Read Kpelle Samia Veerɛi 12 Bible Online

Samia Veerɛi 12 - Kpelle bible

Samia Veerɛi 12

¹Yâwɛɛ è Netaŋ tɛ̀ɛ Deeƃé pɔ́-naa. Netaŋ è pà Deeƃé pɔ́-naa ǹyɛɛ m̀ai, “Sinâa feerɛ dí kɛ̀ taa-lêe tɔnɔ su. Dɔnɔ è kɛ̀ a dɔ́ɔ, gbélii kɛ́ ƃò a kôlo-nuu.

²Taa-tulɛ támaa è kɛ̀ dɔɔ-nuui yêei.

³Kɛ́lɛ ƃála-saa tɔnɔ nɔ́ ƃé kɛ̀ gôlo-nuui yêei nyíi è ǹyai. È pà la ŋɔpɛ́rɛi lá gɛ́ ƃò ǹyêei da ŋɔnîa-pɛlɛɛi. Dí lɛ̀ɛ ŋ̀á kɔ̂niî é kɛ́tɛ. È kɛ̀ nɔ́ díyêei yɛ̂ɛ nɛnî-loo kwatara. A kâa kɛ̀ ǹáa miî a ŋɔmii-sãai da tɛ̀ɛ m̀álai pɔ́. A kâa máŋ yá tɛ̀ɛ m̀álai pɔ́ gbîŋ kpele-kɔɛɛi su. Da dîa-ni da kâa ǹyii kwaa tɔnɔ ma.

⁴Ɣele tɔnɔ da ŋɔ̃ya è pà dɔɔ naloŋ pɔ́-naa. Ǹalôŋ fé kɛ́ ní ŋ̀wɛ̂lii é gbɔ́ɔi taa-tulɛi da paa é mii-sɛŋ kpɛtɛ la ŋɔ̃yai mɛni ma. Kɛ́lɛ è gôlo-nuui ŋɔƃála tɔnɔi sòŋ ǹyêei é bàa é mii-sɛŋ kpɛtɛ la ŋ̀ɔ̃yai mi.”

⁵Nya ƃe Deeƃé líi è ŋwàna kpɔ́ ǹyɛɛ Netaŋ mai, “Ǹúui mɛni sîi tí kɛ̂i, à wàla saa gɛ̀ ní Yâwɛɛ fé ɣéniɛ nɛ̃ɛ ḿî.

⁶Fɛ̂ɛ é m̀álai tí vela-fei kɛ́ a ƃála náaŋ, kpɛ́ni fêi, maloŋ kâa fé kɛ́ ní kɛ̀ ǹyêei.”

⁷Netaŋ ǹyɛɛ m̀ai, “Yá ƃa ǹalôŋ kpîŋ. Yâwɛɛ Eezuɛ Ɣalai ǹyɛɛi, ‘Ŋá íkula Sɔ̂ɔ yêei ŋá íkula ŋá íkɛ̀ Eezuɛ mɛi a kâloŋ,

⁸ŋá ŋɔpɛ́rɛi, ŋɔnɛyâai, Eezuɛ-ƃelai da Zuda-ƃelai tɛ́ɛ ípɔ. À kɛ̀ nyíŋi-ŋai dífe kɛ́ ní a gula kɛ̂ɛ ƃóɔɔ, ŋâi pâi da pûi ma.

⁹Ya íŋɛi naɣîŋ Yâwɛɛ ŋɔwóoi mɛi íkɛ mɛni nyɔ́mɔɔ kɛ̀ la lé mɛni ma? Ya gɛ́ Amɔŋ-ƃelai da Yuraya paa a ƃóa-sɔ̂kpɔ ya ŋɔnɛnîi síɣe a ípɔɔ.

¹⁰M̀ɛni ma, ílônii díwɔ̂ lonii da pâi kɛ̂i nɔ́ ƃóa-sɔ̂kpɔ saa kɛ̂i, kpɛ́ni fêi, í íŋɛi nàɣiŋ Yâwɛɛ ŋɔtɔ̂ŋ mɛi í Yuraya ŋɔnɛnîi kɛ́ a ínɛnî.’

