Read Kpelle Zɛnɛse 35 Bible Online

Zɛnɛse 35 - Kpelle bible

Zɛnɛse 35

¹Ɣâla è mò Zeeka ma ǹyɛɛi, “Ímu siɣe í lí Bɛtɛ í sée naa í Ɣâla-teƃele tɔɔ naa Ŋ̀âlai mî nyii kùla íŋɛi tãi í pù la í kúla ílîa Isɔɔ yêei.”

²Nya ƃe Zeeka è mò ŋɔpɛ́rɛi mu-ƃelai dîa da diai kélee kɛ̀ gɔlɛ ǹyɛɛi, “Ka ŋɔ̃ya-ɣala-ŋai píli ká kákpîŋ maa wáa, ká káseɣe-ŋai maa fáleŋ.

³Kwa pâi kulâi ƃɛ́ kú lí Bɛtɛ kú sée naa. Ŋa pâi Ɣâla-teƃele tɔɔ̂i naa Ŋ̀âlai mî nyii ŋ́oo su tòo a tãi ŋá kɛ̀ la mɛni-kpɔlu sui, da nyii gáa ŋ́gɔlɛ ƃɛ́i kélee ŋa lì naai.”

⁴Nya ƃe dí ŋɔ̃ya-ɣala-ŋai kélee tɛ̀ɛ Zeeka pɔ́ da ŋ̀ôlii-kɔli-ŋai kɛ̀ díwôlii. Zeeka è dílòo ŋ̀úru kɛ́tɛi mu nyii kɛ̀ Sɛkɛŋ kɔlɛ mai.

⁵Tãi Zeeka-ni dí kɛ̀ liî lai, yao kɛ́tɛ è pà daa-ŋai su-ƃelai kponôi, nyii-ŋai kɛ̀ naa kɔlɛ mai. Ǹyaŋ dífe pɔ̂ri ní Zeeka-ni kpɛ̂i.

⁶Nya ƃe Zeeka da ŋɔnûai kélee dí pà Luzi nyii da dòli sâa a Bɛtɛi, ƃɛ́i naa káa Keena lɔii sui.

⁷Naa ƃé è Ɣâla-teƃele tɔ̀ɔ naa, é naa tóli a Bɛtɛ. Kpɛ́ni fêi, naa ƃé Ɣâla è gbîŋ lɛ̀ naa ma tãi è kùla la ǹîa yêei é púi.

⁸Dibora nyii Lubɛka kùla zui, è sàa dí nòo wúru kɛ́tɛ tɔnɔ mu Bɛtɛ, dí ǹáa sèe a “Wɔ́lɔ Wuru.”

⁹Tãi Zeeka è kùla la Mɛsopotamiai, Ɣâla è kùla ŋɔ́nɔ ŋ̀ɛ́i é lûwa láa ma.

¹⁰Ɣâla è mò ma ǹyɛɛi, “Ílaa ƃa Zeeka. Ílaa fé ŋɔ́nɔ pâi kɛ̂i a Zeeka, kɛ́lɛ ílaa ƃé pâi kɛ̂i nâa a Eezuɛ.” Nya ƃe Zeeka láa è nâa kɛ̀ a Eezuɛ.

¹¹Ɣâla è mò ǹyɛɛi, “Ńyãa ƃa Ŋ̀wála-wâla kélee Ɣalai. Ƃûu ƃó. Ísuui su a pâi kɛ̂tɛi. Da-ni da pâi kɛ̂i a kâloŋ-ŋa.

¹²Ǹɔii ŋá dɛ̀ɛ Eberaɣɛ̃ɛ da Aise pɔ́i, ŋa pâi dɛ̂ɛi ípɔ, ŋá dɛ́ɛ ísuui pɔ́ nyii-ŋai pâi kɛ̂i ípôlu mai.”

¹³Nya ƃe Ɣâla è ǹɛɛ ƃɛ́i è lòno naa bɔ́i, é tɛ́ ŋ̀elei su.

