Read Kpelle Zɛnɛse 39 Bible Online

Zɛnɛse 39 - Kpelle bible

Zɛnɛse 39

¹Isima-ŋai dí lì a Zosɛ Ize. Ize-nuui Potifa, nyii kɛ̀ a gâloŋ ŋɔtíi-kɛ-nuu kɛ́tɛi dɔnɔ, gɛ ƃò ŋɔnɔ a galoŋ mɛi káa kɔkuluƃa-ŋai dínuu kɛ́tɛi, è Zosɛ yà díyêei.

²Yâwɛɛ è kɛ̀ Zosɛ pôlu. È maa mɛni kélee su sãa. Zosɛ è kɛ̀ ŋɔmɛi-nuui ŋɔpɛ́rɛi mu, nyii kɛ̀ a Ize-nuui.

³Mɛi-nuui è gàa a gɛɛ Yâwɛɛ è kɛ̀ Zosɛ pôlu. Potifa è gàa a gɛɛ mɛni kélee Zosɛ è ǹyée pù zui, Yâwɛɛ è gɛ̀ é ƃûu ƃó.

⁴Mɛni ma è nâa Zosɛ wɛ̀li, é ǹyée sée mu. Potifa è Zosɛ kɛ́ ŋɔpɛ́rɛi mɛi a núu kɛ́tɛ, é gɛ́ gɔ̃liŋ kélee mɛi.

⁵Tãi Zosɛ ŋɔmɛi-nuui è Zosɛ kɛ̀ la ŋɔpɛ́rɛi mɛi a núu kɛ́tɛ da gɔ̃liŋ kéleei, Yâwɛɛ è lûwa làa ŋɔpɛ́rɛi mâ Zosɛ sârai. Yâwɛɛ ŋɔlûwai è kɛ̀ Ize-nuui yée ŋá-sãa kélee dîa, ŋɔpɛ́rɛi mu-sãai da ŋɔkpâlaŋ ŋá-sãai.

⁶Mɛni ma è ǹyée ŋá-sãa kélee lɛ̀ɛ Zosɛ yêei mɛi káa mɛni ma. Vé ŋɔ́nɔ kɛ́ ní a gbáaŋɔɔ mɛni da kélee ma fɛ̂ɛ nɔ́ é ǹáa míi. Ǹyaŋ Zosɛ è kɛ̀ a nyáŋkpa lɛ́lɛɛ gbono-toɔɔ zu.

⁷È kɛ̀ a tãi tɔnɔ, Zosɛ ŋɔmɛi-nuui Potifa ŋɔnɛnîi è Zosɛ kàa ǹyɛɛ mai, “Pá kú láa.”

⁸Kɛ́lɛ Zosɛ fé fáa ní. È mò nɛnîi mâ ǹyɛɛi, “Gáa, ḿɛi-nuui a ńziɣe a núu sãa. Vé ŋɔ́nɔ kpáaŋ ní mɛni da kélee mɛ̂ni ma ŋɔpɛ́rɛi mu. A ŋ́gɛ ǹyée ŋá-sãa kélee mɛi.

⁹Va gbîŋ kɛ̀tɛ é tɛ́ɛ ḿâ bɛ́rɛi ŋí mu. A ǹyée ŋá-sãa kélee tɛ́ɛ ḿbɔ fɛ̂ɛ nɔ́ yá, kpɛ́ni fêi, íkaa a ŋɔnɛnîi. Ŋa pɔ̂ri ŋaŋ ŋwana-lɔ̂ɔ tarei ŋí da zɔnyɔ̂ŋ kɛ́tɛi kɛ́ɛ ŋí kɛ̂i léŋ Ɣâla ŋɛ́i?”

¹⁰Berei máŋ nɛnîi è kɛ̀ la Zosɛ pôlu a tãi támaa a gɛɛ da ǹyaa dí láai, Zosɛ fé ŋ̀óli tɔɔ ní mà.

¹¹Kɛ́lɛ tãi tɔnɔ da, Zosɛ è lɔ̀ bɛ́rɛi mu tíi da kɛ̂i. Núu da kélee fé kɛ́ ní bɛ́rɛi mu.

¹²Nya ƃe nɛnîi è zòŋ a ŋɔseɣei ǹyɛɛ mai, “Fɛ̂ɛ nɔ́ kwa yá kú láa.” Kɛ́lɛ è ŋɔseɣei lɛ̀ɛ ǹɛnii yêei é pú é kúla bɛ́rɛi mu.

¹³Tãi nɛnîi è gàa la a gɛɛ Zosɛ a ŋɔseɣei lɛ́ɛ ǹyêei a pú a kula bɛ́rɛi mui,

¹⁴è bɛ́rɛi mu-ƃelai tòli ǹyɛɛ diai, “Ka gáa, ŋásurɔ̂ŋ a pá a Ibulu-nuu kúsama a gɛɛ é kúŋumɛ. È pà bɛ́rɛi mu a gɛɛ kwa ǹyaa kú lɔ-pɔ̂rɔŋ kɛ̀, kɛ́lɛ ŋá làɣi a zu kɛ́tɛ.

¹⁵Tãi è ńaɣi-woo mɛ̀ni la a zu kɛ́tɛi, è ŋɔseɣei lɛ̀ɛ ńyêei é pú é kúla bɛ́rɛi mu.”

¹⁶Nya ƃe Zosɛ ŋɔseɣei è lɛ̀ɛ ǹɛnii yêei è lɛ́ɛ la zu ŋɔsurɔ̂ŋ é pá.

¹⁷Nya ƃe nɛnîi è zu kùla ŋɔsurɔ̂ŋ mî ǹyɛɛ mai, “Ibulu-nuui í pà la kúsamai, è lɔ̀ mâ bɛ́rɛi mu a gɛɛ é lɔ-pɔ̂rɔŋ kɛ́ a ńyãa.

¹⁸Kɛ́lɛ tãi ŋá làɣi la a zu kɛ́tɛi, è ŋɔseɣei lɛ̀ɛ ńyêei é pú é kúla bɛ́rɛi mu.”

¹⁹Tãi Zosɛ ŋɔmɛi-nuui è ŋɔnɛnîi wóo mɛ̀ni la ǹyɛɛ mai, “Berei ŋí ƃé íyee ŋá-nuui è tùa la a ńyãai,” ǹíi è ŋwàna.

²⁰Nya ƃe Potifa è Zosɛ pìli kpíni-pɛrɛ mu ƃɛ́i gâloŋ a kâa ŋɔpelesinɛ-ŋai pili naai. Nàa ƃé è kɛ̀ naa kpini-pɛrɛ mu.

²¹Kɛ́lɛ Yâwɛɛ è kɛ̀ nɔ́ Zosɛ pôlu. È ŋɔwɛli-kɛ-maai lɛ̀ ma. È gɛ̀ gbini-pɛ̂rɛ lá-nuu kɛ́tɛi é Zosɛ wɛ́li.

²²Nya ƃe gbini-pɛrɛ lá-nuui è Zosɛ kɛ̀ pélesinɛ-ŋai kélee mɛi kɛ̀ gbini-pɛrɛi mui. Ǹyaa ƃé kɛ̀ tíi kɛ̂i a dîa.

²³Mɛni-ŋai kélee Zosɛ è kɛ̀ mɛi, gbini-pɛrɛ lá-nuui fé kɛ́ ní a gbáaŋɔɔ mɛ̀ni ma. Kpɛ́ni fêi, Yâwɛɛ è kɛ̀ Zosɛ pôlu. Mɛnii kélee è ǹyée pù zui, Yâwɛɛ è gɛ̀ é ƃûu ƃó.