Read Kpelle Zɛnɛse 38 Bible Online

Zɛnɛse 38 - Kpelle bible

Zɛnɛse 38

¹Ǹaa kɛ́ɛ tíi, Zuda è kùla ǹêɣe-sinaai da ǹîa-sinaai pɔ́ naa é lí Adulaŋ-nuui Ira pɔ́ naa.

²Naa ƃe Zuda è Keena nɛni tɔnɔ kàa naa nyii ǹâŋ láa è kɛ̀ a Suai. È gùla a nɛnî.

³Da ǹyaa dí lóŋ-surɔ̂ŋ maa sɔlɔ ƃó, Zuda é ǹáa sée a Ɛɛ̂.

⁴È ŋɔ́nɔ koo sîɣe é lóŋ-surɔ̂ŋ maa sɔlɔ ƃó, ǹee é ǹáa sée a Onaŋ.

⁵È ŋɔ́nɔ lóŋ-surɔ̂ŋ maa sɔlɔ ƃô é ǹáa sée a Sila. Maa tãi tí mâ, Zuda è kɛ̀ Aizi.

⁶Zuda è nɛnî kɔ̀ri ǹóŋ-surɔ̂ŋ maa-ŋuŋ Ɛɛ̂ mì. Nɛnii ŋí láa ƃe kɛ̀ a Tama.

⁷Kɛ́lɛ Ɛɛ̂ è kɛ̀ a ŋwana-lɔ̂ɔ Yâwɛɛ ŋɛ́i. Ǹya ƃe Yâwɛɛ è bàa.

⁸Nya ƃe Zuda è mò Onaŋ ma ǹyɛɛi, “Ílîa ŋɔnɛnîi kúla a nɛnî a gɛɛ í lóŋ káa mì. A gɛɛ ílîa suu fé sàa.”

⁹Kɛ́lɛ Onaŋ è kɛ̀ a gɔ̂lɔŋɔɔ a gɛɛ à ǹîa-pɛlɛɛ maa sɔlɔ ƃô nɛnîi mâ, dífe pâi kɛ̂i a bɔ́ɔ. Mɛni ma tãi a kâa kɛ̀ lɔ-pɔ̂rɔŋ la a nɛnîi, va kâa kpɛ̀ɛ, kpɛ́ni fêi, vé kɛ́ ní ŋ̀wɛ̂lii é lóŋ káa nɛ̀nii mâ.

¹⁰Kɛ́lɛ nyíŋi fé Yâwɛɛ líi láa ní. Nya ƃe Yâwɛɛ è Onaŋ pàa máŋ.

¹¹Nya ƃe Zuda è mò ǹóŋ ŋɔnɛnîi Tama ma ǹyɛɛi, “Lí pôlu ínâŋ ŋɔpɛ́rɛi mu í lɛ́ɛ naa a pɔɔ-nɛni é lɛ́ɛ la zu ńoŋ Sila é naɣa.” Kpɛ́ni fêi, è kɛ̀ yaôi a gɛɛ Sila nyaa máŋ fé sàa yɛ̂ɛ berei ǹîa-ni dí sàa lai. Tama è lì ǹâŋ pɔ́ naa pôlu.

¹²Tãi su kôya è tɛ̀ɛ nyíŋi pôlu ma Zuda ŋɔnɛnîi, nyii kɛ̀ a Sua ǹóŋ-nɛnii, è sàa. Tãi Zuda ŋɛ́i è kpàla la bɔ̂ŋ saa mɛni mai, da m̀arâŋ Adulaŋ-nuui Ira dí lì Tiŋna ƃɛ́i Zuda ŋɔƃála-leɣa tée-ƃelai dí kɛ̀ naai.

¹³Tãi Tama è mɛ̀ni la a gɛɛ mɔ̂rɔ è kɛ̀ liî Tiŋna ŋɔƃála-ŋai léɣa teêi,

¹⁴è ŋɔpɔɔ-nɛni seɣei kùla mà é seɣe pɛ́lɛ ŋ̀ɛ́i é sée Enayiŋ taai ŋɔsiɣãŋ lá nyii kɛ̀ Tiŋna perei mai. Kpɛ́ni fêi, è kɛ̀ a gɔ́lɔŋɔɔ a gɛɛ Sila è nâa kɛ̀ a naɣa. Kɛ́lɛ dífe kɛ́ ní ŋ̀wɛ̂lii dí dɛ́ɛ bɔ́ a nɛnî.

¹⁵Tãi Zuda è gàa lai, è gàa yɛ̂ɛ wulu-wulu kɛ́-nɛni. Kpɛ́ni fêi, ŋ̀ɛ́i è kɛ̀ a ŋíriɛ.

¹⁶Nya ƃe è lì bɔ́ berei kɔlɛ ǹyɛɛ mai, “Pá kwa yá kú nyíi sâa.” Ǹyaŋ vé kɛ́ ní a gɔ̂lɔŋɔɔ a gɛɛ ǹóŋ ŋɔpɔɔ-nɛnîi ƃè tí. Tama è mò ma ǹyɛɛi, “A kɛ̀ ƃà lɔ-pɔ̂rɔŋ kɛ̀ a ńyãa, lé ƃé ƃa pâi dɛ̂ɛi ḿbɔ?”