¹⁴Zeeka è kɔni tɔ̂ɔ ƃɛ́i Ɣâla è lòno naa bɔ́i a gɛɛ é kɛ́ a kili-too-ŋa kɔni. È kpele-sɛŋ sala kùla ma, é wúlɔ pú ma.

¹⁵Ƃɛ́i Ɣâla è lòno naa Zeeka pɔi, Zeeka è nàa láa sèe a Bɛtɛ.

¹⁶Nya ƃe dí kùla Bɛtɛ díkɛ lì Ɛfata. Tãi dí kɛ̀ niî la berei sui, tãi è sèri a gɛɛ Leesɛ maa é fúloŋ. Ǹyaŋ è mɛni-soli kàa.

¹⁷Tãi è kɛ̀ mɛni-soli kâai la goi-tee lɔɔi sui, vɛ̃ɛ-lee-zooi è mò mà ǹyɛɛ, “Ífe yào. Ƃa pâi ŋɔ́nɔ surɔ̂ŋ-loo maa sɔlɔ ƃôi.”

¹⁸Tãi Leesɛ è kɛ̀ saa yee tɛ̂i lai, è ǹóŋ-kwatarai láa sèe a Bɛŋoni é lɛ́ɛ saâi. Kɛ́lɛ gwâtarai ǹâŋ è ǹáa sèe a Bɛŋsima.

¹⁹Tãi Leesɛ è sàa lai, dí nòo Ɛfata perei mâ, ƃɛ́i da nàa tòli nâa a Bɛpeleɣɛ̃ɛ.

²⁰Nya ƃe Zeeka è kɔni tɔ̂ɔ molôŋ mɛi. Gáa sâa a Leesɛ ƃolôŋ mɛi kɔ̂ni.

²¹Nya ƃe Zeeka è kùla naa é ŋɔƃûui tɔ́ Ee siɣãŋ kɔlɛ mâ.

²²Tãi Zeeka è kɛ̀ la ǹɔii tí sui, Lubiŋ è lɔ̀ a ǹâŋ ŋɔnɛnîi dɔnɔ pɔ̂rɔŋ, nyii da kâa dòli a Bilai. Kɛ́lɛ Zeeka è mɛ̀ni. Ǹyaŋ Zeeka ǹônii-sinaai dí kɛ̀ puu káo feerɛ.

²³Liɛ ǹônii-sinaai ká ŋí. Lubiŋ nyii kɛ̀ a Zeeka ǹóŋ maa-ŋuŋ, Simiɔŋ, Liva, Zuda, Isaka da Zɛbulɔŋ.

²⁴Leesɛ ǹônii-sinaai ká ŋí. Zosɛ da Bɛŋsima.

²⁵Leesɛ yée mu-nɛnii Bila ǹônii-sinaai ká ŋí, Daŋ da Nɛfɛtɛli.

²⁶Liɛ yée mu-nɛnii Zipa ǹônii-sinaai ká ŋí, Gâa da Asɛ. Zeeka ǹônii-sinaai ká ŋí è dímaa sɔlɔ ƃô Mɛsopotamiai.

²⁷Nya ƃe Zeeka è pà ǹâŋ pɔ́ naa Mamera, ƃɛ́i da nàa tòli máŋ a Kiria Aba (nyíi da dòli máŋ a Iburɔŋ), ƃɛ́i Eberaɣɛ̃ɛ da Aise dí kɛ̀ naa a ŋɔ̃́ya-ŋai.

²⁸Ǹyaŋ Aise è kɛ̀ a kóraŋ ŋuŋ tɔnɔ pôlu buu lɔ́ɔlu mɛi saaƃa (180).

²⁹Nya ƃe Aise è sàa tãi è pɔ̀lɔ la kpɔ́ a ŋánaai. È nâa lì ŋɔnúu-pɔlɔ-ŋai pɔ́. Ǹônii-sinaai Isɔɔ da Zeeka dí nòo.