Read Kpelle Zɛnɛse 42 Bible Online

Zɛnɛse 42 - Kpelle bible

Zɛnɛse 42

¹Tãi Zeeka è gɔ̀lɔŋ la a gɛɛ mii-sɛŋ káa Ize lɔii sui, è mò ǹônii-sinaai dîa ǹyɛɛ, “Ka kákîe-ni kâai lé mɛni ma?”

²È mò dîa ǹyɛɛi, “Ŋa mɛni a gɛɛ mii-sɛŋ káa Ize lɔii su. Ka lí naa ká mii-sɛŋ yá kúmɛni ma kúfa lâ saa lâ.”

³Nya ƃe Zosɛ ǹîa-sinaa puui dí lì mii-sɛŋ yâi Ize lɔii su.

⁴Kɛ́lɛ Zeeka fé Zosɛ ǹêɣe Bɛŋsima tɛ̀ɛ ní a gɛɛ da ǹîa-ni dí lí, kpɛ́ni fêi, è kɛ̀ yaôi a gɛɛ tãi da mɛni ŋánaa a pâi kɛ̂i la.

⁵Nya ƃe Zeeka ǹônii da núu da kpɛ́ni-ŋa dí lì mii-sɛŋ yâi Ize. Kpɛ́ni fêi, burii è kɛ̀ Keena lɔii su gwaa kélee.

⁶Zosɛ è kɛ̀ a núu kɛ́tɛ Ize lɔii mɛi. Ǹyaa ƃé kɛ̀ mii-sɛŋ kɔlɛ̂i ǹɔii su-ƃelai kélee dîa. Nya ƃe Zosɛ ǹîa-ni dí pà dí pɛ́lɛ gɔ́ mu, dí díŋuŋ pîlaŋ ǹɔii ma.

⁷Tãi Zosɛ è ǹîa-ni kàa lai, è díkɔ̂lɔŋ. Kɛ́lɛ vé kɛ́ ní ŋ̀wɛ̂lii a gɛɛ dí gɔ́lɔŋ. Mɛni ma è dísôŋ yɛ̂ɛ ŋɔ̃ya-ŋa é lóno dípɔ a ŋ̀ɛ́i wála-walaa. È dímarê kɛ̀ ǹyɛɛ diai, “Ká kùla mí?” Dîyɛɛ mai, “Kú kùla Keena lɔii su. Kú pá mii-sɛŋ yâi.”

⁸Berei máŋ Zosɛ è kɛ̀ la a ǹîa-ni kɔ́lɔŋɔɔ lai, dífe kɛ́ ní a gɔ̂lɔŋɔɔ.

⁹Zeei Zosɛ è mò é pîlaŋ diai, maa mɛni kíli è tòo ŋ̀á ǹyɛɛ diai, “Kákaa a mɛni maa kpɛɛ-ƃela. Ká pà a gɛɛ ká kúlɔii m̀ɛ́i-ŋai nàa mɛi fé káa níi nàa maa kpɛ́ɛ.”

¹⁰Dí mò ma dîyɛɛi, “Kpao, Kúmɛi-nuui, íyee mu-ƃelai dí pà nɔ́ mii-sɛŋ yâi.

¹¹Kúkelee kúkaa nɔ́ a surɔ̂ŋ tɔnɔ lônii. Kúsãâi, kûai a íyee mu-ƃelai kúfe a mɛni maa kpɛɛ-ƃela.”

¹²È mò dîa ǹyɛɛi, “Vé tí. Ká pà a gɛɛ ká kúlɔii m̀ɛ́i-ŋai nàa mɛi fé káa níi nàa maa kpɛ́ɛ.”

¹³Dí mò ma dîyɛɛi, “Kûai a íyee mu-ƃelai kúkaa a lóŋ-surɔ̂ŋ puu káo feerɛ, nyii-ŋai díkaa a surɔ̂ŋ tɔnɔ lônii Keena lɔii sui. Kúnâŋ ŋɔlóŋ gbɛɛ ŋái káa gɔlɛ sâa. Ǹóŋ dɔnɔ nɔ́ ƃe vé ŋɔ́nɔ naa.”