¹¹Ŋa pâi gɛ̂i íkpɔɔi pɛrɛi mu ǹúui da é tɔɔ yâ. Ŋa pâi ínɛyâai kulâi íyêei ŋá dítɛɛ íkɔlɛ ma-ƃelai pɔ́ íŋɛi. Da pâi nyiî a dia panaŋ ma ǹûai kélee ŋɛ́i.

¹²M̀ɛnii í gɛ̀i, í gɛ̀ loo-pere su. Kɛ́lɛ ŋa pâi ŋ́ɔ̂i kɛ̂i panaŋ ma Eezuɛ-ƃelai kélee dí naa káa.”

¹³Deeƃé ǹyɛɛ Netaŋ mai, “Ŋaâ sɔnyɔ̂ŋ kɛ́ Yâwɛɛ ŋɛ́i túɛ” Netaŋ ǹyɛɛ m̀ai, “Yâwɛɛ aâ ísu mɛni lɛɛ ísɔnyɔ̂ŋ mɛni ma. Ífe pâi saâi.

¹⁴Kɛ́lɛ ya íŋɛi naɣîŋ Yâwɛɛ ŋɔwooi mɛi ya zɔnyɔ̂ŋ ŋí kɛ́i, ǹólôŋ a pâi màa sɔlɔ ƃôi yɛ̂i, a pâi saa tí-ti ƃôi.”

¹⁵Nya ƃe Netaŋ è lì pôlu ŋɔpɛ́rɛi lá. Yâwɛɛ è gɛ̀ ǹolôŋ Deeƃé da Bɛɛsiba dí màa sɔlɔ ƃôi é kɔ́lɛ.

¹⁶Deeƃé è Ɣâla fɛ̀li ǹolôŋ mɛni ma. È sûŋ sìɣe é nyíi ŋɔpɛ́rɛi mu ǹɔii ma.

¹⁷Ǹúu pɔlɔ-ŋai dí pà dí lóno bɔ́ a gɛ́ɛ vé nyìi ǹɔii ma, kɛ́lɛ vé fáa ní, vé tela gɛ́ ní é ǹáa míi.

¹⁸Ŋ̀ele kûui ǹɔ́ɔlu mɛi feerɛ ɣelei ǹolôŋ è sàa. Deeƃé yée-mu-ƃelai dí kɛ̀ yaôi a gɛ́ɛ dí ǹolôŋ saa tuŋ too ma. Dí mò dîyɛɛi, “Ka gáa, ǹolôŋ kɛ́ɛ kɛ̀ a vúlu kú lòno bɔ́ vé ŋ̀óli tɔ̀ɔ ní kûa, kwa pâi ǹolôŋ saa tuŋ too pere kɛ̂i léŋ ma? Kwà gɛ̀ tí, ɣele da a pâi mɛni ŋánaa kɛ̂i a gbîŋ.”

¹⁹Kɛ́lɛ Deeƃé kɛ́ɛ a gàa a gɛ́ɛ ǹûai díkɛ̀ lônoi díkîe-ni pɔ́ niniŋ-woo sui, ǹolôŋ maa mɛni è tòo gíli ŋá. È ǹyée-mu-ƃelai marê kɛ̀ ǹyɛɛ dîai, “Ǹolôŋ aâ saa?” Dîyɛɛ mai, “Owoei aâ saa.”

²⁰Deeƃé mu-sìɣe ǹɔii ma é ŋ̀waa é wúlɔ sía ma, é ŋɔseɣei maa fáleŋ. È lì Yâwɛɛ ŋɔsua-kɔlɔ pɛ́rɛi mu é vɛ̀li. È kùla naa é lí ŋɔpɛ́rɛi lá. È mii-sɛŋ marê kɛ̂ɛ kɛ̀ dí dɛ̀ɛ bɔ́ é ǹáa míi.

