Read Kpelle Zɛnɛse 44 Bible Online

Zɛnɛse 44 - Kpelle bible

Zɛnɛse 44

¹Nya ƃe Zosɛ è mò ŋɔtíi kɛ́-nuui ma ǹyɛɛi, “Mii-sɛŋ nyii ǹûai da pɔ̂ri liî lai, bú díƃɔrɔ-ŋai su, í dísɛŋ-kaoi lɔ́ díƃɔrɔ-ŋai mɛi.

²Ŋá kpele kɔpui nyii gbɛ̀tɛɛ̂i a kánei, ǹɔ́ díkpɛɛ ŋái ŋɔƃɔrɔi mɛi í bɛ́lɛ ŋɔmii-sɛŋ yá-sɛŋ-kaoi ma.” Nya ƃe è gɛ̀ yɛ̂ɛ berei Zosɛ è mò la mai.

³Ɣele ƃɔ́i, dí ǹûai tɛ̀ɛ pôlu dípɔ naa da díwɛlɛ-sôo-ŋai.

⁴Tãi ǹûai ŋí dí dísu kùla la daai ma a guroi, Zosɛ è mò ŋɔtíi kɛ́-nuui ma ǹyɛɛi, “Imu síɣe í lɛ́ɛ ǹûai pôlu. Ƃà dísòŋ mó dîa yɛ̂ɛi, ‘Ka mɛni lɛ́lɛɛ su tòo a mɛni nyɔ́mɔɔ lé mɛni ma? Ká ŋánuu-namui ŋɔkáne kpele-kɔpui ŋûma lé mɛni ma?

⁵Nyíti ƃé ŋánuu-namui a gbèle zu, gɛ́ mɛni ƃô la naa túɛ. Ka mɛni nyɔ́mɔɔ kɛ́!’ ”

⁶Tãi è sèri la diai, è ŋ̀óo-ŋai ŋí ƃò dîa.

⁷Dí mò ma dîyɛɛi, “Kúnuu-namui a ŋ̀óo kɛ́ɛ-ŋai ŋí ƃôi lé mɛni ma? É folôŋ káyee mu-ƃelai dîa a gɛɛ dí mɛni kɛ́ɛ ŋí kɛ́.

⁸Zɛŋ-kaoi kú gàa kú-bɔrɔ-ŋai sui, kú kùla la Keena lɔii su, kú pá la pôlu kápɔ. Kwa pɔ̂ri ŋaŋ káne kpaa máŋ gôo ŋúma-pere kɛ̂i léŋ Kúnuu-namui ŋɔpɛ́rɛi mu?

⁹Ǹúui ƃa kɔ̂pui kàa ŋɔƃɔrɔi sui, tɔɔ maa ǹúui é sáa, ǹúui kpéli-ŋai dí kɛ́ a luɛ-ŋa Kúnuu-namui yêei.”

¹⁰Nya ƃe è mò dîa ǹyɛɛi, “Tɔɔ é kɛ́ yɛ̂ɛ berei ká mò lai. Ǹúui kwa pâi gâai ŋɔƃɔrɔi sui, ǹyaa nɔ́ ƃé pâi kɛ̂i a ŋánuu-namui ŋɔluɛ. Ǹúui gbéli-ŋai da pâi liî díkpɔɔi yee mà.”

¹¹Ǹúui kélee dí díƃɔrɔ-ŋai làa ǹɔii ma, dí ǹáa ƃó tɛi-tɛi.

¹²Nya ƃe Zosɛ ŋɔtíi kɛ́-nuui è pɛ̀lɛ mɔrɔ-ŋai su káa ma. È gɔ́ɔ pìlaŋ ǹúu pɔlɔi ŋ̀ɔi ma é seri la Bɛŋsima ŋ̀ɔi ma. È kɔ̂pui kàa Bɛŋsima ŋɔƃɔrɔi su.

¹³Nya ƃe dí díseɣe-ŋai fàla-fala dí gbîri-ŋai píli díwɛlɛ-sôo-ŋai mɛi dí lene pôlu daai su.

¹⁴Tãi Zuda da m̀arâai dí sèri la Zosɛ ŋɔpɛ́rɛi lái, Zosɛ è kɛ̀ niî naa. Nya ƃe díkelee dí pù gɔ́ɔ mu.

¹⁵Zosɛ è mò dîa ǹyɛɛi, “Lé ƃé ŋí ká gɛ̀i? Káfe gɔ́lɔŋ a gɛɛ núu kɛ́ɛ yɛ̂ɛ ńyãa a pɔ̂ri mɛni ƃôi naa túɛ?”

¹⁶Zuda ǹyɛɛi, “Lé ƃé kwa pɔ̂ri môi Kúnuu-namui ma? Lé lono ƃé kwa pɔ̂ri gɛ̂i? Kpaa máŋ kwa pɔ̂ri kúkpîŋ maa waâi léŋ? Ɣâla a kúsɔŋ mɛi síɣe. Ǹyaŋ kúkaa nâa a Kúnuu-namui ŋɔluɛ-ŋa é pɛ́lɛ máŋ ǹúui ma dí kɔ̂pui kàa ŋɔƃɔrɔi sui.”

