Read Kpelle Samia Veerɛi 11 Bible Online

Samia Veerɛi 11 - Kpelle bible

Samia Veerɛi 11

¹Gâloŋ-ŋai díkɔ kɔ́ kûui seriɛ́ɛ góraŋ sui, Deeƃé è Zôa worɛ̂ tɛ̀ɛ da ŋɔyée mu-ƃelai é pɛ́lɛ Eezuɛ-ƃelai kélee dîa. È dítɛ̀ɛ dí kɔ́ pɛ́lɛ Amɔŋ-ŋai dîa. Dí tìnaŋ Laba taa-leei ma. Kɛ́lɛ Deeƃé è lɛ̀ɛ Zerusâlɛŋ.

²Fólo maa láa tɔnɔ da Deeƃé è kùla záma lɔ̂i gɛ́ sìa-sia ŋɔpɛ́rɛi mɛi. È nɛnî tɔnɔ kàa gɛ́ ŋ̀waa. Ǹɛnîi ŋí è kɛ̀ kpɔ́ a ǹɛ́lɛɛ a ŋ̀ánaa.

³È mare kɛ̂ɛ kɛ̀ ǹyɛɛi, “Gbɛ̂ɛ ŋɔnɛnî ƃe tí?” Ǹúui dɔnɔ ǹyɛɛ m̀ai, “Ita naloŋ Yuraya ŋɔnɛnîi ká tí, Iliaŋ ǹóŋ-nɛnii Bɛɛsiba.”

⁴Deeƃé è kéla-ŋa tɛ̀ɛ dôlii é pá. (Ǹɛnîi ŋí è ǹyée wàa nɔ́ naa fé niî kɛ̀ namu ní kɛ̀) Deeƃé kɛ́ lɔ̀ la bɔ̂rɔŋ. Nya ƃe è lì pôlu ŋɔpɛ́rɛi la.

⁵Ǹaa kɛ́ɛ tíi è koo sìɣe. È Deeƃé worɛ̂ tɛ̀ɛ ǹyɛɛ m̀ai, “Ŋ́gaa kpáaŋ su.”

⁶Deeƃé è worɛ̂ tɛ̀ɛ Zôa pɔ́-naa ǹyɛɛ m̀ai, “Ita naloŋ Yuraya tɛ̀ɛ mî.” Zôa è Yuraya tɛ̀ɛ Deeƃé pɔ́-naa.

⁷Yuraya è páai, Deeƃé è m̀arê kɛ̀ berei Zôa a tíi kɛ̂i lai, berei da gɔ́i kɔ̂i lai da berei a liî la tuɛ-perei.

⁸Deeƃé è mò Yuraya ma ǹyɛɛi, “Lí sâa í nyíi ípɛrɛi mu.” Yuraya è kùla naa é lí. Naa kɛ́ɛ tíi gâloŋ è sãâ tɛ̀ɛ Yuraya ŋɔpɛ́rɛi lá.

⁹Kɛ́lɛ Yuraya fé ǹyii ní ŋɔpɛ́rɛi mu. Da Deeƃé ǹyée mu-ƃelai kélee dí nyìi Deeƃé ŋɔpɛ́rɛi lá.

¹⁰Deeƃé è mɛ̀ni a gɛ́ɛ Yuraya fê nyìi ní ŋɔpɛ́rɛi mui. È dòli ǹyɛɛ m̀ai, “Í kùla sia kôya ma. Lé ƃé gɛ̀ ífe lì ní ípɛrɛi lá í nyíi naa í ífii tɔɔ̂i?”

¹¹Yuraya ǹyɛɛ m̀ai, “Gbanaŋ-woo-kɛɛ maa gãlai, Eezuɛ da Zuda kɔ kɔ́-ƃelai kélee díkaa ƃûu su. Ḿɛi-nuui Zôa da ǹyée mu-ƃelai díkaa naa víyeŋ ŋá. Ŋa pɔri liî ŋápɛrɛi lá, ŋá ńaa míi, ŋá kpele sɛŋ kpele kwa ŋánɛnîi kú kɛ́ kúnîa kɛ̀? Tãi nɔ́ kaa la ɣele mai, fé pâi pɔrîi mɛni kɛ́ɛ ŋí kɛ̂i.”

¹²Deeƃé è ŋɔ́nɔ mò Yuraya ma ǹyɛɛi, “Nyii ƃɛ́ sâa. Ya pâi liî pôlu tínaa.” Yuraya è nyìi Zerusâlɛŋ é lɛ́ɛ zu ɣele é ƃɔ́.