¹⁴Kɛ́lɛ Zosɛ è mò dîa ǹyɛɛi, “Yɛ̂ɛ berei ŋá mò la kâai, kákaa a mɛni maa kpɛɛ-ƃela.

¹⁵Mɛni ma fɛ̂ɛ nɔ́ ŋá kásu kɔ̂ɔŋ gâloŋ láai su, káfe pâi kulâi ƃɛ́ é lɛ́ɛ la zu kákpɛɛ ŋái é pá.

¹⁶Ka ǹúui dɔnɔ tɛ̀ɛ é lí é pá a kákpɛɛ ŋai, gbèli-ŋai dí lɛ́ɛ ƃɛ́ kpini-pɛrɛ mu. Gɛ̀ ní kwa pài gâai à kɛ̀ káwooi káa a tɔ̃yâ. À wàla kɛ́ tí, gɛ̀ ní gâloŋ ŋɔfúlu-laai su kákaa a mɛni maa kpɛɛ-ƃela a tɔ̃yâ.”

¹⁷Nya ƃe è díkelee pù kpini-pɛrɛ mu a ɣele-kuu saaƃa.

¹⁸Ŋ̀ele-kûui zaaƃa-ɣelei, Zosɛ è mò dîa ǹyɛɛi, “Ka nyíŋi kɛ́ a gɛɛ ká ƃálo. Kpɛ́ni fêi, ŋa yao Ɣâla ma.

¹⁹À kɛ̀ kákaa a núu sãa-ŋa, gɛ̀ ní ǹúui dɔnɔ é lɛ́ɛ ƃɛ́ gbini-pɛrɛi mu, gbèli-ŋai dí lí a mii-sɛŋ kápɛrɛi mu-ƃelai pɔ́ nyii-ŋai puru káa diai.

²⁰Ka pá a kákpɛɛ ŋái ḿbɔ a gɛɛ ŋá gɔ́lɔŋ à kɛ̀ kákaa tɔ̃yâ ƃôi. Gɛ̀ ní káfe pâi saâi.” Dí fâa ŋ̀óo mâ.

²¹Nya ƃe dí mò díkîe-ni dîa dîyɛɛi, “Tɔ̃yâ ma kúsɔŋ káa kúlêɣe ŋɔmɛni-soli-kaa mɛnii su. Kpɛ́ni fêi, tãi è kúkperai fè la ŋɔmɛni-soli-kaai su a gɛɛ kú kpɔ́ŋ mai, kúfe kúwoli tɔ̀ɔ ní ma. Mɛni ma kúkaa maa tɔŋ-kpɛ-maa sɔlɔ ƃôi.”

²²Nya ƃe Lubiŋ è mò dîa ǹyɛɛi, “Ŋá mò kâa a gɛɛ káfe sɔnyɔ̂ŋ kɛ̀ a ǹôloŋ ŋí. Kɛ́lɛ káfe káwoli tɔɔ ní ḿâ. Ǹyaa ká ŋí ŋãa maa mɛni a kɛ́ kûa.”

²³Dífe kɛ́ ní a gɔ́lɔŋɔɔ a gɛɛ Zosɛ è díwoo mɛ̀ni, kpɛ́ni fêi, núu da è kɛ̀ naa gɛ̀ díwoo su-kula Zosɛ m̀â.

²⁴Nya ƃe è lì ǹyaa tɔnɔ kwaa ma é wɔ́lɔ. È pà pôlu é lóno dípɔ. Nya ƃe è Simiɔŋ sòŋ dísama é gɛ́ dí ŋíri díŋɛi-tuɛ.

²⁵Nya ƃe Zosɛ è mò a gɛɛ dí díƃɔrɔ-ŋai kélee láa fɛ́ɛ a mii-sɛŋ, dí dísɛŋ-kao-ŋai pú pôlu díƃɔrɔ-ŋai su. È mò máŋ a gɛɛ dí sia kɔnɔŋ tɛɛ dípɔ. Dí nyíŋi kélee kɛ̀ dîɛ.

²⁶Nya ƃe dí dímii-sãai ɣîri díwɛlɛ-sôo-ŋai pôlu dí lí.