¹⁷Zosɛ ǹyɛɛi, “É folôŋ ḿâ a gɛɛ ŋá gɛ́ tí. Ǹúui nɔ́ kɔ̂pui è kɛ̀ ŋɔƃɔrɔi sui, ǹyaa ƃé pâi kɛ̂i a ŋáluɛ. Kɛ́lɛ à kɛ̀ a káa, ka pâi liî pôlu lii-see su kánâŋ pɔ́.”

¹⁸Nya ƃe Zuda è lì bɔ́ ǹyɛɛ mai, “Óo ŋánuu-namui, tɔɔ íyee mu-nuui é lóno ípɔ. Ífe ílii ŋwàna. Kpɛ́ni fêi, íkaa nɔ́ yɛ̂ɛ Ize kaloŋ ǹyaa kpîŋ.

¹⁹Í íyee-mu-ƃelai marê kɛ̀ à kɛ̀ dínâŋ káa niî naa kpaa máŋ dílêɣe.

²⁰Kú mò yâ a gɛɛ kúnâŋ pɔlɔi káa naa, kúlêɣe kɛ́ ƃò naa nyii gáa a kúnâŋ ŋɔlóŋ gbɛɛ ŋái. Ǹía a wɔ́lɔ saa. Ǹyaa tɔnɔ nɔ́ ƃa lɛɛ ǹee yêei. Mɛni ma ǹâŋ è ŋwɛ́lini a ŋánaa.

²¹Nya ƃe í mò kûa a gɛɛ kú pá la ípɔ í íŋɛi láa ma.

²²Kú mò yâ a gɛɛ ǹâŋ fa pɔ̂ri nɛɛ̂i naa é síɣe gɔlɛ. À sìɣe ǹâŋ kɔlɛ, gɛ̀ ní ǹâŋ a pâi saâi.

²³Í mò íyee-mu-ƃelai dîa yɛ̂ɛi, ‘Ka kálêɣe-ni kà wàla pá, káfe pâi ŋ́ɛi kâai ŋɔ́nɔ.’

²⁴“Tãi kú lì la pôlu kúnâŋ pɔ́ naa nyii gáa a íyee-mu-nuui, kú íwoo-ŋai ŋí ƃô mà.

²⁵Tãi kúnâŋ è mò la kûa a gɛɛ kú pá pôlu mii-sɛŋ yâi,

²⁶Kú mò ma a gɛɛ kúfa pɔ̂ri pâi à kɛ̀ kwà kúlêɣe-ni kwà wàla pá. Kwà dîa-ni kwà pà, gɛ̀ ní kwa pâi pâi. Kpɛ́ni fêi, à wàla kɛ́ tí, kúfe pâi íŋɛi kâai.

²⁷Nya ƃe kúnâŋ nyii gáa a íyee-mu-nuui è mò kûa ǹyɛɛi, ‘Ká gɔ́lɔŋ a gɛɛ ŋánɛnîi è lóŋ-surɔ̂ŋ feerɛ nɔ́ maa sɔlɔ ƃô.

²⁸Dɔnɔ è kùla ǹyêei. Ŋá mò lɔɔ fɛnɛ-sãa nyɔ́mɔɔ ŋa ƃé zôŋ. Ǹyaŋ fé niî ŋɛ́i láa ní ma é síɣe tãi tí ma.

²⁹À kɛ̀ kà nyíŋi kùla ńyêei, gɛ̀ ní ŋa pâi sâai a lii-soli.’

³⁰“À kɛ̀ ŋà wàla lí pôlu a ǹôloŋ ŋí, ǹâŋ a pâi saâi. Kpɛ́ni fêi, ŋɔfúlu-laai kélee sɛ̂lɛŋɔɔi ma.

³¹À wàla ǹôloŋ káa kúpôlu, gɛ̀ ní a pâi saâi. Gɛ̀ ní kwa pâi kúnâŋ líi sôlii ŋɔpɔlɔ-laai su nyii pâi bâai a maa félaai.

³²Mɛni ma ŋá ńɛ̂wo sèe a sɛ́ɣɛ ǹâŋ yêei ǹôloŋ mɛni ma. Ŋá mò ma a gɛɛ ŋà wàla pá la pôlu, gɛ̀ ní ńyãa ƃé maa mɛni káa ḿâ ŋáfulu-laai su.

³³Mɛni ma ŋa íkperai fêi a gɛɛ ŋá lɛ́ɛ ƃɛ́ Bɛŋsima pɔ́ɔ ŋá a luɛ. Tɔɔ da ǹîa-ni dí lí.

³⁴Ŋa pɔ̂ri liî léŋ ńâŋ pɔ́ naa à kɛ̀ kwa ǹôloŋ ní kúfe lì ní? Fa pɔ̂ri mɛni nyɔ́mɔɔ kɛ́ɛ ŋí kâai gɛ́ kɛ̀ a ńâŋ.”