Read Kpelle Zɛnɛse 5 Bible Online

Zɛnɛse 5 - Kpelle bible

Zɛnɛse 5

¹Adaŋ ŋɔsuii maa kɔlɔi ká ŋí. (Tãi Ɣâla è núu-kpune kpɛ̀tɛ lai, è gbɛ̀tɛ a gbîŋ ƃóloŋ-maa.

²È surɔ̂ŋ kpɛ̀tɛ da nɛnî, é lûwa láa dîa é dílaa sée a “Núu kpune.”)

³Tãi Adaŋ è kɛ̀ la ɣele ma a kóraŋ ŋuŋ tɔnɔ pôlu buu saaƃa (130) è lóŋ-surɔ̂ŋ maa sɔlɔ ƃô móloŋɔɔ ma. È ǹáa sèe a Sɛ̂.

⁴Nyíŋi pôlu ma Adaŋ è kɛ̀ ɣele ma a kóraŋ ŋuŋ lɔ́ɔlu mɛi saaƃai (800). È lóŋ-sinaa da nɛyâa maa sɔlɔ ƃô máŋ é lɛ́ɛ saâi.

⁵Góraŋ kélee Adaŋ è gɛ̀ ɣele mai, è kɛ̀ a kóraŋ ŋuŋ lɔ́ɔlu mɛi náaŋ pôlu buu saaƃa (930) é lɛ́ɛ saâi.

⁶Tãi Sɛ̂ è kóraŋ ŋuŋ tɔnɔ káo lɔ́ɔlu (105) kɛ̀ la ɣele mai, è Inɔsi maa sɔlɔ ƃô.

⁷Inɔsi maa sɔlɔ ƃóɔɔ pôlu ma, Sɛ̂ è kɛ̀ ɣele mâ a kóraŋ buu lɔ́ɔlu mɛi saaƃa káo lɔ́ɔlu mɛi feerɛ (807). È lóŋ-sinaa da nɛyâa maa sɔlɔ ƃô.

⁸Góraŋ kélee Sɛ̂ è gɛ̀ ɣele mai, è kɛ̀ a kóraŋ ŋuŋ lɔ́ɔlu mɛi náaŋ pôlu puu káo feerɛ (912) é lɛ́ɛ saâi.

⁹Tãi Inɔsi è kɛ̀ la ɣele mâ a kóraŋ buu lɔ́ɔlu mɛi náaŋ, è Kenaŋ maa sɔlɔ ƃô.

¹⁰Inɔsi è kɛ̀ ɣele ma a kóraŋ buu lɔ́ɔlu mɛi saaƃa pôlu puu káo lɔ́ɔlu (815) Kenaŋ maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô.

¹¹Góraŋ Inɔsi è gɛ̀ ɣele mai, gélee è kɛ̀ a kóraŋ ŋuŋ lɔ́ɔlu mɛi náaŋ káo lɔ́ɔlu (905) é lɛ́ɛ saâi.

¹²Kenaŋ è Malale maa sɔlɔ ƃô tãi è kɛ̀ la a kóraŋ buu lɔ́ɔlu mɛi feerɛ.

¹³Kenaŋ è kóraŋ ŋuŋ lɔ́ɔlu mɛi saaƃa pôlu buu náaŋ (840) kɛ̀ ɣele mâ Malale maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô ǹyaa máŋ.

¹⁴Kóraŋ ŋuŋ lɔ́ɔlu mɛi náaŋ pôlu puu (910) ƃé Kenaŋ è gɛ̀ ɣele mâ é lɛ́ɛ saâi.

¹⁵Malale è kóraŋ buu lɔ́ɔlu mɛi da káo lɔ́ɔlu kɛ̀ ɣele mâ é lɛ́ɛ Zare maa sɔlɔ ƃôi.

¹⁶Malale è kóraŋ ŋuŋ lɔ́ɔlu mɛi saaƃa pôlu buu saaƃa (830) kɛ̀ ɣele mâ Zare maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô ŋɔ́nɔ.

¹⁷Malale ŋɔkóraŋ kélee è kɛ̀ a kóraŋ ŋuŋ lɔ́ɔlu mɛi saaƃa pôlu ŋuŋ lɔ́ɔlu mɛi náaŋ káo lɔ́ɔlu (895) é lɛ́ɛ saâi.

