ele tɔnɔi tí é lí Idɔŋ.

¹⁷Kɛ́lɛ Zeeka è lì Sukɔ é pɛ́rɛ tɔ́ naa, é ƃûu-ŋa tɔɔ naa ŋɔtaa-tulɛ-ŋai mɛni ma. Mɛni ma è naa sèe a Sukɔ (zu-kulai ƃa ƃûu).

¹⁸Nya ƃe Zeeka è kùla Mɛsopotamia é pá Sɛkɛŋ ŋɔtaai su a gɔlɔi ponoɔɔ, ƃɛ́i naa káa Keena lɔii sui, é ŋɔƃûui pú daai kɔlɛ.

¹⁹Ǹɔii kpuai è ŋɔsua kɔlɔ seɣe pɛrɛi tɔ̂ɔ mai, è ǹya Sɛkɛŋ ǹâŋ Amɔ ǹônii-sinaai yêei a káne kpua-kpua ŋuŋ tɔnɔ (100).

²⁰È Ɣâla-teƃele tɔ̀ɔ naa é ǹáa sée a Ɛloi, Eezuɛ Ŋɔɣâla.