²⁷Ƃɛ́i dí nyii naai, ǹúui dɔnɔ è ŋɔƃɔrɔi láa ƃò a gɛɛ é mii-sɛŋ tɛɛ ŋɔwɛlɛ-sôoi pɔ́. Tãi è m̀ɔrɔi láa ƃò lai è ŋɔsɛŋ-kaoi kàa zu.

²⁸Nya ƃe è mò m̀arâai dîa ǹyɛɛi, “Dí ŋásɛŋ-kaoi pù pôlu ŋáƃɔrɔi su. Ǹyaa ká ŋí!” Dílii è tôo pôlu a maa tãi tí díkɛ díkîe-ni ŋɛ́i kàa dîyɛɛi, “Lé ƃé ŋí Ɣâla a gɛ́ a kûai?”

²⁹Tãi dí sèri la dínâŋ Zeeka ma Keena lɔii sui, dí mɛnii kélee ƃò mà nyii kɛ̀ a diai díyɛɛ mai,

³⁰“Ǹɔii mɛi-naloŋ tɔnɔ è lòno kûa ǹyɛɛ kúkaa a ŋɔlɔii ŋɔmɛni maa-kpɛɛ-ƃela.

³¹Kɛ́lɛ kú mò mà a gɛɛ kúkaa a núu sãa-ŋa, kúfe a mɛni maa-kpɛɛ-ƃela.

³²Kúkaa a lóŋ-surɔ̂ŋ puu-kao feerɛ nyii-ŋai dínâŋ káa tɔnɔɔi. Kútɔnɔ a saa, kúkpɛɛ ŋái káa kúnâŋ kɔlɛ Keena lɔii su.

³³Nya ƃe ǹɔii mɛi naloŋ è mò kûa ǹyɛɛi, ‘Berei ŋí ƃé ŋa pâi gɔ̂lɔnii la a gɛɛ kákaa a núu sãa-ŋa. Ka ǹúui dɔnɔ lɛɛ ƃɛ́ gbéli-ŋai dí lí a mii-sɛŋ kápɛrɛi mu-ƃelai pɔ́ nyii-ŋai puru káa díkɛ̂i.

³⁴Ka pá ḿbɔ a kákpɛɛ ŋái. Gɛ̀ ní ŋa pâi gɔ̂lɔnii a gɛɛ káfe a mɛni maa-kpɛɛ-ƃela, kɛ́lɛ kákaa a núu sãa-ŋa. Gɛ̀ ní ŋa pâi kálêɣe tɛɛ̂i kápɔ pôlu kákɛ pɔni tɔ̂ɔ ǹɔii su.’ ”

³⁵Tãi dí dímii-sɛŋ ƃɔrɔ-ŋai su ƃò lai, ǹúui kélee è ŋɔsɛŋ-kaoi kàa ŋɔƃɔrɔi su. Tãi dí zɛŋ-kaoi kàa lai, da dínâŋ-ni dí kɛ̀ yaôi.

³⁶Nya ƃe dínâŋ Zeeka è mò dîa ǹyɛɛi, “Ka pâi ŋánîa-pɛlɛɛi kélee kulâi ńyêei? Zosɛ fé ŋɔ́nɔ naa, Simiɔŋ fé ŋɔ́nɔ naa, ǹyaŋ ka ŋɔ́nɔ kɛ́ liî a Bɛŋsima. Nyíŋi kélee a pú ŋ́ûa!”

³⁷Nya ƃe Lubiŋ è mò ǹâŋ mà ǹyɛɛ mai, “Ŋà wàla pá a Bɛŋsima pôlu, í ŋánîa-pɛlɛɛ feerɛi pàa. Ǹɛɛ ńyêei, ŋa pâi pài la pôlu ípɔ.”

³⁸Kɛ́lɛ è mò ma ǹyɛɛi, “Ńoŋ fé lɛ̀ɛi kápôlu. Kpɛ́ni fêi, ǹîa a saa. Ǹyaa tɔnɔ nɔ́ ƃa lɛ̀ɛ. Tãi da mɛni da a pâi gɛ̂i ziai su. Ǹyaŋ ŋ́gaa a núu pɔlɔ. Gɛ̀ ní maa lii-soli a pâi ḿbaâi.”