¹³Deeƃé è ƃɛlɛ-toli ƃò a Yuraya a gbínii tí, é lɔɔ támaa tɛ́ɛ bɔ́. È gɛ̀ tí a gɛ́ɛ Yuraya a lì ŋɔpɛ́rɛi lá é nyíi a ŋɔnɛnîi. Kɛ́lɛ Yuraya fé lì ní ŋɔpɛ́rɛi lá a gbínii tí. È ǹyii gâloŋ ŋɔkpôŋ lá.

¹⁴M̀aa ɣele ƃɔ́ɔi Deeƃé è kɔlɔ pɔ̃yɛ é dɛ́ɛ Yuraya pɔ́ a gɛ́ɛ é lí la Zôa pɔ́.

¹⁵È bɔ̃yɛ gɔlɔi ŋí su ǹyɛɛ Zôa mai, “Yuraya tɛɛ ƃɛ́i gɔ́i fâai naai ka íkɔ kɔ́-ƃelai ká kúla pôlu a gɛ́ɛ kúkpɔara-ƃelai dí baa.”

¹⁶Zôa è daa-leei maa kpɛɛ, é Yuraya tɛ̀ɛ ƃɛ́i ŋ̀wana lɔɔ ŋánaa kpakolo-ŋai dí kɛ̀ naai.

¹⁷Gbakolo-ŋai kɛ̀ daa-leei ŋí sui dí pà dí kɔ́ pɛ́lɛ Zôa ma da ŋɔnûai. Dí Deeƃé ŋɔnûai da-ŋa pàa, dí Yuraya pàa máŋ.

¹⁸Zôa è worɛ̂ tɛ̀ɛ dí m̀ó Deeƃé ma.

¹⁹È mò ŋ̀orɛ̂-woo ƃó-nuui ma ǹyɛɛ, “Ya kpɛ̀ɛ a ǹamu kɔ́ mɛni-ŋai kélee su-kulaa gâloŋ ma,

²⁰ɣele da ǹíi a pâi toôi pôlu ǹyɛɛ yâi, ‘Ka namu pɛ̀lɛ ǹûai dîa daa-leei kɔlɛ lé mɛni ma? Káfe kɛ́ ní a gɔ́lɔŋɔɔ a gɛ́ɛ da pɔri lɛɛ̂i z iyaŋ pôlu-pere dí kápɔara?

²¹Gbɛ̂ɛ ƃé Zerubesɛ ǹóŋ-surɔŋ Abimelɛ pàai. Vé kɛ́ ní a nɛnî nyíi kɔni kɛ́tɛ pìli ziɣãŋ pôlu-pere é dòo ma é sáa Tiƃɛ? Ká lì ziɣãŋ kɔlɛ ma lé mɛni ma?’ Gɛ̀ ní m̀ó ma yɛ̂ɛi, ‘Dí íyee-mu-nuui Yuraya, Ita naloŋ pàa gɔ́i su máŋ.’ ”

²²Ŋ̀orɛ̂-woo ƃó-nuui è lì é mɛni-ŋai kélee ƃó Deeƃé ma yɛ̂ɛ berei Zôa è ŋ̀á lɛ̀ la mai.

²³Ǹyɛɛ Deeƃé mai, “Ǹûai dí ŋɛi-naɣiŋ mɛi kɛ̀ a kúa. Dí pɛ̀lɛ kûa kwaa ponoɔɔ ma. Kɛ́lɛ kú dítùaŋ ziɣãŋ lá-pere.

²⁴Dí kerâŋ pìli zɔ̀la-ŋai dí ƃɔ́ ziɣãŋ su dí íyee mu-ƃelai da-ŋa soŋ. Íyee mu-nuui Ita-nuui Yuraya è lɛ̀ɛ zu máŋ.”

²⁵Deeƃé ǹyɛɛ m̀ai, “Lí í m̀ó Zôa ma a gɛ́ɛ m̀ɛnii ŋí fé ǹíi tòo pôlu. A pɔri kɛ̂i a núu da kélee. É kɔ́ é daa-leei sóŋ é ǹaa-ƃelai yée mɛi ɣále. Nyíŋi ƃé pâi gɛ̂i Zôa líi é kúla.”

²⁶Yuraya ŋɔnɛnîi kɛ́ɛ a zaa tuŋ mɛ̀nii, è wɔ̀lɔ m̀ɛni ma.

²⁷Ǹíi ŋá yeŋɔɔi, Deeƃé è ŋ̀orɛ̂ tɛ̀ɛ é pá é gɛ́ a ŋɔnɛnî. Da ǹyaa dí lônii-sinaa maa sɔlɔ ƃò. Kɛ́lɛ Deeƃé tûa sɔŋ ŋí fé kɛ́ ní a Yâwɛɛ líi láa mɛni.