¹⁸Zare ǹyaŋ kɛ́ɛ ɣele ma a kóraŋ ŋuŋ tɔnɔ pôlu buu lɔ́ɔlu mɛi da káo feerɛ (162), è Inɔ maa sɔlɔ ƃô.

¹⁹Inɔ maa sɔlɔ ƃóɔɔ pôlu ma Zare è kɛ̀ ɣele ma a kóraŋ ŋuŋ lɔ́ɔlu mɛi saaƃa (800). Ǹyaa máŋ è lóŋ-sinaa da nɛyâa maa sɔlɔ ƃô.

²⁰Zare ŋɔkóraŋ kélee è kɛ̀ a kóraŋ ŋuŋ lɔ́ɔlu mɛi náaŋ pôlu buu lɔ́ɔlu mɛi da káo feerɛ (962) é lɛ́ɛ saâi.

²¹Inɔ ǹyaa máŋ è kóraŋ buu lɔ́ɔlu mɛi da káo lɔ́ɔlu kɛ̀ ɣele mâ é lɛ́ɛ Mɛtusela maa sɔlɔ ƃôi.

²²Inɔ è tùa a Ɣâla nîa-pere Mɛtusela maa sɔlɔ ƃóɔɔ pôlu ma a kóraŋ ŋuŋ saaƃa (300) é lóŋ-sinaa da nɛyâa maa sɔlɔ ƃô ŋɔ́nɔ.

²³È kóraŋ ŋuŋ saaƃa pôlu buu lɔ́ɔlu mɛi da káo lɔ́ɔlu (365) kɛ̀ ɣele mâ.

²⁴Inɔ è tùa a Ɣâla nîa-pere. È làŋ núu-kpune ŋɛ́i, kpɛ́ni fêi, Ɣâla è zìɣe.

²⁵Tãi Mɛtusela è kɛ̀ la ɣele ma a kóraŋ ŋuŋ tɔnɔ pôlu buu lɔ́ɔlu mɛi saaƃa káo lɔ́ɔlu mɛi feerɛ (187), è Lamɛ maa sɔlɔ ƃô.

²⁶Mɛtusela è kɛ̀ ɣele mâ a kóraŋ ŋuŋ lɔ́ɔlu mɛi feerɛ pôlu buu lɔ́ɔlu mɛi saaƃa káo feerɛ (782) Lamɛ maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô.

²⁷È kóraŋ ŋuŋ lɔ́ɔlu mɛi náaŋ pôlu buu lɔ́ɔlu mɛi da káo lɔ́ɔlu mɛi náaŋ (969) kɛ̀ ɣele mâ é lɛ́ɛ saâi.

²⁸Lamɛ è kóraŋ ŋuŋ tɔnɔ pôlu buu lɔ́ɔlu mɛi saaƃa káo feerɛ (182) kɛ̀ ɣele mâ máŋ é lɛ́ɛ pâi lóŋ-surɔ̂ŋ maa sɔlɔ ƃôi.

²⁹È ǹáa sèe a Nôa. È mò ǹyɛɛi, “Ǹɔii kpɔ́ ŋí Yâwɛɛ è ǹáɣaŋ làai, nôloŋ ŋí a pâi kúŋa nɛnɛ̂i ma kútii kpanaŋ-ŋai da kúmɛni-soli-ŋai su.”

³⁰Nôa maa sɔlɔ ƃóɔɔ pôlu ma, Lamɛ è kɛ̀ ɣele mâ a kóraŋ ŋuŋ lɔ́ɔlu pɔ̂lu buu lɔ́ɔlu mɛi náaŋ káo lɔ́ɔlu (595). È lóŋ-sinaa da nɛyâa maa sɔlɔ ƃô.

³¹Lamɛ è kóraŋ ŋuŋ lɔ́ɔlu mɛi feerɛ pôlu buu lɔ́ɔlu mɛi feerɛ káo lɔ́ɔlu mɛi feerɛ (777) kɛ̀ ɣele mâ é lɛ́ɛ saâi.

³²Nôa è kɛ̀ a kóraŋ ŋuŋ lɔ́ɔlu (500) é lɛ́ɛ pâi Sɛ̂ŋ, Aaŋ da Zafɛ dímaa sɔlɔ ƃôi.