²¹Ŋɔpôlu-ƃelai dí mò mà dîyɛɛi, “Lé ƃé ya gɛ́ ŋí a kûai? Í sûŋ sìɣe í wɔ́lɔ ǹolôŋ mɛni ma tãi è kɛ̀ la ɣele mai. Kɛ́lɛ zaai, ya ímu siɣe ya mii-sɛŋ mii.”

²²È zu tòo ǹyɛɛi, “Ǹôloŋ kɛ́ɛ ɣele mai, ŋá sûŋ sìɣe ŋá wɔ́lɔ. Ŋá kɛ̀ ŋ́gili ŋá siâi ńyɛ̃ɛi, ‘Gbɛ̂ɛ ƃé gɔ́lɔŋ ɣele da Yâwɛɛ a pâi ḿalôŋ kâai é gɛ́ ǹolôŋ é lɛ́ɛ ɣele ma?’

²³Kɛ́lɛ a nâa saa. Ŋa pâi sûŋ siɣêi lé mɛni ma? Ŋa pɔri gɛ̂i é fúlu-laa sɔlɔ ƃó ŋɔ́nɔ pôlu? Ŋa pâi liî bɔ́-naa kɛ́lɛ vé pâi pâi ŋɔ́nɔ pôlu ḿbɔ naa.”

²⁴Deeƃé è ŋɔnɛnîi ŋáa nɛnɛ. È lɔ̀ la pɔ̂rɔŋ é koo síɣe. È lóŋ surɔŋ maa sɔlɔ ƃò Deeƃé é ǹáa sée a Saloma. Yâwɛɛ è ǹolôŋ wɛ̀li.

²⁵Yâwɛɛ è Netaŋ tɛ̀ɛ é pá é ǹolôŋ láa sée a Zedídia-ni ǹyaa Yâwɛɛ mɛni ma.

²⁶Zôa è kɔ́ pɛ̀lɛ Laba taa-leei ma é maa tínaŋ. Laba ƃé kɛ̀ a Amɔŋ-ŋai dítaa-lee kɛ́tɛi.

²⁷Zôa è kéla-ŋa tɛ̀ɛ Deeƃé pɔ́-naa ǹyɛɛ dîai, “Ka lí ká m̀ó Deeƃé ma a gɛɛ ŋa kɔ́ pɛ́lɛ Laba taa-leei ma. Nyíti pôlu ma ŋá ƃɛ́i sòŋ daa-leei su-ƃelai da yá sɔlɔ ƃò naai.

²⁸M̀ɛni ma, gɔ-kuluƃa-ŋai pú díkîe ma ká pá kú daa-leei sóŋ. A wàla kɛ́ tí, ŋa pâi naa sonîi ŋa ńaa sée ma.”

²⁹Nya ƃe Deeƃé è ŋɔnûai kélee ŋáa tɛ̀ gîe ma dí tɛ́ Laba taa-leei su dí naa sòŋ.

³⁰È díkâloŋ ŋɔƃɔrɔi kùla ŋûa. Ŋɔwuyɛ è kɛ̀ yɛ̂ɛ gôo ŋɔpãŋ buu lɔ́ɔlu mɛi saaƃa káo saaƃa da gbôra. Kɔni mɛni kpanaŋɔɔ tɔnɔ è kɛ̀ zu. Deeƃé è bɛ̀lɛ ŋ̀ûa. È daai su sãa támaa kùla naa.

³¹È naa-ƃelai kélee sòŋ é pá a dia-ni. Da-ŋa díkɛ wúru-ƃêlai mì, da-ŋa díkɛ tíi kɛ̀ a yûɔ da ƃóa-sɔkpɔ-ŋa, da-ŋa díkɛ pɔ̂rɔ kane. È gɛ̀ tí a Amɔŋ taa-ŋai kélee su-ƃela. Deeƃé da ŋɔnûai kélee dí lì pôlu Zerusâlɛŋ.