¹⁷Ńyɛɛ mai, “Ŋa pâi ƃoli-loŋ tɔnɔ tɛɛ̂i ípɔ.” Nɛnîi ǹyɛɛ mai, “Sɛ́ɣɛ tɛ́ɛ ḿbɔ é lɛ́ɛ la zu í m̀oli-loŋ tɛ́ɛ ḿbɔ.”

¹⁸Zuda ǹyɛɛ mai, “Lé ƃé ŋa pɔ̂ri dɛ̂ɛi ípɔ a zɛ́ɣɛi?” Nɛnîi ǹyɛɛ mai, “Íkɔlɔ láa-tɛ-sɛŋ nyii ya íyee-pɔ̂ɔ kɛ̀ la kɔlɔ mai da ŋ̀ɛli é pɛ́lɛ ísia-wurii mâ nyii gáa íyêei.” Nya ƃe è dítɛ̀ɛ nɛnîi pɔ́ da ǹyaa dí lɔ-pɔ̂rɔŋ kɛ. Nɛnîi è koo sîɣe.

¹⁹Nɛnîi è mu sìɣe é lí é zeɣei kúla ŋ̀ɛ́i é ŋɔpɔɔ-nɛni seɣei ɣíri ma.

²⁰Tãi Zuda è m̀arâŋ Adulaŋ-nuui tɛ̀ɛ la a m̀oli-loŋ nɛnîi pɔ́ naa a gɛɛ é zɛ́ɣɛi tɛ́ɛ pôlui, vé nɛnîi káa ní.

²¹Nya ƃe ǹûai kɛ̀ naai è dímarê kɛ̀ ǹyɛɛ diai, “Ŋulu-wulu kɛ́-nɛnii nyii kɛ̀ Enayiŋ taai ŋɔsiɣãŋ lá Tiŋna perei mai káa mí?” Dîyɛɛ mai, “Wulu-wulu kɛ́-nɛni fé ƃɛ́.”

²²Nya ƃe è lì pôlu Zuda pɔ́ naa ǹyɛɛ mai, “Fé nɛnîi káa ní. Diai kɛ̀ naai dí mò ḿâ a gɛɛ wulu-wulu kɛ́-nɛni fé naa.”

²³Zuda è ŋ̀óo su tòo ǹyɛɛ mai, “Tɔɔ zãâi dí lɛ́ɛ nɛnîi yêei dífa lâ ɣɛ́lɛ la kûa. Gáa ŋa ítɛ̀ɛ a m̀oli-loŋ, ǹyaŋ ífe nɛnîi káa ní.”

²⁴Ɣáloŋ saaƃa tɛ́ɛ pôlu mà, Zuda è mɛ̀ni dîyɛɛ ma, “Íloŋ ŋɔnɛnîi Tama a wulu-wulu kɛ́. Ǹyaŋ goo káa mà.” Nya ƃe Zuda è mò ǹyɛɛi, “Ka pá la ká géreŋ.”

²⁵Tãi dí pà la a ǹɛnîi, è ŋ̀óo tɛ̀ɛ ŋɔsurɔ̂ŋ ǹâŋ pɔ́ naa ǹyɛɛi, “Ǹúui ŋɔsãâ káa ńyêei, ǹyaa ƃé ḿbîli gbáaŋ su. Zãâi kpîŋ ká. Kɔlɔ lá-tɛ-sɛŋ da ŋ̀ɛli é pɛ́lɛ zia-wurii ŋí mâ.”

²⁶Nya ƃe Zuda è zãâi kàa é díkɔlɔŋ ǹyɛɛi, “Nɛnîi káa tɔ̃yâ ƃôi. Ńyãa ƃé mɛni nyɔ́mɔɔi kɛ̀. Ŋâi pɔ̂ri dɛ̂ɛi kɛ̀ ńoŋ Sila pɔ́ a ŋɔnɛnî.” Zuda fé ŋɔ́nɔ lɛɣɛ ní mà nàa pôlu ma.

²⁷Tãi nɛnîi maa fúloŋ-tãi è sèri lai, vɛ̃ɛ-lee-zooi è gàa a gɛɛ a pâi nyuâ sɔlɔ ƃôi.

²⁸Goi-teei pɛ́lɛɛ mai, ǹôloŋ dɔnɔ yée è kùla. Vɛ̃ɛ-lee-zooi é yee kpɔ̂lu kpulɔ̂ŋ ma ǹyɛɛi, “Nyíŋi ƃé pà a maa-ŋuŋ.”

²⁹Kɛ́lɛ ǹôloŋ è ǹyée lɔ̀ pôlu, ǹîa é pá a maa ŋuŋ. Nya ƃe vɛ̃ɛ-lee-zooi è mò ǹyɛɛi, “Bere ƃé ípa-pere káa la!” Mɛni ma dí ǹáa sèe a Pɛrɛzi.

³⁰Ǹaa pôlu ma ǹêɣe è pà ǹyee kpɔ̂lui kɛ́ ƃò ǹyée ma. Dí ǹáa sèe a Zera.